約伯記 10

10 ¹「我對自己嘅生命感到厭煩。 我要盡情傾訴我嘅怨言; 我要出於心靈嘅苦澀嚟講話。 ²我要對神講: 唔好定 我嘅罪;等我知道你點解要同我相爭。 ³你欺壓人、 藐視你親手所造嘅, 同時又向惡人嘅詭計微笑,你係咪覺得咁樣好呢? ⁴你有肉身嘅眼睛咩? 你睇嘢好似世人咁睇咩? ⁵你嘅日子好似世人嘅日子咩, 你嘅歲月好似人嘅歲月咩, ⁶以致你要查究我嘅過犯,追尋我嘅罪呢? ⁷其實你知道我冇罪, 亦冇人可以將我由你手中救出嚟?

⁸「你親手塑造我、造成我,我每一部分都係你造嘅,而家你竟然轉過嚟毀滅我。 ⁹求你記住,你好似搓泥咁塑造我。 你而家要令我歸返塵土咩? ¹⁰你咪好似倒奶咁將我倒出嚟, 又好似結芝士咁令我凝結, ¹¹你俾皮同肉做衫俾我着, 又用骨同筋將我編織埋一齊咩? ¹²你賜俾我生命同慈愛,你嘅眷顧一直看顧我嘅靈。

¹³「不過你將呢啲藏喺你心裏面, 我知道呢個先係你嘅心意: ¹⁴如果我犯罪,你就會盯住我,唔會赦免我嘅過犯。 ¹⁵如果我有罪,我就有禍 喇!就算我無辜,我都唔敢抬起頭嚟——我滿身羞恥, 浸沒喺我嘅苦難裏面。 ¹⁶如果我昂起頭嚟, 你就好似獅子咁追捕我, 再一次向我施展奇異嘅作為。 ¹⁷你帶新嘅見證嚟控告我, 將更多嘅忿怒傾倒喺我身上; 一浪接一浪嘅患難攻擊我。

¹⁸「咁你當初做乜要令我出母腹呢? 我情願喺任何人見到我之前就死咗。 ¹⁹咁我就好似從來冇存在過一樣,一出母腹就直接被抬到墳墓。 ²⁰我嘅日子唔係好少咩? 求你離開我,唔好理我,等我可以有片刻嘅安慰, ²¹喺我去到嗰個一去不返嘅地方之前, 就係去到嗰片黑暗同死蔭嘅地, ²²去到嗰片好似漆黑深夜咁幽暗嘅地,充滿死蔭同混亂, 喺嗰度就連光都好似黑暗一樣。」