Soushou Khauekbü

Mühghaü to the joyojinei, Jobei kü maangsak ngüh ai ki dogo phekei. Milka tegü hao buan phobü hoba khonei hao küplepbü ik shuongei touje hao to meisiau tangbü tegü shieida. Haoei mühyaak kaodak to haubü shaang, shisho phenan hao along leilushi dogo phe alongda.

Chapter 10.

“Ngo kü langkei to shatda. Ngei kü maangsak ngüh jembü litilabü; ngei kü soushou khauekbü ka joyolabü. Ngei Mühghaü to laulabü, Ngo teyukti; nyi ngo khulimbo aila tokyoko kho kü la lenbüma. Khon akula, kaibü ik kümsilei mangsenda nyi olinda sai, hoba amaibü shuongeibü lapheishon ae nyi maangshikbü chühda? Nyi phe nyek kia lo? Haibü mütei hapbü tegü nyi hapda sai? Kaibü chalou shuong haibü müteibü chalou tegü kia sai, ayingsi kaibü salang shuong müteibü salang tegü kia, nyi kü shedbü lamda hoba kü shabü shieida, ngo shed ashonko ki dogo nyi ngeasikei, hoba kaibü ik ka ngo khümenlabü müt aki?

“Kaibü ikei ngo yaükei hoba kümbei, kü mang pendou; lausikei tou nyi sepeian ngo mautila. Nyi ngo thamchak tegü kümbei dogo damenashi. Nyi tou ngo thamngu to sepeitilabü sai? Nyi ngo sendei tegü ajinbei, hoba haabü onbü tegü ngo akümbo, khon si phe nei ngo ayukkubei, hoba lo hoba mang nei ngo atakbei lo? Nyi kü la langkei hoba üeisanou kukei, hoba kaibü chühenbü-ei kü soushou pangtei thounoukei.

“Lausikei nyi hibü kaibü maangpona huan phokei, hoba ho kaibü nyekchüh kikei dogo ngei ngea: Ngo shabü shonalonga, nyi ngo chühko kilabü, hoba kü shedbü ka ngo mat amaitilabü. Ngo shedbü kialonga, kü shanga ügütü! Hoba ngo shed ashonko kiasikei, ngo kü khua phonla athük—ngo himouei jakakei, kü khonsaka senetan kikei. Ngo kü khua phoalonga, nyi molosaonyu tegü ngo shieida, hoba kü khulimbo tongde seikümseilei kümda. Nyi kü khulimbo haanbü aukabü shuong sungbada, hoba kaibü khauang lotbü kü thüka tongde jinda; khonsak lason tongde tongde ngo to wapyoda.

Tou nyi aila ngo nasetshang ka leilangtikei? Nyek cheei ngo mohapjinei ngo haikei tegükei maikhoulabü. Ngo ongkei akitei tegü ong kikhoulabü, nasetshang ka hee to tangsheitham leibakei. Ngeibü chalou shisho ong aying lo? Kü jungka sepeiashi, ngo alongei apyoashi, khoei ngo shisho hakso haplabü, Ngo sepeinyu alongeilabü kaonyek to, nakthüh hoba yemkao yaangbü kaonyek to mohaujinei, nakshounaknyu nangnak tegü mühyaak kibü kaonyek to, yemkao yaangbü hoba takletbü akibü, kho kaonyeka ngesakbü tokei nakthüh tegü ki.”