Job 11

11 ¹Chieina Naamathwui Zopharna ngahānkai: ²"Tui kaphong hi ngahānkā makhalei leirala? Tui eina pemtinghai mipā akha mashunga da yairala? ³Nawui arema tuina mibingwui khamor famihai ngasakrala? Nali maishi ngasak khipākha makhalei tharan, nana mana̱rala? ⁴Kaja nana hānga, 'Iwui tamkachithei tharzāla, kala ina nawui miktāli kathara.' ⁵Kha, Vareva hānglaksi kaja chong, kala nali kaikashe awui morchai shomsi, ⁶kala thangkhameiwui ngathum kahai chi nali chitheimisi; kaja khamashung thangkhamei chi kashan khani lei. Chieina Varena nawui khayonkhamāngna tandi mihai kajiwui vanga teomeida nali charshihai kaji theilu. ⁷Varewui kathuk kahai chi nana fathuishaprala? Sāshap-pangshapawui thari nana phāshaprala? ⁸Chi kazingram atungshong hakmahālaka; nana khi sāshaprala? Chomli thukmei; nana khi theishaprala? ⁹Chibingwui khamataia okathui eina kasangmeira, kala shamadru eina hakkāmeira. ¹⁰Ana rāmakānlaga phātopli zangda, kala bicharpamli hokhuiakha, khipāna ali ngalan ngasakshapra? ¹¹Kaja ana makānkhanā mibingli thei; makhayā ot theiakha, chi ana maphaningkhuirala? ¹²Kha ramgadhānao akha mi eina kapharā tharan, mangkhama̱ mi akha thangmei ngasāra. ¹³Nana nawui ning angarānda, kala ali napāng katingda poakha, ¹⁴napāngli morei leiakha, chi horserhaolu, kala makhamashung ot nawui kachonshimli mapamranu, ¹⁵chithākha kachangkhata khayā makhalei eina nawui mai ngareikāra; na nganingshingda mangacheelakra. ¹⁶Nana nawui kachotkachāng malaira, chi tara̱ longvai kahai thāda phaningungra. ¹⁷Nawui mirin ngashunlung eina horkhameimeira; chiwui tangkhamang china ngathor thāhaora. ¹⁸Na nganantāp kahai ngasāra, kaja kachihān lei; na kuimareida yanglaga ningtāphup eina ngayaipamra. ¹⁹Na ngayaipamra, khipānakha nali mangachee ngasakmara, kala kachungkhana nawui ngahānkhangai phāra. ²⁰Kha makhayābingwui mik ngapeora; yāmshok khavai athumli maleiluimara, kala athumwui kachihān maningla manglā kānthui chimāngna."