መፋነዊ ቃል ሙሴ

ኣብ ሚእትን ዕስራን ዓመቱ ሙሴ ነቲ ዕዮ የረክብ፦ ኣቦና ባዕሉ ኣብ ቅድሚኦም ይኸይድ፥ ፈፂሙ ድማ ኣይሓድጎምን፥ ኢያሱ ኸዓ ክመርሕ እዩ። እቲ ሕጊ ተፅሒፉ፥ ኣብ መወዳእታ ነፍሲ ወከፍ ሻብዐይቲ ዓመት ንዅሉ ሰብ ምስ ቆልዑ ዓው ኢሉ ኽንበብ ኣለዎ። መዝሙር ድማ ይምሃር፥ ክግልቡ ኸም ዝኾኑ ስለ ዝፈልጥ።

ምዕራፍ 31።

ሙሴ ድማ ከይዱ፥ እዘን ቃላት እዚኣተን ንዅሉ እስራኤል ተዛረበ። ንሱ ድማ ከምዙይ በሎም፦ “ሎሚ ኣነ ወዲ ሚእትን ዕስራን ዓመት እየ፤ ድሕሪ ደጊም ክወፅእን ክኣቱን ኣይክእልን እየ፤ ኣቦና ከዓ፦ ‘ነዝ ፈለግ ዮርዳኖስ እዙይ ኣይትሳገሮን ኢኻ’ ኢሉኒ እዩ። ኣቦኻትኩም ባዕሉ ኣብ ቅድሜኹም ክሳገር እዩ፤ ነዞም ኣህዛብ እዚኣቶም ኣብ ቅድሜኹም ከጥፍኦም እዩ፤ ንስኻትኩም ድማ ክትሰጉጉዎም ኢኹም። ኢያሱ ኸዓ ከምቲ ኣቦና ዝበሎ፥ ኣብ ቅድሜኹም ክሳገር እዩ። ኣቦና ድማ ከምቲ ንሲሆንን ንዖግን፥ ነገስታት ኣሞራውያንን ንምድሮምን ምስ ኣጥፍኦም ዝገበሮ፥ ከምኡ ክገብሮም እዩ። ኣቦና ድማ ናባኻትኩም ክህቦም እዩ፤ ከምቲ ዝኣዘዝኩኹም ዅሉ ድማ ብልክዕ ክትገብርዎ ኢኹም። ፅንዑ፤ ትባዕ፤ ኣቦኻትኩም ምሳኻትኩም ይኸይድ ኣሎ እዩ እሞ፥ ኣይትፍርሕዎም፤ ኣይትደንግፁሎምን። ንሱ ፈፂሙ ኣይሓድገኩምን፤ ኣይጥንጥነኩምን እዩ።”

ሙሴ ድማ ንኢያሱ ፀዊዑ፥ ኣብ ቅድሚ ዅሉ እስራኤል ከምዙይ በሎ፦ “ፅናዕ፤ ትባዕ፤ ንስኻ ምስ እዝ ህዝቢ እዙይ ናብታ ኣቦና ንኣቦታቶም ክህቦም ዝመሓለሎም ምድሪ ክትኣቱ ኢኻ፤ ንስኻ ድማ ከተውርሶም ኢኻ። ኣቦና ባዕሉ ኣብ ቅድሜኻ ይኸይድ ኣሎ፤ ንሱ ምሳኻ ክኸውን እዩ። ፈፂሙ ኣይሓድገካን፤ ኣይጥንጥነካን እዩ። ኣይትፍራሕ፤ ኣይትደንግፅ።”

