Mwana Alamuka

Akazi agumana nthumba yakufunguka, mbwenye nkhabe kukhulupirwa. Awiri akhaenda ku Emau alonga na mlendo anaafotokozera Malemba, mbadzindikirwa basi pidagawa iye pao. Iye aonekera, adya nsomba toera kupangiza kuti nee ndi nzimu, buluka mbaapasa nkhombo mbakweruswa kuenda kudzulu kuna Baba wace.

Kapitulu 24.

Pa ntsiku yakutoma ya sumana, mamacibese, aenda ku nthumbi, mbabweresa mafuta akununkhira adakhunganya iwo. Agumana mwala udagubudusirwa kubuluka pa nthumbi, mbwenye pidapita iwo n'kati, iwo hadagumana manungo a Mbuya Yezu tayu. Mu ndzidzi ukhathimbanyika iwo thangwi ya pyenepi, mwadzidzi amuna awiri aima pa khundu pawo, akubvala nguwo zakung'anima. Mukugopa, akotamisa nkhope zawo pantsi. Amuna anewa abvundza tenepa: “Thangwi yanji musasaka ale ali maso pakati pa akufa? Iye nkhabe pano—Iye alamuka. Kumbukani pidakupangani Iye mukhali Iye ku Galileya, kuti Mwana wa Munthu asafunika kuperekwa kuna anthu akudawa, kukhomerwa pa ntanda, mbalamuka pa ntsiku yacitatu.”

Na tenepo iwo akumbuka mafala ace, mbabwerera kubuluka ku nthumbi, apanga pyonsene pyenepi kuna khumi na m'bodzi na anango onsene. Mariya Madhalena, Djuwana, na Mariya mai wa Tiyago, na akazi anango akhali na iwo, apanga pinthu pyenepi kuna apostolo. Mbwenye mafala anewa aoneka kuna iwo ninga mafala auzwazwa, iwo hadaakhulupira tayu. Pedhru alamuka mbathamanga ku nthumbi; pidakotama iye, aona nguwo za lineya basi, mbabwerera kunyumba kwace, mbadzumatirwa na pidacitika.

Njira ya ku Emau

Pa ntsiku ibodzi ene, awiri a iwo aenda ku nzinda wakucemerwa Emau, ukhali kutali na Yerusalemu pafupi na makilometru khumi na m'bodzi, iwo akhalonga unango na ndzace pya pinthu pyonsene pyenepi pikhadacitika. Mu ndzidzi ukhalonga iwo mbaceza pabodzi, Yezu Iye ene afendedzera mbaenda pabodzi na iwo. Mbwenye maso awo akhafungwa toera akhonde kun'dzindikira Iye.

Iye aabvundza tenepa: “Musaceza pyanji unango na ndzace mukufamba imwe?” Iwo alimira, mbaoneka akutsukwala.

M'bodzi wa iwo, wakucemerwa Kleopa, atawira tenepa: “Imwe ndimwe mulendo m'bodzi basi ku Yerusalemu wakuti nkhabe dziwa pinthu pidacitika kweneko mu ntsiku zino?”

Iye abvundza tenepa: “Pinthu pyanji?” Iwo atawira tenepa: “Pya Yezu wa ku Nazareti—mprofeta wa mphambvu mu macitiro na mafala pamaso pa Baba wathu na pa anthu onsene,

na kuti anyantsembe akulu athu na atsogoleri athu amperekera Iye ku ntongo wa kufa, mbankhomera pa ntanda. Ife tikhanyindira kuti Iye ndiye mbaaombola Izarayeli. Mbwenye kusiyapo pyonsene pyenepi, lero ndi ntsiku yacitatu kutomera pidacitika pinthu pyenepi. Akazi anango athu atidzumatirisambo—mamacibese akhali ku nthumbi, mbakhonda kugumana manungo ace, abwerera mbalonga kuti aona masomphenya a aanju, adalonga kuti Iye ali maso. Andzathu anango aenda ku nthumbi, mbagumana ninga mudalongera akazi, mbwenye iwo hadamuona Iye tayu.”

