Zopari Langzü
Zopar atangji kanga reprangba lir: Jobi o aika jembir, aser Tsüngremi pa tai temsüba nungi tilaba pa nem akangogo. “Nenok tenteta nungi tai adokang,” ta pai ashi, “anungji ali anüng tenari tepen tesangwa alitsü.” Pa pei o shitak ta atangji metet, aser pai tai makaba nisung ka dang shir.
11 1Idangji Naama nungba Zopari langzü, 2“Saka iba o aika telangzüba malitsü ma? O kanga jembiba nisung ka temeshi ta kuli agütsü ma? 3Ne o tazüng tangartem ola tatoktsü ma? Nai shinga na dang shamma mali alidang maksüdaktsür ma? 4Kechiaser nai ashir, ‘Kü tesayuba merükmerüka lir, aser ne tsüngdang ni meshiteta lir.’ 5Saka, ashiko Tsüngremi jembitsü, aser na anema pa tebangmechi lapoktsü, 6aser na dang tashitemetet miimtem sayutsü—kechiaser atangji tashitemetet tsüngda ana lir. Idangji Tsüngremi ne tai temsüa dang nungi tilaba ne nem akangtsü ta metetang. 7Nai Tsüngrem tarokbatem bushijemtsü ma? Nai Takoksang tatem bushitsü ma? 8Itemji anüng dang nungi temaba lir—nai kechi inyaktsü ma? Leper dang nungi tarokba—nai kechi metettsü ma? 9Iba tasadangba alima dang nungi talangba, aser tzüyim dang nungi tesadem lir. 10Pai süia aser tsüngden chiokdir aser o bendangtsü jar jembidir, shibai pa meyipadaktsü ma? 11Kechiaser pai tagidak makaba nisungtem metet; pai tamajung ngudang, pai aji mabilemdangtsü ma? 12Saka mulung tazüngba nisung ka temeteter akümtsü kodang arem gado chirji nisung agi sodir. 13Kodang nai ne mulung renem, aser pa dang ne teka mekangdir, 14kodang ne ket nung temenen lira, aji endokang, aser memeshibaji ne süki nung alitsü teli, 15idangji atangji nai ne tejak mekangtsü, aaka mali; nai akanga noktaka alitsü aser matsübutsü. 16Nai ne timtem mamatsü, ayim aoba tzü ama aji remertsü. 17Ne takümji anutzüng dang nungi sangwatiba alitsü; iba ammang anepdang ama alitsü. 18Nai kümzüka alitsü, kechiaser teimla lir; nai meketa reprangtsü aser tekümzük nung mejangtsü. 19Shinga na dang tsübudaktsüba mali-i nai mejangtsü, aser aikati na dang mepishitsü. 20Saka tamajunger tenükji melutsü; jenbutsü lenmang ajak parnok nungi tesamatsü, aser parnok teimlaji pa asütsüsa lir.”