Ayubu 10

10 ¹"Nimeuchukia uhai wangu mwenyewe. Nitaachilia kilio changu kiende bila kizuizi; nitanena kwa uchungu wa nafsi yangu. ²Nitamwambia Mungu: Usinihukumu kuwa mwenye hatia; nijulishe kwa nini unashindana nami. ³Je, unafurahia kudhulumu, kuidharau kazi ya mikono yako, huku ukiitabasamia mipango ya waovu? ⁴Je, wewe una macho ya nyama? Je, wewe waona kama binadamu aonavyo? ⁵Je, siku zako ni kama siku za binadamu, au miaka yako ni kama miaka ya mtu, ⁶hata ukatafute uovu wangu na kuwinda dhambi yangu, ⁷ingawa unajua ya kuwa mimi si mwenye hatia, wala hakuna awezaye kuniokoa kutoka mkononi mwako?

⁸"Mikono yako ilinifinyanga na kunifanya, kila sehemu yangu, na sasa wageuka na kuniangamiza. ⁹Kumbuka ya kuwa ulinifinyanga kama udongo. Je, sasa utanirudisha mavumbini? ¹⁰Je, hukunimimina kama maziwa na kunigandamiza kama jibini, ¹¹ukanivika ngozi na nyama, na kuniunga pamoja kwa mifupa na mishipa? ¹²Ulinipa uhai na upendo wa agano, na uangalizi wako umeilinda roho yangu.

¹³"Lakini uliyaficha haya moyoni mwako, nami najua ya kuwa hii ndiyo ilikuwa nia yako: ¹⁴kama ningetenda dhambi, ungekuwa ukiniangalia na usingeniachilia na hatia yangu. ¹⁵Kama mimi ni mwenye hatia, ole wangu! Na hata kama sina hatia, siwezi kuinua kichwa changu—nimejaa aibu, nimezama katika mateso yangu. ¹⁶Kama nikiinua kichwa changu juu, unaniwinda kama simba na tena wafanya maajabu dhidi yangu. ¹⁷Waleta mashahidi wapya dhidi yangu na kumwaga zaidi ya ghadhabu yako juu yangu; wimbi baada ya wimbi la taabu lanishambulia.

¹⁸"Kwa nini basi ulinitoa tumboni? Ningetamani ningekufa kabla ya jicho lolote kuniona. ¹⁹Ningekuwa kama vile sikuwahi kuwako kamwe, nikichukuliwa moja kwa moja kutoka tumboni hadi kaburini. ²⁰Je, siku zangu si chache? Niachie mbali nami, niache peke yangu, ili nipate muda kidogo wa faraja, ²¹kabla sijaenda mahali pasipo na kurudi, hadi nchi ya giza na kivuli kizito, ²²hadi nchi ya utusitusi kama usiku wa manane, ya kivuli kizito na machafuko, ambako hata nuru ni kama giza."