Mambu ya nsuka ya Moyize
Na bamvula nkama mosi na makumi zole, Moyize ke yekula kisalu: Tata ya beto ke kwenda na ntwala mpe ke yambula beno ata fyoti ve, Yeswa ke twadisa. Ba sonikaka Musiku, samu na kutanga yawu na ndinga ya ngolo konso mvula ya nsambwadi na bantu nyonso, kintwadi na bana. Ba longaka digembo, samu ti yandi zaba ti bawu ke baluka.
Tata ya beto ke zonza na bavese 14–21, 23
31 1Na yina, Moyize kwendaka mpe tubaka mambu yayi na bantu nyonso ya Isayeli. 2Yandi zabisaka bawu: «Bubu yayi, mu kele na bamvula 120; mu lenda dyaka ve kubasika mpe kukota, mpe Tata ya beto me zabisa munu: “Nge ke sabuka ve Yolodani yayi.” 3Tata ya beno yandi mosi ke sabuka na mantwala ya beno; yandi ke fwa bayinsi yayi na mantwala ya beno, ebuna beno ke kukula bawu. Yeswa ke sabuka na mantwala ya beno, mutindu Tata ya beto me tuba. 4Tata ya beto ke sala bawu mutindu yandi salaka Siwone na Ogi, bantinu ya ba-Amoli, mpe yinsi ya bawu, ntangu yandi fwaka bawu. 5Tata ya beto ke pesa bawu na beno, mpe beno fwana kusala bawu kaka mutindu mu tumisaka beno. 6Beno vwanda na ngolo na kibakala. Beno tekita ve mpe beno kuma na boma ve na mantwala ya bawu, samu ti Tata ya beno ke kwenda ti beno; yandi ke yambula beno ata fyoti ve mpe ke bika beno ve.»
7Moyize bokilaka Yeswa mpe zabisaka yandi na mantwala ya bantu nyonso ya Isayeli: «Vwanda na ngolo na kibakala—nge ke kwenda ti bantu yayi na yinsi yina Tata ya beto diilaka bankooko ya bawu ndefi na kupesa bawu, mpe nge ke pesa bawu yawu mutindu mvwilu ya bawu. 8Tata ya beto yandi mosi ke kwenda na mantwala ya nge; yandi ke vwanda ti nge. Yandi ke yambula nge ata fyoti ve mpe ke bika nge ve. Kutekita ve mpe kulemba ntima ve.»
Musiku yina ba pesaka na Isayeli
9Moyize sonikaka Musiku yayi mpe pesaka yawu na banganga-Nzambi, bana ya Levi, bayina vwandaka nata Sanduku ya Ngwisani ya Tata ya beto, mpe na bakuluntu nyonso ya Isayeli. 10Na yina, Moyize tumisaka bawu: «Na nsuka ya konso mvula ya nsambwadi, na ntangu ya kutula ya mvula ya kukatula bamfuka, na ntangu ya Mukembo ya Mileba, a a v10 Mukembo ya Mileba: mukembo ya nkungulu ya bambuma na ntangu ya bwisi yina ke salamaka lumingu mosi, kisika mabuta vwandaka tunga mpe zinga na mileba ya ntangu fyoti samu na kuyibuka nzila ya bana ya Isayeli na yinsi ya kuyuma. 11ntangu bantu nyonso ya Isayeli ke kwiza na mantwala ya Tata ya beno na kisika yina yandi mosi ke soola, beno tanga Musiku yayi na ndinga ya ngolo na mantwala ya bantu nyonso ya Isayeli. 12Beno kutikisa bantu—babakala, bakento, bana, mpe banzenza yina ke zinga na bambanza ya beno—samu na kuwa, kulongoka, mpe kuwa boma ya Tata ya beno, mpe na kulanda mpe kusala mambu nyonso ya Musiku yayi. 13Na yina, bana ya bawu, bayina zaba ve Musiku yayi, ke kuwa yawu mpe ke longoka na kuwa boma ya Tata ya beno bilumbu nyonso yina beno ke zinga na yinsi yina beno ke sabuka Yolodani samu na kubaka yawu.»
Tata ya beto ke pesa Yeswa kiyeko
14Tata ya beto zabisaka Moyize: «Lufwa ya nge me kuma pene-pene. Bokila Yeswa mpe beno telama na Yinzo ya Mbwabanu; mu ke pesa yandi kiyeko.» Na yina, Moyize na Yeswa kwendaka mpe telamaka na Yinzo ya Mbwabanu.
