Mwana Asekwi
Basi bamoni libmilu efungwami, kasi bandimeli bango te. Bato mibale bazali kokende na Emausi bazali kosolola na mopaya oyo ayebisi bango Makomi, mpe bayebi ye kaka ntango akati mampa. Abimeli bango, alei mbisi mpo na kolakisa ete azali elilingi te, na nsima apambolaka bango mpe amemami likolo epai ya Tata na ye.
24 1Na mokolo ya liboso ya poso, na tongo penza, bakendeki na lilita, bamemi malasi oyo babongisaki. 2Bamonaki libanga elongolami na lilita, 3kasi tango bakotaki kati, bamonaki nzoto ya Nkolo Yesu te. 4Wana bazalaki kobulungana mpo na likambo yango, mbala moko mibali mibale batelemaki pembeni na bango, bilamba na bango ezalaki kongenga makasi. 5Kobanga ekangaki bango, bagumbamisaki bilongi na bango na nse. Mibali yango batunaki bango : « Mpo na nini bozali koluka ye oyo azali na bomoi kati na bakufi ? 6Azali awa te, asekwi. Bokanisa makambo oyo alobaki na bino wana azalaki naino na Galile, 7ete Mwana na Moto asengeli kopesama na maboko ya bato basumuki, abakama na ekulusu, mpe asekwa na mokolo ya misato. »
8Mpe bakanisaki maloba na Ye, 9bazongaki uta na lilita, bayebisaki makambo oyo nyonso na bato zomi na moko mpe na basusu nyonso. 10Maria Magadala, Yoana, Maria mama ya Yakobo, mpe basi misusu oyo bazalaki elongo na bango bayebisaki baapostolo makambo oyo. 11Kasi maloba yango emonanaki na bango lokola maloba ya bozoba, mpe bandimaki yango te. 12Petelo atelemaki, akimaki mbangu na lilita ; tango agumbamaki, amonaki kaka bilamba ya lini, bongo azongaki na ndako, na kokamwa mpo na makambo oyo esalemaki.
Nzela ya Emausi
13Na mokolo yango moko, bato mibale kati na bango bazalaki kokende na mboka moko, kombo na yango Emausi, oyo ezali mosika na Yelusaleme na milo nsambo pene. 14Bazalaki koloba bango na bango makambo oyo nyonso esalemaki. 15Wana bazalaki koloba mpe kosolola elongo, Yesu Ye moko apusanaki mpe akendeki elongo na bango. 16Kasi miso na bango ekangamaki mpo ete bayeba Ye te.
17Atunaki bango : « Makambo nini bozali kosolola bino na bino wana bozali kotambola ? » Batelemaki, bilongi na bango emonisaki mawa.
18Moko kati na bango, kombo na ye Kleopasi, azongisaki : « Yo kaka ozali mopaya na Yelusaleme oyo oyebi te makambo oyo esalemaki kuna na mikolo oyo ? »
19Atunaki : « Makambo nini ? » Balobaki : « Makambo ya Yesu ya Nazarete, mosakoli oyo azalaki na nguya na misala mpe na maloba liboso ya Tata na biso mpe ya bato nyonso,
20mpe ndenge bakonzi na biso ya banganga-Nzambe mpe bakonzi bapesaki Ye mpo na etumbu ya liwa, mpe babakaki Ye na ekulusu. 21Biso tozalaki kolikya ete Ye nde akosikola Isalaele. Kasi mpe, likolo ya makambo oyo nyonso, ekomi mokolo ya misato uta makambo yango esalemaki. 22Basi mosusu na biso mpe bakamwisaki biso : na tongo penza bakendeki na lilita, 23mpe bamonaki nzoto na Ye te, bazongaki koloba ete bamonaki mpe emoniseli ya baanjelu, oyo balobaki ete azali na bomoi. 24Basusu kati na baninga na biso bakendeki na lilita mpe bamonaki yango ndenge basi balobaki, kasi bamonaki Ye te. »
25Alobaki na bango : « Bino bozoba boni, mpe bozali malembe na kondima makambo nyonso oyo basakoli balobaki ! 26Klisto asengelaki te koyoka mpasi na makambo oyo mpe kokota na nkembo na Ye ? »
27Mpe kobanda na Moyize mpe na basakoli nyonso, alimbolaki bango na Makomi nyonso makambo nyonso oyo etali Ye moko.
