Zofari arishura
Zofari ararusha abandi gukarira: Yobu avuga cane, kandi Imana yamuhannye munsi y'ivyo icaha ciwe gikwiye. Kura icaha mu mahema yawe, ni ko avuga, maze ubuzima bwawe buzokwaka kurusha umutaga. Afise ukwizera kutagira amakenga, kandi ari kubibwira umuntu atagira icaha.
11 1Nuko Zofari Umunaamati arishura ati: 2“Mbega aya majambo menshi yoba atishurwa? Mbega umuntu yuzuye amajambo yoba yemezwa ko agororotse? 3Mbega amajambo yawe y’ubusa yoceceza abandi? Mbega uzotwenga ata n’umwe akumaramaza? 4Kuko uvuga uti: ‘Inyigisho zanje zeze, kandi ndi uwutyoroye imbere yawe.’ 5Ariko iyo Imana yovuga, ikagukingurira iminwa yayo ikakurwanya, 6ikakweretsa amabanga y’ubukerebutsi—kuko ubukerebutsi nyakuri bufise impande zibiri. Menya rero ko Imana yaguhannye bike kuruta uko icaha cawe gikwiye. 7Mbega woshobora gutahura ibintu vy’ubwiru vy’Imana? Mbega wogera aho Mushoboravyose agarukira? 8Biri hejuru kuruta amajuru—ni iki woshobora gukora? Biri munsi kuruta ikuzimu—ni iki woshobora kumenya? 9Ingero zavyo zirerire kuruta isi kandi zagutse kuruta ikiyaga. 10Niyaca akagufata akakugumiza mu munyororo, akaguhamagaza imbere y’urubanza, ni nde yomugarura inyuma? 11Kuko azi abantu b’ubusa; iyo abonye ibicumuro, mbega ntiyobyitaho? 12Ariko umuntu w’umupfu azohava aba inkerebutsi igihe akanyana k’indogoba yo mu gasozi kazovuka ari umuntu. 13Niwaba witegurije umutima wawe ukamuramvurira amaboko yawe, 14nimba igicumuro kiri mu kiganza cawe, ukikure, kandi ntureke ko akarenganyo kaba mu mahema yawe, 15uca wubura amaso yawe udafise iceyi; uzohagarara ushikamye kandi ntuzotinya. 16Uzokwibagira amagorwa yawe, uyibuke nk’amazi yamaze guhita. 17Ubuzima bwawe buzoca kuruta izuba ryo ku murango; umwiza wabwo uzoba nk’umutwenzi. 18Uzokwumva umerewe neza, kuko hariho icizigiro; uzoraba hirya no hino maze uryame amahoro. 19Uzoryama ata n’umwe azogutinyisha, kandi benshi bazorondera ubutoni bwawe. 20Ariko amaso y’ababisha azohwera; uburyo bwose bwo guhunga buzobabura, kandi icizigiro cabo conyene ni uguhema umwuka wa nyuma.”
