Ɗacin Rai

Yana magana kai tsaye da Allah, Ayuba ya tambaya mene ne laifin da ake tuhumarsa da shi. Hannayen da suka zuba shi kamar madara suka sa masa fata kamar tufa yanzu suna farautarsa kamar zaki. Abin da kawai yake roƙo shi ne a ƙyale shi ɗan lokaci kafin ya tafi ƙasar duhu.

Babi na 10.

“Na gaji da raina. Zan saki kukana; zan yi magana daga ɗacin raina. Zan ce wa Allah, Kada ka hukunta ni; ka sanar da ni dalilin da ya sa kake gāba da ni. Yana ba ka daɗi ne ka yi zalunci, ka rena aikin hannuwanka yayin da kake murmushi ga makircin mugaye? Kana da idanun jiki ne? Kana gani kamar yadda mutum yake gani ne? Kwanakinka kamar kwanakin mutum ne, ko shekarunka kamar shekarun mutum ne, har da za ka bincika laifina kana farautar zunubina, ko da yake ka san ni ba ni da laifi, kuma babu wanda zai iya cetona daga hannunka?

“Hannuwanka ne suka tsara ni suka kuma halicce ni, kowane sashe na jikina, yanzu kuma ka juya don ka hallaka ni. Ka tuna cewa ka mulmula ni kamar yumɓu. Yanzu kuwa za ka mai da ni turɓaya ne? Ba ka zuba ni kamar madara ka kuma daskarar da ni kamar cuku ba, ka tufatar da ni da fata da nama, ka kuma saƙa ni da ƙasusuwa da jijiyoyi? Ka ba ni rai da ƙaunar alkawari, kulawarka kuma ta kiyaye ruhuna.

“Amma duk da haka ka ɓoye wannan a zuciyarka, na kuma san cewa wannan ne nufinka: In na yi zunubi, za ka dinga kallona, ba kuwa za ka kuɓutar da ni daga laifina ba. In ina da laifi, kaito gare ni! Ko da ba ni da laifi ma, ba zan iya ɗaga kaina ba—na cika da kunya, na nutse cikin wahalata. In na ɗaga kaina sama, sai ka farauce ni kamar zaki ka kuma sāke aikata al'ajabi a kaina. Kana kawo sababbin shaidu a kan ni, kana kuma ƙara zubo fushinka a kaina; igiyar wahala bi da bi tana kawo mini hari.

“To me ya sa ka fitar da ni daga cikin mahaifa? Da ma na mutu kafin wani ido ya gan ni. Da na kasance kamar ban taɓa kasancewa ba, an ɗauke ni kai tsaye daga mahaifa zuwa kabari. Ba kaɗan kwanakina suke ba? Ka kawar da kanka daga gare ni, ka rabu da ni, don in sami ɗan lokacin jin daɗi, kafin in tafi wurin da ba a dawowa, zuwa ƙasar duhu da inuwa mai zurfi, zuwa ƙasar baƙin duhu kamar zurfin dare, ƙasar inuwa mai zurfi da hargitsi, inda har haske yake kamar duhu.”