28Mpe bapusanaki na mboka oyo bazalaki kokende, kasi Ye asalaki lokola akoki kokende mosika koleka. 29Kasi bazalaki kolendisa Ye : « Zala elongo na biso, pamba te butu ezali pene, mokolo esili pene. » Boye akotaki mpo na kozala elongo na bango.
30Tango afandaki na mesa elongo na bango, azwaki mampa, apambolaki yango, abukaki yango, mpe apesaki bango yango. 31Mpe miso na bango efungwamaki, mpe bayebaki Ye. Mpe akomaki komonana te liboso na bango. 32Balobaki bango na bango : « Mitema na biso ezalaki kopela te kati na biso wana azalaki koloba na biso na nzela, wana azalaki kofungolela biso Makomi ? » 33Na ngonga yango moko batelemaki, bazongaki na Yelusaleme, mpe bamonaki zomi na moko mpe bato oyo bazalaki elongo na bango bayanganaki esika moko, 34balobaki : « Solo Nkolo asekwi, mpe amonisi Ye na Simona ! » 35Mpe bango bayebisaki makambo oyo esalemaki na nzela, mpe ndenge bayebaki Ye tango abukaki mampa.
Yesu Amonisi Ye Moko epai ya Bato na Ye
36Wana bazalaki koloba makambo oyo, Yesu Ye moko atelemaki na kati na bango mpe alobaki na bango : « Kimia na bino ! »
37Kasi bakamwaki mpe babangaki mpe bakanisaki ete bamoni molimo.
38Alobaki na bango : « Mpo na nini bozali na mitungisi, mpe mpo na nini ntembe ezali kobima kati na mitema na bino ? 39Tala maboko na Ngai mpe makolo na Ngai : Ngai moko nde. Bosimba Ngai mpe botala : molimo azali na mosuni mpe mikuwa te, ndenge bozali komona ete Nazali na yango. »
40Tango alobaki boye, amonisaki bango maboko na Ye mpe makolo na Ye.
41Mpe wana bazalaki naino kondima te mpo na esengo mpe bazalaki kokamwa, alobaki na bango : « Bozali na eloko ya kolia awa ? »
42Bapesaki Ye eteni ya mbisi etumbami, 43mpe azwaki yango mpe alyaki yango liboso na bango.
44Alobaki na bango : « Oyo nde makambo oyo nalobaki na bino wana nazalaki naino elongo na bino : makambo nyonso oyo ekomami mpo na Ngai na Mibeko ya Moyize, na Basakoli mpe na Nzembo esengeli ekokisama. »
45Bongo afungolaki makanisi na bango mpo bayeba Makomi,
46mpe alobaki na bango : « Ekomami boye : Klisto asengeli koyoka mpasi mpe kosekwa uta na bakufi na mokolo ya misato, 47mpe ete bobongoli mitema mpo na bolimbisi masumu esengeli kosakolama na kombo na Ye epai ya bikolo nyonso, kobanda na Yelusaleme. 48Bino bozali batatoli ya makambo oyo. 49Nazali kotinda likolo na bino elaka ya Tata na Ngai. Bofanda na engumba kino bolatisami nguya oyo euti na likolo. »
Tata Andimi Mwana na Ye
50Mpe abimisaki bango libanda kino na Betania, mpe atombolaki maboko na Ye mpe apambolaki bango. 51Wana azalaki kopambola bango, akabwanaki na bango mpe atombolamaki na likolo. 52Mpe bagumbamelaki Ye mpe bazongaki na Yelusaleme na esengo monene, 53mpe bazalaki ntango nyonso na Tempelo, kopambola Tata na biso.