እቲ ንእስራኤል ዝተዋህበ ሕጊ

ሙሴ ድማ ነዝ ሕጊ እዙይ ፅሒፉ፥ ነቶም ታቦት ኪዳን ኣቦና ዝፅውሩ ካህናት፥ ደቂ ሌዊ፥ ከምኡውን ንዅሎም ዓበይቲ እስራኤል ሃቦም። ሙሴ ድማ ከምዙይ ኢሉ ኣዘዞም፦ “ኣብ መወዳእታ ሸሸውዓተ ዓመት፥ ኣብቲ እተመደበ ጊዜ ዓመት ምሕረት፥ በቲ በዓል ዳስ፥ ^a ኵሉ እስራኤል ኣብ ቅድሚ ኣቦኻትኩም፥ ኣብታ ንሱ ዝሓረያ ቦታ ኽቐርብ እንተሎ፥ ነዝ ሕጊ እዙይ ኣብ ቅድሚ ዅሉ እስራኤል ዓው ኢልኩም ኣንብብዎ። ነቶም ህዝቢ፥ ሰብኡትን ኣንስትን ቆልዑን ኣብ ከተማታትኩም ዝነብር ጓናን ኣክብዎም፤ ክሰምዑን ክመሃሩን ንኣቦኻትኩም ድማ ክፈርሑን፥ ኵሉ ቃላት እዝ ሕጊ እዙይ ከዓ ክሕልዉን ክገብሩን። ደቆም ድማ፥ እቶም ነዝ ሕጊ እዙይ ዘይፈለጡ፥ ኵሉ እቲ ኣብታ ንፈለግ ዮርዳኖስ ሰጊርኩም እትወርስዋ ምድሪ እትነብሩሉ ዘመን፥ ክሰምዕዎን ንኣቦኻትኩም ክፈርሑ ድማ ክመሃሩን እዮም።”

ኣቦና ንኢያሱ ኣዘዞ

ኣቦና ድማ ንሙሴ ከምዙይ በሎ፦ “ሞትካ ቐሪባ ኣላ። ንኢያሱ ፀዊዕኻ ናብ መራኸቢ ድንኳን ቅረቡ፤ ኣነ ኸዓ ክእዝዞ እየ።” ሽዑ ሙሴን ኢያሱን ከይዶም ኣብ መራኸቢ ድንኳን ቀረቡ።

ኣቦና ድማ ኣብቲ ድንኳን ብዓምዲ ደበና ተገልፀ፤ እቲ ዓምዲ ደበና ኸዓ ኣብ ኣፍ ደገ እቲ ድንኳን ደው በለ። ኣቦና ድማ ንሙሴ ከምዙይ በሎ፦ “ንስኻ ምስ ኣቦታትካ ክትድቅስ ኢኻ። እዝ ህዝቢ እዙይ ድማ ተሲኡ፥ ናብታ ዝኣትዋ ዘለዉ ምድሪ ደድሕሪ ባዕዳውያን ኣማልኽቲ እታ ምድሪ ክምንዝር እዩ፤ ንኣይ ሓዲጉ ድማ ነቲ ምሳታቶም ዝኣተኽዎ ኪዳን ክጥሕስ እዩ። በታ መዓልቲ እቲኣ ድማ ቍጥዓይ ኣብ ልዕሊኣቶም ክነድድ እዩ፤ ክሓድጎም፥ ገፀይ ድማ ካባታቶም ክኽውል እየ፥ ንሳቶም ከዓ ክውሐጡ እዮም። ብዙሕ መከራን ጭንቀትን ድማ ክመፆም እዩ። በታ መዓልቲ እቲኣ ድማ፦ ‘ኣምላኽና ምሳና ስለ ዘየለ ደይኮነን እዝ መከራ እዙይ ዝረኸበና?’ ክብሉ እዮም። ኣነ ኸዓ በታ መዓልቲ እቲኣ፥ ስለ እቲ ናብ ካልኦት ኣማልኽቲ ብምግልባጦም ዝገበርዎ ዅሉ ክፍኣት፥ ገፀይ ብርግፅ ክኽውል እየ።