15Na yina, Tata ya beto monikinaka na Yinzo na kati ya dikunzi ya tuti, mpe dikunzi ya tuti telamaka na mwelo ya Yinzo. 16Mpe Tata ya beto tubaka na Moyize: «Nge me kuma pene-pene na kulala ti bankooko ya nge. Na manima, bantu yayi ke telama mpe ke sala kindumba na kulanda banzambi ya nzenza ya yinsi yina bawu ke kota, bawu ke yambula munu mpe ke buka ngwisani yina mu salaka ti bawu. 17Na kilumbu yina, nganzi ya munu ke pela na zulu ya bawu. Mu ke bika bawu, mu ke bumba kizizi ya munu na bawu, mpe ba ke dya bawu. Bampasi mingi na byadi mingi ke kwizila bawu. Na kilumbu yina, bawu ke tuba: “Keti bampasi yayi me kwizila beto ve samu ti Nzambi ya beto kele ve ti beto?” 18Mu ke bumba kibeni kizizi ya munu na kilumbu yina, samu na mambu nyonso ya yimbi yina bawu salaka, na kubaluka na banzambi ya nkaka.
19Ntangu yayi, beno sonika mukunga yayi samu na beno mosi, beno longisa yawu na bana ya Isayeli, beno tula yawu na bayinwa ya bawu, samu ti mukunga yayi kuvwanda kimbangi samu na munu na ntadisi ya bana ya Isayeli. 20Ntangu mu ke kotisa bawu na yinsi yina ke fuluka na miliki na buyiki, yina mu diilaka bankooko ya bawu ndefi, bawu ke dya, ke yukuta mpe ke kuma mafuta, ke baluka na banzambi ya nkaka mpe ke sadila yawu, ke sosa munu, mpe ke buka ngwisani ya munu. 21Ntangu bampasi mingi na byadi mingi ke kuzwa bawu, mukunga yayi ke telama na ntadisi ya bawu mutindu kimbangi, samu ti ba ke zimbana yawu ve na bayinwa ya bana ya bawu. Samu ti mu zaba mambu yina bawu ke yindula bubu yayi, na ntwala mu kotisa bawu na yinsi yina mu diilaka ndefi na kupesa bawu.»
22Na yina, Moyize sonikaka mukunga yayi na kilumbu yina mosi mpe longisaka yawu na bana ya Isayeli.
23Na yina, Tata ya beto pesaka Yeswa, mwana ya Nune, kiyeko: «Vwanda na ngolo na kibakala—nge ke kotisa bana ya Isayeli na yinsi yina mu diilaka ndefi na kupesa bawu, mpe munu mosi ke vwanda ti nge.»
24Ntangu Moyize manisaka kusonika mambu ya Musiku yayi na dibuku, kubanda na mbandukulu tii na nsuka, 25yandi tumisaka ba-Levi bayina vwandaka nata Sanduku ya Ngwisani ya Tata ya beto: 26«Beno baka Dibuku yayi ya Musiku mpe beno tula yawu na lweka ya Sanduku ya Ngwisani ya Tata ya beno, samu na kubikana kuna mutindu kimbangi na ntadisi ya beno. 27Samu ti mu zaba mutindu beno ke mangaka mpe yintu-ngolo ya beno. Ata ntangu yayi, ntangu mu kele moyo ti beno bubu yayi, beno me manga na kutumama na Tata ya beto—ebwe na manima ya lufwa ya munu! 28Beno kutikisa bakuluntu nyonso ya makanda ya beno mpe bakengidi na munu, samu ti mu zabisa bawu mambu yayi mpe samu ti zulu na ntoto kuvwanda bambangi na ntadisi ya bawu. 29Samu ti mu zaba ti, na manima ya lufwa ya munu, beno ke kubeba mpenza mpe ke katuka na nzila yina mu tumisaka beno. Mpe na bilumbu yina ke kwiza, mpasi ke bwila beno, samu ti beno ke sala mambu ya yimbi na meso ya Tata ya beto, na kupesa yandi nganzi na kisalu ya maboko ya beno.»
30Moyize tangaka mambu ya mukunga yayi, kubanda na mbandukulu tii na nsuka, na mantwala ya mukangu nyonso ya Isayeli.