Ayubu 11

11 ¹Ndipo Sofari Mnaamathi akajibu: ²"Je, mafuriko haya ya maneno yasijibiwe? Je, mtu aliyejaa maneno hivyo athibitishwe kuwa yu sahihi? ³Je, maneno yako matupu yawanyamazishe wengine? Je, utadhihaki bila mtu wa kukutia aibu? ⁴Kwa maana wasema, 'Mafundisho yangu ni safi, nami ni safi machoni pako.' ⁵Lakini laiti, kama Mungu angesema tu na kufungua midomo yake dhidi yako, ⁶na kukufunulia siri za hekima—kwa maana hekima ya kweli ina pande mbili. Basi ujue ya kuwa Mungu amekutoza kidogo kuliko hatia yako inavyostahili. ⁷Je, waweza kuvumbua mambo ya ndani ya Mungu? Je, waweza kuupata mpaka wa Mwenyezi? ⁸Ni ya juu kuliko mbingu—waweza kufanya nini? Ni ya kina kuliko kaburi—waweza kujua nini? ⁹Kipimo chake ni kirefu kuliko dunia na kipana kuliko bahari. ¹⁰Kama akipita na kufunga gerezani na kuita hukumuni, ni nani awezaye kumzuia? ¹¹Kwa maana yeye huwajua watu wasiofaa; aonapo uovu, je, hatauangalia? ¹²Lakini mtu mpumbavu atapata hekima punda-mwitu atakapozaa mtoto wa kibinadamu. ¹³Kama ukiutengeneza moyo wako na kuinyoosha mikono yako kumwelekea, ¹⁴kama dhambi imo mkononi mwako, iondoe, wala usiache udhalimu ukae hemani mwako, ¹⁵ndipo hakika utauinua uso wako, bila aibu; utasimama imara wala hutaogopa. ¹⁶Utaisahau taabu yako, ukiikumbuka kama maji yaliyokwisha kupita. ¹⁷Maisha yako yatang'aa kuliko adhuhuri; giza lake litakuwa kama asubuhi. ¹⁸Utakuwa salama, kwa sababu kuna tumaini; utatazama pande zote na kulala salama. ¹⁹Utalala bila mtu wa kukuogofya, na wengi watajipendekeza kwako. ²⁰Lakini macho ya waovu yatazimia; kila njia ya kuponyokea itawapotea, na tumaini lao pekee ni kutoa pumzi yao ya mwisho."