ኢዮብ 10 FHB Father's Heart Bible™

10 ¹“ብህይወተይ ፀሊአ ኣለኹ። ንጥርዓነይ ሓራ ክሓድግ እየ፤ ካብ ምረት ነፍሰይ ክዛረብ እየ። ²ንእግዚኣብሄር ከምዙይ ክብሎ እየ፦ ኣይትኹንነኒ፤ ስለ ምንታይ ከም እትማጐተኒ ኣፍልጠኒ። ³ምግፋዕ፥ ንግብሪ ኣእዳውካ ምንዓቕ፥ ኣብ ምኽሪ ሓጥኣን ከዓ ፍሽኽ ምባል ደስዶ ይብለካ? ⁴ዓይኒ ስጋ ኣለካዶ? ከም ሰብ መዋቲ ዝሪኦ ዲኻ እትርኢ? ⁵መዓልቲታትካዶ ኸም መዓልቲታት መዋቲ ሰብ እየን፥ ዓመታትካዶ ኸም ዓመታት ሰብ እየን፥ ⁶በደለይ ክትደሊ፥ ሓጢኣተይ ከዓ ክትሃድን፥ ⁷በደለኛ ኸም ዘይኮንኩ እናፈለጥካ፥ ካብ ኢድካ ዘድሕነኒ ከዓ የለን።

⁸“ኣእዳውካ ንኵሉ ኣካላተይ ቀሪፀን ገበረኒ፤ ሕዚ ግና ተመሊስካ ተጥፍኣኒ ኣለኻ። ⁹ከም መሬት ከም ዝቐረፅካኒ ዘክር። ሕዚኸ ናብ ሓመድ ክትመልሰኒ ዲኻ? ¹⁰ከም ፀባ ኣይከዓኽኒንዶ፥ ከም ጅባና ኸዓ ኣይኣረጋእኻንን? ¹¹ቘርበትን ስጋን ከደንካኒ፥ ብኣዕፅምትን ጅማውትን ከዓ ኣለምካኒ? ¹²ህይወትን ምሕረትን ሃብካኒ፤ ሓልዮትካ ኸዓ ንመንፈሰይ ሓለወ።

¹³“ይኹን እምበር ነዙይ ኣብ ልብኻ ሓባእካዮ፥ እዙይ ናትካ ሓሳብ ምንባሩ ኸዓ እፈልጥ እየ፦ ¹⁴እንተ ሓጢአ፥ ትዕዘበኒ ኔርካ፤ ካብ በደለይ ከዓ ነፃ ኣይተውፅኣንን ኔርካ። ¹⁵በደለኛ እንተ ኾይነ፥ ወይለይ! ንፁህ እኳ እንተ ኾንኩ፥ ርእሰይ ከልዕል ኣይኽእልን እየ፤ ብሕፍረት ተመሊአ፥ ኣብ መከራይ ጥሒለ ኣለኹ። ¹⁶ርእሰይ ላዕሊ እንተ ኣልዒለ፥ ከም ኣንበሳ ትሃድነኒ፤ መሊስካ ኸዓ ኣባይ ተኣምራት ትገብር። ¹⁷ሓደስቲ መሰኻኽር ኣባይ ተምፅእ፥ ናትካ መዓት ከዓ ኣባይ ተፍስስ፤ ማዕበል መከራ ከዓ ተደጋጊሙ ይወቕዓኒ።

¹⁸“እምበኣር ስለ ምንታይ ካብ ማህፀን ኣውፃእካኒ? ዝኾነ ዓይኒ ከይረኣየኒ ከለኹ ምሞትኩ ኔረ። ¹⁹ከም ዘይተፈጠርኩ ኾይነ ምኾንኩ፥ ካብ ማህፀን ናብ መቓብር ቀጥ ኢለ ምተወሰድኩ ኔረ። ²⁰መዓልቲታተይ ውሑዳት ኣይኮናንዶ? ካባይ ኣግልስ፥ ሕደገኒ፥ ቅሩብ ጊዜ ምእንቲ ኽፀናናዕ፥ ²¹ናብቲ ዘይምለሰሉ ቦታ ከይከድኩ ከለኹ፥ ናብታ ፀልማትን ድቕድቕ ፅላሎትን ዘለዋ ምድሪ፥ ²²ናብታ ኸም ድቕድቕ ለይቲ ጣቓ ዝመልኣ፥ ድቕድቕ ፅላሎት ዘለዋ፥ ዕግርግር ዝመልኣ፥ ብርሃን እኳ ከም ፀልማት ዝኾነ ምድሪ።”