Kowol Sofar
Sofar ko nyigiis kosiir: ng'alaalei Job miising', ak kacharunin Kamuktaindet che ming'in kosiir tengek ne nyoljin ineendet. Isto tengek eng' kotinwekuk, kole, ak koek saboon kolaaro kosiir murotap beet. Ko golilit komugul, ak mwachei chiito ne ma po tengek.
11 1Kowol anyun Sofar ne po Naamah kole, 2“Tos ma kiwolji maraneet ne po ng'aleechu? Tos kibaoryan chiito ne nyiitaat ng'aleek keele ki po imanda? 3Tos kosilemji ng'aleeguk che puch piik alak? Ichotoi ak ko momi chii ne kogolilin? 4Amu imwae ile, ‘Tiliil kaneetisyennyu, ak atiliilit eng' taing'ung'.’ 5Ago kaigai, ngot kong'alaal Kamuktaindet, ak koyaat kutinnyi agaigai inyee, 6ak koboorun ung'otosyegap utaatyet— amu utaatyet ne po iman ko tinyei komoswek aeng'. Ingen anyun ile kacharunin Kamuktaindet che ming'in kosiir tengek ne nyoljin inyee. 7Tos imuuchi isyach tuguuk che loo che po Kamuktaindet? Tos imuuchi inyooru ole poochitu Ne po Kamuktaet? 8Torooreen kosiir kipsengwet—nee ne imuuchi iyai? Loo kosiir mestonogap meet—nee ne imuuchi ingen? 9Kakwaennywa ko koi kosiir ng'wony, ak paraa kosiir nyanjet. 10Ngot kosiirtoi ak kotuch, ak koguur koba irwogut, ng'oo ne imuuchi koweechi? 11Amu ingen ineendet piik che kingelelik; ye keerei yaityet, tos ma koaruchini? 12Ago koegu utaat chiito ne perber ye kisich moitap sigiryetap timiin koek chii. 13Ngot ichop muguleldang'ung' ak ichuul euneguk oriit ineendet, 14ngot komi tengekto eung'ung', isto, ak amat komeny yaityet emaisyeguk, 15Yeityo iman inaami taing'ung' parak, ago ma ililani; itonone iman ak ma iywei. 16Iutye nyalildang'ung', ibwaati ko uu peek che kagobata. 17Kolilyei saboondang'ung' kosiir asiista ne po tai; ak koek mesundeitonyi ko uu mornet. 18Imeng'iisyei eng' kaalyeet, amu mi kamang'unet; igeer komosweguk ak iru eng' kaalyeet. 19Iru ak ko momi chii ne iywaiywin, ak kocheeng' piik che chaang' chameet eng' inyee. 20Ago kotanui konyegap kiptengeginik; kobetyoten age tugul ne muuchi kochililye kobun icheek, ak kamang'unennywa ne agenge ko meet.”