Zofaru Agĩcookia

Zofaru nĩwe mũũru makĩria: Ayubu nĩaragia mũno, na Ngai ndamũherithĩtie o ta ũrĩa mahĩtia make maagĩrĩire. Eheria mehia hema-inĩ ciaku, nĩguo oiga, na muoyo waku nĩũkũgĩa ũtheri gũkĩra mũthenya gatagatĩ. Ũhoro ũcio nĩ wa ma biũ harĩ we, no aurĩĩra mũndũ ũtarĩ na ihĩtia.

Gĩcunjĩ 11.

Hĩndĩ ĩyo Zofaru ũrĩa Mũnaamathi agĩcookia atĩrĩ: “Ciugo ici nyingĩ ũũ-rĩ, nĩikwaga gũcookio? Mũndũ ũiyũirwo nĩ mĩario ũguo-rĩ, nĩagũtuuo mũndũ wa kĩhooto? Mĩario yaku ya tũhũ-rĩ, nĩĩgũkiria andũ arĩa angĩ? Nĩũgũkĩnyũrũria gũtarĩ mũndũ ũngĩgũconorithia? Amu wee uugaga atĩrĩ, ‘Ũrutani wakwa nĩ mũtheru, na niĩ ndĩ mũtheru maithoinĩ maku.’ No naarĩ korwo Ngai nĩangĩaria, akĩhingũra mĩromo yake agũũkĩrĩre, akĩkũguũrĩria hitho cia ũũgĩ—amu ũũgĩ wa ma ũrĩ mĩena ĩĩrĩ. Menya rĩrĩ atĩ Ngai nĩagũherithĩtie o hanini gũkĩra ũrĩa mehia maku magĩrĩirwo. No ũhote kũmenya maũndũ ma ndĩĩri ma Ngai? No ũhote kuona mũhaka wa Mwene-Hinya-Wothe? Marĩ igũrũ gũkĩra igũrũ—wee ũngĩĩka atĩa? Marĩ ndĩĩri gũkĩra mbĩrĩra—wee ũngĩmenya atĩa? Gĩthimi kĩamo nĩ kĩraaya gũkĩra thĩ, na nĩ kĩariĩ gũkĩra iria. Angĩkorwo nĩahĩtũkĩra, akohe mũndũ, na amwĩtĩre ciirainĩ, nũũ ũngĩmũhũndũra? Amu we nĩooĩ andũ a tũhũ; rĩrĩa oona waganu, githĩ ndangĩũrora? No mũndũ ũtarĩ na ũũgĩ agaatuĩka mũũgĩ rĩrĩa njaũ ya ndigiri ya gĩthaka ĩgaaciarwo ĩrĩ mũndũ. Ũngĩkorwo nĩũhaarĩirie ngoro yaku, na ũtambũrũkie mooko maku kũrĩ we, ũngĩkorwo wĩhia ũrĩ guokoinĩ gwaku, ũũte, na ndũkareke ũũru ũtũũre hemainĩ ciaku, hĩndĩ ĩyo ti-itherũ nĩũkooya ũthiũ waku, ũtarĩ na thoni; nĩũkarũgama wega na ndũgetigĩra. Nĩũkaariganĩrwo nĩ thĩĩna waku, ũũririkanaga taarĩ maaĩ marĩkĩtie gũtherera magathira. Muoyo waku nĩũgaakenga gũkĩra mũthenya barigici; nduma yaguo ĩgaatuĩka ta rũũciinĩ. Nĩũkaigua ũrĩ na thayũ, tondũ nĩ kũrĩ na kĩĩrĩgĩrĩro; nĩũkerorera mĩena yoothe na ũkome ũrĩ na ũgitĩri. Nĩũkakoma gũtarĩ mũndũ ũngĩgũtũmũthia, na andũ aingĩ nĩmagaacaria ũtugi waku. No maitho ma andũ arĩa aaganu nĩmakaaga hinya; kũũra guothe nĩgũkaamehera, na kĩĩrĩgĩrĩro kĩao kĩrĩa kĩmwe nĩ gũtua mĩhũmũ ya mũthia.”