ሕዚ ኸዓ ነዝ መዝሙር እዙይ ንነብስኹም ፀሓፍዎ፤ ንደቂ እስራኤል ድማ መሃርዎ፤ ኣብ ኣፎም ከዓ ኣንብርዎ፤ እዝ መዝሙር እዙይ ኣብ ልዕሊ ደቂ እስራኤል ምስክር ምእንቲ ክኾነኒ። ናብታ ነቦታቶም ዝመሓልኩሎም፥ ፀባን መዓርን እተውሕዝ ምድሪ ምስ ኣእተኹዎም፥ ክበልዑ፥ ክፀግቡን ክሰብሑን፥ ናብ ካልኦት ኣማልኽቲ ግልፅ ኢሎም ከገልግልዎም፥ ንኣይ ክንዕቑ፥ ኪዳነይ ድማ ክጥሕሱ እዮም። ብዙሕ መከራን ጭንቀትን ምስ ረኸቦም፥ እዝ መዝሙር እዙይ ከም ምስክር ኣብ ቅድሚኦም ክምስክር እዩ፤ ካብ ኣፍ ዘርኦም ኣይርሳዕን እዩ እሞ። ናብታ ክህቦም ዝመሓልኩሎም ምድሪ ከየእተኽዎም ከለኹ፥ ሎሚ ዝሓስብዎ ዘለዉ እፈልጥ እየ እሞ።”

ሙሴ ድማ በታ መዓልቲ እቲኣ ነዝ መዝሙር እዙይ ፀሓፎ፤ ንደቂ እስራኤል ከዓ መሃሮ።

ኣቦና ድማ ንኢያሱ ወዲ ነዌ ከምዙይ ኢሉ ኣዘዞ፦ “ፅናዕ፤ ትባዕ፤ ንስኻ ንደቂ እስራኤል ናብታ ክህቦም ዝመሓልኩሎም ምድሪ ክተእትዎም ኢኻ እሞ፥ ኣነ ድማ ምሳኻ ክኸውን እየ።”

ሙሴ ድማ ቃላት እዝ ሕጊ እዙይ ካብ መጀመርታኡ ክሳዕ መወዳእታኡ ኣብ መፅሓፍ ፅሒፉ ምስ ወድአ፥ ነቶም ታቦት ኪዳን ኣቦና ዝፅውሩ ሌዋውያን ከምዙይ ኢሉ ኣዘዞም፦ “ነዝ መፅሓፍ ሕጊ እዙይ ውሰዱ፥ ኣብ ጎኒ ታቦት ኪዳን ኣቦኻትኩም ድማ ኣንብርዎ፤ ኣብኡ ኸዓ ኣብ ልዕሌኹም ምስክር ኮይኑ ይፅናሕ። ኣነ ዓመፅኩም ድርቅናኹምን እፈልጥ እየ እሞ። ሕዚ ኣነ ምሳኻትኩም ብህይወት ከለኹ ኸኣ ኣብ ልዕሊ ኣቦና ዓሚፅኩም ኣለኹም፤ ድሕሪ ሞተይ ደኣ ኽንደይ ኮን ክገድድ! ኵሎም ዓበይቲ ነገድኩምን ኣሕሉቕኩምን ናባይ ኣክቡ፤ እዘን ቃላት እዚኣተን ኣብ እዝኖም ክዛረብ፥ ንሰማይን ንምድርን ድማ ኣብ ልዕሊኦም ምስክር ክኾኑ ክፅውዕ ምእንቲ። ድሕሪ ሞተይ ፈፂምኩም ከም እትበላሸዉ፥ ካብቲ ዝኣዘዝኩኹም መንገዲ ድማ ከም እትግለሱ እፈልጥ እየ እሞ። ኣብ ዳሕረዋይ መዓልቲታት ድማ መከራ ኣብ ልዕሌኹም ክወርድ እዩ፤ ኣብ ቅድሚ ኣቦና ክፉእ ክትገብሩ፥ ብግብሪ ኣእዳውኩም ድማ ከተቘጥዕዎ ኢኹም እሞ።”

ሙሴ ድማ ቃላት እዝ መዝሙር እዙይ፥ ካብ መጀመርታኡ ክሳዕ መወዳእታኡ፥ ንዅሉ ማሕበር እስራኤል ኣብ እዝኖም ተዛረቦ።