Ng'wanindap muguleldo
Ye ng'alaalji Kamuktaindet komyee, teebei Job kole nee kalasunennyi. Euut che ki kiroong'ei ineendet ko uu cheego ak koolaachi poorto, chiirchini ineendet nguno ko uu ng'etuunyot. Soomei konygetai konyaa kwony kityo kotomo kowe emetap imenindo.
10 1“Kainyalili saboondanyu ineegei. Aletegei si komwa kalasunennyo; amwaitoi eng' ng'wanindap muguleldanyu. 2Aleenji Kamuktaindet: Amegikyiwo; koono anai amu nee ye iboryo ak anee. 3Tos iboiboiyin kousa piik, ak iees poisyetap euneguk, ago iboiboigei eng' kirwoogutigap kiptengeginik? 4Tos itinye koonyek che po panyeek? Tos ikeerei ko uu ye keerei chii ne ng'emaksei? 5Tos peetuusyeguk ko uu peetuusyegap chii ne ng'emaksei, anan kenyisyeguk ko uu kenyiisyegap chiito, 6si icheeng' yaityonyu ak icheeng'ji tengekto, 7agot ingen ile ma atinye tengek, ak ma mi chii ne imuuchi kosarwo eng' eung'ung'?
8“Kiyaiywo euneguk ak kitoiywo, kebeberta tugul nenyu, ago nguno iwendegei si ing'emwo. 9Ibwaat ile kiyaiywo ko uu ng'ung'unyek. Tos iweekwo nguno temburyek? 10Tos ma kiroong'wo ko uu cheego, ak iyaiywo kayamyo ko uu mugunigap cheego, 11kilaakwo oldo ak panyeek, ak kilewo kobooto kawek ak ng'useek? 12Kigoonwo saboon ak rireenet, ak kagoriip riibennyeng'ung' kabuusennyu.
13“Ago kiuny niito eng' muguleldang'ung', ak angen ile niito ko ki mageng'ung': 14Ngo ayai tengekto, igeerotio, ak ma istoiywo tengekto. 15Ngo atinye tengek, pwo eng' anee! Ak agot ngo ami imanda, maamuuchi ataach metinnyu—amu kaanyiit lelutyet, ak kaanyoorun nyalildanyu. 16Ngo atoreeti metit, icheeng'wo ko uu ng'etundo, ak iyai kora kwang'utik agobo anee. 17Iibwo paorinik che leel agobo anee, ak iroong'wo ates angeeng'ung'; keruutigap nyalilda che subaanegei koryee anee.
18“Amune anyun iibunwo eng' moennyu? Myee nda ki amee kotom koger anee konda age tugul. 19Ta ki aek ko uu ne ma ki abiit koigeny, ak ki kiiptoiywo iman eng' moennyu koba kererit. 20Tos ma ng'ering' peetuusyeguk? Weigei eng' anee, ipagaakto, si anyoor kagaigaet ne ng'ering', 21kotom awe ole ma kiweeksei, emetap mesundeito ak urwetap meet, 22emetap imenindo ko uu kemeututap keeme, ne po urwetap meet ak ne ma tinyei ortinwek, ole uu agot lapkeiyet ko uu mesundeito.”