Job 10

10 ¹“Naluod na ako sa akong kaugalingong kinabuhi. Ipagawas ko sa walay pugong ang akong pagmulo; mosulti ako gikan sa kapait sa akong kalag. ²Mosulti ako sa Dios: Ayaw ako hukmi sa silot; pahibaloa ako kon nganong nakiglalis ka kanako. ³Nakapahimuot ba kanimo ang pagdaugdaug, ang pagtamay sa buhat sa imong mga kamot samtang gipahiyoman mo ang mga laraw sa mga daotan? ⁴Aduna ka bay mga mata nga unodnon? Nagtan-aw ka ba sama sa pagtan-aw sa tawo? ⁵Ang imong mga adlaw ba sama sa mga adlaw sa usa ka tawong may kamatayon, o ang imong mga tuig sama sa mga tuig sa usa ka tawo, ⁶nga kinahanglan mong susihon ang akong pagkasad-an ug pangitaon ang akong sala, ⁷bisan nahibalo ka nga ako dili sad-an, ug walay bisan kinsa nga makaluwas kanako gikan sa imong kamot?

⁸“Ang imong mga kamot mao ang naghulma kanako ug nagbuhat kanako, sa matag bahin nako, ug karon motalikod ka ug laglagon mo ako. ⁹Hinumdomi nga gihulma mo ako sama sa yutang kolonon. Ibalik mo ba karon ako sa abog? ¹⁰Dili ba gibubo mo ako sama sa gatas ug gipagahi mo ako sama sa keso, ¹¹gibistihan mo ako ug panit ug unod, ug gihabol mo ako pinaagi sa mga bukog ug mga litid? ¹²Gihatagan mo ako ug kinabuhi ug gugmang walay paglubad, ug ang imong pag-atiman nagbantay sa akong espiritu.

¹³“Apan gitago mo kini sa imong kasingkasing, ug nahibalo ako nga mao kini ang imong katuyoan: ¹⁴kon makasala ako, bantayan mo ako ug dili mo ako pagawason sa akong pagkasad-an. ¹⁵Kon ako sad-an, alaot ako! Ug bisan kon ako walay sala, dili ako makahangad sa akong ulo—napuno ako sa kaulaw, nalumos sa akong kasakitan. ¹⁶Kon ihangad ko ang akong ulo, gukdon mo ako sama sa usa ka liyon ug himoon mo na usab ang kahibulongan batok kanako. ¹⁷Nagdala ka ug bag-ong mga saksi batok kanako ug gibubo mo ang dugang pang kasuko kanako; balod-balod sa kasamok ang misulong kanako.

¹⁸“Nganong gipagawas mo pa man ako gikan sa tagoangkan? Maayo pa unta nga namatay ako sa wala pa ako makita ni bisan kinsang mata. ¹⁹Nahisama unta ako nga daw wala gayod mabuhi, gidala diretso gikan sa tagoangkan ngadto sa lubnganan. ²⁰Dili ba diyutay na lamang ang akong mga adlaw? Talikdi ako, pasagdi ako, aron makabaton ako ug makadiyot nga kahupayan, ²¹sa dili pa ako moadto sa dapit nga walay pagbalik, ngadto sa yuta sa kangitngit ug lawom nga landong, ²²ngadto sa yuta sa kangitngitan sama sa labing lawom nga kagabhion, sa lawom nga landong ug kagubot, diin bisan ang kahayag sama sa kangitngit.”