Iye aapanga tenepa: “Imwe ndimwe anthu akusowa ndzeru, akulenga mu ntima kukhulupira pyonsene pidalonga aprofeta! Kodi nkhabe kufunika kuti Kirixtu athabuke pinthu pyenepi, mbapita mu mbiri yace?”

Na tenepo, kutomera na Mose na Aprofeta onsene, Iye aafokotozera kubulukira m'Malemba onsene pinthu pyonsene pya Iye ene.

Afendedzera nzinda ukhaenda iwo, mbwenye Iye acita ninga asafuna kuenda patsogolo. Mbwenye iwo amphembesesa, mbalonga: “Khalani pabodzi na ife—kwadoka, ntsiku iri cifupi kumala.” Na tenepo Iye apita toera akhale na iwo.

Pidakhala Iye pa meza pabodzi na iwo, akwata nkate, mbaupasa nkhombo, mbaugwanda, mbaapasa iwo. Na tenepo maso awo afunguka, mban'dzindikira Iye. Buluka penepo, Iye azimala pa maso pawo. Iwo alonga unango na ndzace, mbalonga: “Kodi mitima yathu nkhabe kupisa mukati mwathu mu ndzidzi ukhalonga Iye na ife mu njira, pidatifungulira Iye Malemba?” Pa ola ibodzi ene, iwo alamuka, mbabwerera ku Yerusalemu, mbagumana khumi na m'bodzi pabodzi na ale akhali na iwo, adagumanyikana pabodzi, mbalonga: “Mbuya alamuka ndimo mwene, pontho aonekera kuna Simau!” Na tenepo iwo apanga pidacitika mu njira, na kuti Iye adzindikirwa tani mu kugwanda kwa nkate.

Yezu Aonekera kuna Anace

Mu ndzidzi ukhalonga iwo pinthu pyenepi, Yezu Iye ene alimira pakati pawo, mbaapanga tenepa: “Ntendere ukhale na imwe!”

Mbwenye iwo adzumatirwa na kugopa, mbanyerezera kuti akuona nzimu.

Iye aapanga tenepa: “Thangwi yanji muli akunentseka, pontho thangwi yanji kupenula kusabuluka mu mitima yanu? Onani manja anga na miyendo yanga—ndine Ine cadidi. Ndikhuyeni mbamuona: nzimu nkhabe nyama na mafupa, ninga munaona imwe kuti Ine ndinapyo.”

Pidamala Iye kulonga pyenepi, aapangiza manja ace na miyendo yace.

Mu ndzidzi ukhakhonda iwo kukhulupira thangwi ya kutsandzaya, mbadzumatirwa, Iye aabvundza tenepa: “Muna cakudya pano?”

Iwo ampasa cipande ca ntsomba yakuotcha, Iye acikwata, mbacidya pamaso pawo.

Iye aapanga tenepa: “Ipi ndi pidakupangani Ine mu ndzidzi ukhali Ine pabodzi na imwe: pyonsene pidalembwa pya Ine mu Mwambo wa Mose, na Aprofeta, na Masalmo pikhafunika kukwanirisika.”

Na tenepo Iye afungula manyerezero awo toera abvesese Malemba,

mbaapanga tenepa: “Pyenepi pidalembwa: Kirixtu asafunika kuthabuka, mbalamuka muli akufa pa ntsiku yacitatu, na kuti kutcunyuka toera kulekererwa kwa madawo kudzamwazwa mu dzina yace kuna madzindza onsene, kutomera ku Yerusalemu. Imwe ndimwe mboni za pinthu pyenepi. Ine ndinakutumizirani cipikirwa ca Baba wanga. Khalani mu nzinda mpaka mudzabvazikwe na mphambvu yakubulukira kudzulu.”

Baba Atambira Mwana Wace

Na tenepo Iye aatsogolera kunja mpaka ku Betaniya, mbakwaukisa manja ace, mbaapasa nkhombo. Mu ndzidzi ukhaapasa Iye nkhombo, Iye asiyana na iwo, mbakweruswa kuenda kudzulu. Na tenepo iwo an'lambira Iye, mbabwerera ku Yerusalemu na kutsandzaya kukulu, mbakhala ndzidzi onsene mu templo, mbasimba Baba wathu.