Ningwui Kakhā
Vareli thukhaka hāngda, Jobna khiwui khayonkhala da ngahānkhui. Seina̱ thāda ili heishokta ahui eina farormi pāng chi arui kazingkha̱ thāda ili khuda leia. Tangkhamanga ngaleili mavālakha, thangkha ili kayākha horhaimilu da mangā phāa.
10 1"Iwui mirin ina sānhaira. Iwui maringkaphā ina ningkhān eina phongshokra; iwui ningwui kakhālungli eina ina matuira. 2Ina Vareli hāngra: Ili mayonngasakalu; khisāda nana ili ngahānkhala kaji ili theingasakmilu. 3Makhayābingwui khangarānli na mathān tharan, mi chotchāng ngasak kala napāngwui ot ningkachai khavai nali ningyāng ungla? 4Nali asāwui mik leila? Mi thei thāda nana theila? 5Nawui zimiksho chi miwui zimiksho thālā, lah nawui zingkum chi mikumowui zingkum thālā, 6chithāda nana iwui khayonkhamāng phāda, iwui morei phāzatta, 7I khayon makhaleiana da nana theihailala, kala napāng eina ili kankhavai khipākha maleimana?
8"Napāngna ili shaphailaga sāhaira, iwui akai saikora, kha ara nana ngalanluida ili sāshimānhaora. 9Nana ili leikhon thāda hamsā kahaina da phaningunglu. Ara nana ili chifali sāthuilui ngasakra? 10Nana ili seina̱ thāda heitha̱ mihaimala, kala zangda thāda ili sāhaimala, 11ahui kala asā eina ili ngavaimihaida, kala ara̱ kala sha̱ra̱ eina ili rakkhui mihaira? 12Nana ili kharing kala lukhamashan mihaira, kala nawui phaningmi imanglā phārimihaira.
13"Kha nana hi nawui ningli achuiphumhaowa, kala hi nawui khangarān kahaina da ina thei: 14Ina morei saakha, nana ili rimpamda, iwui khayon eina ili machihomimara. 15I khayon kahaiakha, kakhanang iwui ngasāranu! Kala I khayon makhaleiakhala, iwui kui ina reingasaka mararmana; maikashina ili pemtinghaira, iwui kachotkachāngli ya̱sophaira. 16Iwui kui ina reingasakakha, nana ili kazingkha̱ thāda phāzata, kala iwuitungli matakhak kahai ot latluida sāhaira. 17Nana iwuitungli shākhi khaya̱bing khuirāda, kala nawui malungkhavāt chungkhana ili phanrā ngasakta; kakhanangwui tara̱na tara̱ ili phanrāhaira.
18"Chithākha khisāda nana ili naopamwui eina khuishokhaokhala? Mik khipākhana ili matheiranglakha eina tangda I thihairasai kaja teokha phāralā. 19I maleilakranga kaji thāda ngasāra, naopamwui eina angatar eina chikhurli khuivāhaira. 20Iwui atam kasha̱khamang maningmarala? Ili mayangrālu, iningkhānhaoga, chieina ina hunkha ning lum samphangkhavai, 21ina malatungluiki kaji apamli mavāranglakha eina tangda, tangkhamang kala tangmangting kahai ngaleili, 22tangmangting kahai ngayā thāda khangami, tangmangting kala pa̱khangapā khalei ngaleili, kahorla tangkhamang thāhaira."
