Sa Kapaisa Ring Thou rwe
Meithaan rwanna thaan khutnu mu rwe, atiyeda bani ding za mak ngaake. Emmaus la senu mi kani ga bani theisu maknu manpa khat le chong kabia rwe, maanna chongdip bing om lang bakhou rin hiat thang rwe, atiga bu ga kabengnu kaan bi makka maan ga tubo dinu thei mak ngaake. Maan hungluga, Maan ga katha make dinu to phaang langna ngaa sa rwe, habei ga bani ding rithoi thangluga Bapa khou tambaan la kai thou rwe.
24 1Maap lak om kamanu ni, louthwan khwa baan karang takka, banina daan satnu banamsanu pot ka phunluga thaan la hung ngaake. 2Banina thaan bina thaankham lung ga tun swak thangnu mu rwe, 3atiyeda bani basung la khutnu kaan bi Pukraangba Jisu pum ga dou make. 4Haba lang bi banina batok bariak thei mak ong bi, Phaang ngo, baan chan chan pwan sinnu manpa kani bani kaong bi han thou rwe. 5Bani kachiga bani mai talei bi kunta rwe. Manpa haba kanina bani khou rinne, “Nanina ringnu mi ding thinu mi lak pi pa-aam briakpina raang ongnubo? 6Maan heiya riak bi ong make—Maan ring thou rwe. Maan Galilee pi ong basaan Maanna nani khou rin damnu ding baningsu ngo, 7“Misa Sa Kapaisa ding noh tonu mi bing kut pi pi swak lat, cross pi athat thang lat, khatle thiraang ni ga ring thou lat ding diga.”
8Atiga banina Baom chongkaang bing ga baningsu rwe, 9Banina thaan bina han hungluga, heiya bing za pat somga khat khatle katei mi bing za khou rin thang rwe. 10Magdalene Mary, Joanna, James nu Mary khatle bani le diga ongnu katei meithaan rwanna heiya bing ga chonglang rwan khou rin thang rwe. 11Atiyeda heiba chongkaang bing ga bani khou takaat chong danga an rwe, khatle banina haga balumsa make. 12Peter na thouluga thaan la karo rwe; Maan kuntaluga phaangnu kaan bi banemnu pwan za mu rwe, atiga swak tamnu ding loh loga baom in la han thou rwe.
Emmaus la Se Lampui
13Haba ni khatcha bi, bani lak pina mi kani, Jerusalem bina mile sari khak namlaa ongnu, Emmaus diga kounu namlian sen khat la se rwe, 14atiga banina swak tamnu heiya bing za lang bi bani cham lak pi kathui ngaake. 15Banina kabia khatle kathui bacham ong bi, Jisu bahakna banai hungluga bani le diga se bacham rwe. 16Atiyeda banina Bating bapu thei mak lang bani mik ga kha thang ngaake.
17Maanna bani khou rinne, “Nani se ong bi nani cham lak pi pa-aam kabia bacham ongnubo?” Banina han tangluga basung riangre tak rwe.
18Bani lak pina Cleopas tiga kounu pakhatna bakhou rinne, “Heiba ni bing bi Jerusalem pi swak tamnu bing ga mak theiga Jerusalem la hungnu nang khatcha za ambo?”
19Maanna rinne, “Pa-aam bing bo?” Banina bakhou rinne, “Nazareth rwan Jisu lang ga, Maan ani Pa khatle mi bingza meithaan bi chwan le chongkaang bi baraam basaangnu Thiamting khat ngaake,
20khatle ani tako kabengnu rwan khatle lian tonu rwanna Bating thinu laak thang lang kut pi pi swakluga cross pi athat thang damnu ga; 21Maan Israel ding ran swak tingnu mi ye diga anina bachun ngaake. Atiyeda heiya bing za chung bi, heiya swak tamnu ni bina thiraang ni rwe atun. 22Khatle ani lak pi katei meithaan khakna le ani ding loh lo thang rwe—bani louthwan karang takka thaan la hungluga, 23khatle Bapum ga dou makluga, Maan ringnuwe diga rinnu katha zung bing ga ramanu bi mu rwe diga ringa han hung rwe. 24Ani le diga ongnu khak gana thaan la seluga, katei meithaan rwanna rin damnu danga mu rwe, atiyeda banina Bating mu make.”
