Me basika na mukanda
Dibuku

Ndudi ya mwela

Na kutuba mbala mosi na Nzambi, Yobi ke yufula inki kele dyambu ya kufundisa. Maboko yina basisaka yandi bonso miliki mpe lwatisaka yandi mpusu ntangu yayi ke sosa yandi bonso nkosi. Yandi ke lomba kaka na kubikala yandi mwa ntangu na ntwala yandi kwenda na yinsi ya kitombe.

Kapu 10.

«Mu me yina luzingu ya munu mosi. Mu ke yambula kudila ya munu na kimpwanza; mu ke tuba na ndudi ya mwela ya munu. Mu ke tuba na Nzambi: Kufundisa munu ve; bika mu zaba samu na yinki nge ke swana ti munu. Yawu ke pesa nge kyese na kunyokola, na kuvweza kisalu ya maboko ya nge, ntangu nge ke tala mabanza ya bantu ya yimbi na kyese? Keti nge kele na meso ya nsuni? Keti nge ke tala mutindu muntu yina ke kufwaka ke talaka? Keti bilumbu ya nge kele mutindu bilumbu ya muntu yina ke kufwaka, to bamvula ya nge kele mutindu bamvula ya muntu, samu ti nge ke sosa yimbi ya munu mpe nge ke landa disumu ya munu, ata nge zaba ti mu kele ve na disumu, mpe muntu mosi kele ve yina lenda kuula munu na maboko ya nge?

«Maboko ya nge yidikaka munu mpe salaka munu, konso ndambu ya munu, mpe ntangu yayi nge ke baluka mpe ke bebisa munu. Yibuka ti nge yidikaka munu mutindu ntoto ya kiteko. Keti ntangu yayi nge ke vutula munu na fundu-fundu ya ntoto? Keti nge basisaka munu ve mutindu miliki mpe nge kangisaka munu mutindu folomaze, nge lwatisaka munu mpusu mpe nsuni, mpe nge tungaka munu kumosi na mikwa mpe sine? Nge pesaka munu luzingu mpe luzolo ya ngwisani, mpe lukengolo ya nge me keba mpeve ya munu.

«Kasi nge bumbaka dyambu yayi na ntima ya nge, mpe mu zaba ti yawu vwandaka lukanu ya nge: kana mu salaka disumu, nge zolaka vwanda ke tala munu mpe nge zolaka kunungisa munu ve na disumu ya munu. Kana mu kele na disumu, kyadi na munu! Mpe ata mu me sala yimbi ve, mu lenda ve na kunanguna ntu ya munu—mu me fuluka na nsoni, mpasi ya munu me fuka munu. Kana mu nanguna ntu ya munu, nge ke landa munu mutindu nkosi mpe nge ke sala dyaka bimangu ya nge na munu. Nge ke nata bambangi ya mpa na munu mpe nge ke mwangisa makasi ya nge mingi na zulu ya munu; bitembo na bitembo ya mpasi ke nwanisa munu.

«Samu na yinki nge basisaka munu na kivumu? Mu zolaka kufwa ntete disu mosi tala munu. Mu zolaka kuvwanda bonso mu vwandaka ata ntangu mosi ve, bawu nataka munu mbala mosi katuka na kivumu tii na ndyamu. Keti bilumbu ya munu kele fyoti ve? Katuka na munu, bika munu mpamba, samu ti mu baka mwa ntangu ya mbombolo, na ntwala mu kwenda na kisika yina muntu ke vutukaka ve, na yinsi ya mpimpa mpe ya kitombe ya nene, na yinsi ya dituti ya ndombe mutindu mpimpa ya nene kibeni, ya kitombe ya nene mpe ya mavwanga, kuna ata nsemo kele mutindu mpimpa.»