Jobu 10

10 ¹“Mo ti sú ìwàláàyè mi. Èmi yóò tú àròyé mi jáde ní òmìnira; èmi yóò sọ̀rọ̀ láti inú ìkorò ọkàn mi. ²Èmi yóò sọ fún Ọlọ́run pé: Má ṣe dá mi lẹ́bi; jẹ́ kí n mọ ìdí tí ìwọ fi ń bá mi jà. ³Ṣé ó wù ọ́ láti ni ni lára, láti kẹ́gàn iṣẹ́ ọwọ́ rẹ nígbà tí o ń rẹ́rìn-ín músẹ́ sí ète àwọn ènìyàn búburú? ⁴Ṣé o ní ojú ẹran-ara? Ṣé o ríran bí ènìyàn kíkú ti ń ríran? ⁵Ṣé ọjọ́ rẹ dàbí ọjọ́ ènìyàn kíkú, tàbí ọdún rẹ dàbí ọdún ènìyàn, ⁶tí ìwọ fi ń wádìí ẹ̀bi mi, tí o sì ń lépa ẹ̀ṣẹ̀ mi, ⁷bí ó tilẹ̀ jẹ́ pé o mọ̀ pé èmi kò jẹ̀bi, tí kò sì sí ẹni tí ó lè gbà mí sílẹ̀ lọ́wọ́ rẹ?

⁸“Ọwọ́ rẹ ni ó mọ mí tí ó sì dá mi, gbogbo ẹ̀yà ara mi, ṣùgbọ́n nísinsìnyí ìwọ yí padà láti pa mí run. ⁹Rántí pé o mọ mí bí amọ̀. Ṣé ìwọ yóò wá dá mi padà sí erùpẹ̀ nísinsìnyí? ¹⁰Ṣé ìwọ kò ha dà mí jáde bí wàrà tí o sì mú mi dì bí wàràkàṣì, ¹¹O fi awọ àti ẹran-ara wọ̀ mí, tí o sì fi egungun àti iṣan hun mí papọ̀? ¹²Ìwọ fún mi ní ìyè àti ìfẹ́ májẹ̀mú, ìtọ́jú rẹ sì ti ṣọ́ ẹ̀mí mi.

¹³“Síbẹ̀ ìwọ fi èyí pamọ́ sínú ọkàn rẹ, mo sì mọ̀ pé èyí ni ète rẹ: ¹⁴bí mo bá dẹ́ṣẹ̀, ìwọ yóò máa ṣọ́ mi, ìwọ kì yóò sì dá mi láre nínú ẹ̀bi mi. ¹⁵Bí mo bá jẹ̀bi, ègbé ni fún mi! Àní bí mo tilẹ̀ jẹ́ aláìlẹ́ṣẹ̀, èmi kò lè gbé orí mi sókè—mo kún fún ìtìjú, tí mo rì nínú ìpọ́njú mi. ¹⁶Bí mo bá gbé orí mi sókè, ìwọ ń dẹ mí bí kìnnìún, tí o sì tún ń ṣe iṣẹ́ ìyanu lòdì sí mi. ¹⁷Ìwọ mú ẹlẹ́rìí tuntun wá lòdì sí mi, tí o sì dà ìbínú rẹ sórí mi síi; ìgbì wàhálà lẹ́yìn ìgbì ń kọlù mí.

¹⁸“Èéṣe nígbà náà tí o fi mú mi jáde láti inú ìyá mi? Ìbá ṣe pé mo kú kí ojú ẹnikẹ́ni tó rí mi. ¹⁹Èmi ìbá ti rí bí ẹni pé n kò wà rí, tí a gbé mi tààrà láti inú lọ sí isà òkú. ²⁰Ọjọ́ mi kò ha kéré níye? Yí kúrò lọ́dọ̀ mi, fi mí sílẹ̀ nìkan, kí n lè ní ìtùnú fún ìṣẹ́jú kan, ²¹kí èmi tó lọ sí ibi tí ẹni kì í padà bọ̀, sí ilẹ̀ òkùnkùn àti òjìji ikú, ²²sí ilẹ̀ ìrọ̀lẹ̀ tó dàbí òru tó ṣú jùlọ, ilẹ̀ òjìji ikú àti rúdurùdu, níbi tí ìmọ́lẹ̀ pàápàá ti dàbí òkùnkùn.”