ኢዮብ 11

11 ¹ነዓማቴዊው ሶፋር እንዲህ ሲል መለሰ፦ ²“ይህ የቃላት ጎርፍ ያለ መልስ ይቀራልን? እንዲህ በንግግር የተሞላ ሰው ጻድቅ ይባላልን? ³ከንቱ ንግግርህ ሌሎችን ዝም ያሰኛልን? የሚያሳፍርህ ሳይኖር ትዘባበታለህን? ⁴አንተ፦ ‘ትምህርቴ ንጹሕ ነው፤ በፊትህም ነውር የሌለብኝ ነኝ’ ትላለህና። ⁵ነገር ግን እግዚአብሔር ምነው በተናገረ፤ ከንፈሩንም በአንተ ላይ በከፈተ፤ ⁶የጥበብንም ምስጢር በገለጠልህ፤ እውነተኛ ጥበብ ሁለት ገጽታ አለውና። እግዚአብሔር ከበደልህ ይገባ ከነበረው ያነሰ እንደ ጠየቀህ እንግዲህ ዕወቅ። ⁷የእግዚአብሔርን ጥልቅ ነገር ልትመረምር ትችላለህን? የሁሉን ቻዩን ወሰን ልታገኝ ትችላለህን? ⁸ከሰማያት ከፍ ያሉ ናቸው፤ አንተ ምን ልታደርግ ትችላለህ? ከሲኦል ጠለቅ ያሉ ናቸው፤ ምን ልታውቅ ትችላለህ? ⁹መጠናቸው ከምድር ይረዝማል፤ ከባሕርም ይሰፋል። ¹⁰እርሱ አልፎ ቢያስር፤ ወደ ፍርድም ቢጠራ፣ ማን ሊመልሰው ይችላል? ¹¹እርሱ ከንቱ ሰዎችን ያውቃልና፤ ክፋትን ባየ ጊዜ አያስተውለውምን? ¹²ባዶ ጭንቅላት ያለው ሰው ግን ጥበበኛ የሚሆነው የሜዳ አህያ ውርንጫ ሰው ሆኖ ሲወለድ ነው። ¹³አንተ ልብህን ብታዘጋጅ፤ እጆችህንም ወደ እርሱ ብትዘረጋ፤ ¹⁴በእጅህ ኀጢአት ቢኖር፣ አስወግደው፤ በድንኳኖችህም ዐመፅ አይኑር፤ ¹⁵በእርግጥ ያለ ኀፍረት ፊትህን ታነሣለህ፤ ጸንተህም ትቆማለህ፤ አትፈራም። ¹⁶መከራህን ትረሳለህ፤ እንዳለፈ ውሃም ታስታውሰዋለህ። ¹⁷ሕይወትህ ከቀትር ይልቅ ይበራል፤ ጨለማውም እንደ ንጋት ይሆናል። ¹⁸ተስፋ ስላለ፣ በእርግጠኝነት ትኖራለህ፤ ዘውር ብለህም በሰላም ትተኛለህ። ¹⁹የሚያስፈራህ ሳይኖር ትተኛለህ፤ ብዙዎችም ሞገስህን ይሻሉ። ²⁰የክፉዎች ዐይኖች ግን ይደክማሉ፤ መሸሻቸውም ሁሉ ይጠፋባቸዋል፤ ተስፋቸውም የመጨረሻ ትንፋሻቸውን መተንፈስ ብቻ ነው።”