25Maanna bani khou rinne, “Nani balu tonu ongnuwe, khatle thiamting rwanna rin damnu bing za balumsanu bi bazaang tak ongnuwe! 26Christa na heiya bing za riangre louga Baom lwat liannu bi kaamkhut lang sa makpo?”
27Atiga Moses khatle Thiamting rwan bina thouluga, Maanna Bathiangnu chongdip bing za khou Bahak lang bi ha bing za bani khou bathiangga rin swak rwe.
28Atiga banina bani se dingnu namlian sen la nai hung rwe, khatle Maanna kasem se swak dingnu danga an rwe. 29Atiyeda banina rakanga rinne, “Ani le diga riak ongro—nukhwa hung nai rwe, khwa le loi dam ding rwe.” Atiga Maan bani le diga riak ong lang insung la kaamkhut rwe.
30Maan bani le diga sa in lang ongta bi, Maanna uilu ga louluga rithoi pi thangga, haga thiak bakluga, bani khou pi rwe. 31Atiga bani mik ga inkhaan latnu to rwe, khatle banina Bating bapu thei rwe. Atiga Maan bani mik bina braan dam rwe. 32Banina bani cham lak pi rinne, “Maanna lampui bi ani khou kabia ong bi, khatle ani khou Bathiangnu chongdip bing bathiangga rin ong bi, ani lung ga ani sung bi mei kan mak ngaakpo?” 33Haba chakrin khatcha bi banina thouluga Jerusalem la han hung rwe, atiga pat somga khat khatle bani le diga ongnu bing kadoi bacham ongnu dou rwe, 34bani rinne, “Pukraangba batak takka ring thou rwe, khatle Simon khou Bahak ga pi mu thang rwe!” 35Atiga banina lampui bi swak tamnu bing ga khatle uilu thiak baknu bi tatoga Bating bapu thei damnu lang ga rin thang rwe.
Jisu na Baom Mi Nun Khou Pi Mu Thang rwe
36Banina heiya bing kabia ong bi, Jisu bahakna bani lak pi han thouluga bani khou rinne, “Nani khou dai bazaangnu ong ding ngo!”
37Atiyeda banina lingaaiga khatle kachiga, bani katha khat ding mu rwe diga baning rwe.
38Atiga Maanna bani khou rinne, “Nani pa-aam briakpina kachat ongnubo, khatle nani lung bi pa-aam briakpina balumsianu hung thou ongnubo? 39Akut khatle Akhok ga phaang ngo—batak takka Ei bahak nge. Ei ding banaan thangga muwo: katha khat na asa khatle baru ga am make, nanina Ei khou amnu danga mu ongnuwe.”
40Atiga Maanna heiya rin damnu nung, Maanna Bakut khatle Bakhok ga bani khou pi mu thang rwe.
41Atiga bani karo laiga balumsa mak basaan khatle loh lo ong basaan, Maanna bani khou rinne, “Nani heiya sanu pot ka ambo?”
42Banina Bakhou nga kapaangnu khak ka pi thang rwe, 43atiga Maanna haga louluga bani meithaan bi sa rwe.
44Maanna bani khou rinne, “Ei nani le diga ong basaan nani khou rin thang ngaaknu heiya gaye: Moses om chongtan bi, Thiamting rwan bi khatle Kalum Laa bi Ei lang bi hiak thangnu bing za swak thang lat ngaake.”
45Atiga Maanna Bathiangnu chongdip bing swak thei langna bani baningba inkhaan lat thang rwe,
46atiga Maanna bani khou rinne, “Heiya hiak thang nge: Christa na riangrenu laak lat ngaake khatle thiraang ni ga thi bina ring thou lat ngaake, 47khatle noh bazaang thang lang sung le hungnu ga, Jerusalem bina thouga, mi doi bing za khou Bameng bina rin phun lat ngaake. 48Nani heiba thinu bing om sakhi gaye. 49Phaang ngo, Eina Apa om Bachongren nani chung bi lang hunglune. Atiyeda tambaan lana hungnu baraang nani sin thang basaan, nani namlian bi riak ngo.”
Pa na Basa Kapaisa Lousunu
50Atiga Maanna bani Bethany riak tang nga kalwang hungluga, Bakut kai thouluga bani ding rithoi pi thang rwe. 51Maanna bani ding rithoi pi thang ong bi, Maan bani bina khak seluga tambaan la kalwang thang rwe. 52Atiga banina Bating kalumluga, karo lianna Jerusalem la han hung rwe, 53khatle kalum in bi chat makka ani Pa ding swanga ong ngaake.