Jobu 11

11 ¹Nígbà náà ni Sofari ará Naama dáhùn pé: ²“Ǹjẹ́ àkúnya ọ̀rọ̀ yìí ni a kì yóò dáhùn sí? Ǹjẹ́ ọkùnrin tí ó kún fún ọ̀rọ̀ báyìí ni a ó dá láre? ³Ǹjẹ́ ọ̀rọ̀ asán rẹ ni yóò mú kí àwọn ẹlòmíràn dákẹ́? Ǹjẹ́ ìwọ yóò máa fi ẹlẹ́yà ṣe láìsí ẹni tí yóò tì ọ́ lójú? ⁴Nítorí ìwọ wí pé, ‘Ẹ̀kọ́ mi mọ́, èmi sì mọ́ níwájú rẹ.’ ⁵Ṣùgbọ́n háà, ìbá ṣe pé Ọlọ́run yóò sọ̀rọ̀, kí ó sì la ètè rẹ̀ sí ọ, ⁶kí ó sì fi àwọn àṣírí ọgbọ́n hàn ọ́—nítorí ọgbọ́n òtítọ́ ní ìhà méjì. Mọ̀ ọ́ nígbà náà pé Ọlọ́run ti fìyà jẹ ọ́ kéré sí bí ẹ̀ṣẹ̀ rẹ ti tọ́ sí. ⁷Ǹjẹ́ ìwọ lè wádìí àwọn ohun ìjìnlẹ̀ ti Ọlọ́run? Ǹjẹ́ ìwọ lè rí òpin Olódùmarè? ⁸Wọ́n ga ju àwọn ọ̀run lọ—kín ni ìwọ lè ṣe? Wọ́n jìn ju isà òkú lọ—kín ni ìwọ lè mọ̀? ⁹Ìwọ̀n wọn gùn ju ayé lọ, ó sì fẹ̀ ju òkun lọ. ¹⁰Bí ó bá kọjá lọ, tí ó sì há ènìyàn mọ́lé, tí ó sì pè é sí ìdájọ́, ta ni yóò lè dá a padà? ¹¹Nítorí ó mọ àwọn ènìyàn asán; nígbà tí ó bá rí ìwà búburú, ǹjẹ́ kì yóò kíyèsí i? ¹²Ṣùgbọ́n aṣiwèrè ènìyàn yóò gbọ́n nígbà tí a bá bí ọmọ kẹ́tẹ́kẹ́tẹ́ igbó ní ènìyàn. ¹³Bí ìwọ bá tún ọkàn rẹ ṣe, tí o sì na ọwọ́ rẹ sí i, ¹⁴bí ẹ̀ṣẹ̀ bá wà ní ọwọ́ rẹ, mú un kúrò, má sì ṣe jẹ́ kí àìṣòdodo gbé inú àgọ́ rẹ, ¹⁵nígbà náà ni ìwọ yóò gbé ojú rẹ sókè dájúdájú, láìsí ìtìjú; ìwọ yóò dúró ṣinṣin, ìwọ kì yóò sì bẹ̀rù. ¹⁶Ìwọ yóò gbàgbé ìpọ́njú rẹ, ìwọ yóò sì rántí rẹ̀ bí omi tí ó ti ṣàn kọjá lọ. ¹⁷Ayé rẹ yóò mọ́lẹ̀ ju ọ̀sán gangan lọ; òkùnkùn rẹ̀ yóò dàbí òwúrọ̀. ¹⁸Ìwọ yóò wà láìléwu, nítorí ìrètí wà; ìwọ yóò wò yíká, ìwọ yóò sì dùbúlẹ̀ ní àìléwu. ¹⁹Ìwọ yóò dùbúlẹ̀, kì yóò sì sí ẹni tí yóò dẹ́rùbà ọ́, ọ̀pọ̀lọpọ̀ ni yóò sì máa wá ojúrere rẹ. ²⁰Ṣùgbọ́n ojú àwọn ènìyàn búburú yóò kùnà; gbogbo ọ̀nà àbáyọ yóò nù mọ́ wọn lọ́wọ́, ìrètí wọn kìkì ni láti mí èémí ìkẹyìn wọn.”