Job 10 FHB Father's Heart Bible™

10 ¹“Akpọrọ m ndụ nke m asị. Aga m ahapụ mkpesa m ka o nwere onwe ya; aga m ekwu okwu site nʼilu nke mkpụrụobi m. ²Aga m asị Chineke: Amala m ikpe; mee ka m mara ihe kpatara i ji na-ese m okwu. ³Ọ na-atọ gị ụtọ imegbu mmadụ, ịkpọ ọrụ aka gị asị mgbe ị na-amụ ọchị nʼatụmatụ ndị ajọ omume? ⁴Ị nwere anya nke anụ ahụ? Ị na-ahụ ụzọ dịka mmadụ efu si ahụ? ⁵Ụbọchị gị ọ dị ka ụbọchị mmadụ efu, ka afọ gị ha dị ka afọ nwoke, ⁶nke mere na ị ga-achọpụtarịrị ikpe ọmụma m ma na-achụso mmehie m, ⁷ọ bụ ezie na ị maara na ikpe amaghị m, ọ dịghịkwa onye pụrụ ịnapụta m nʼaka gị?

⁸“Aka gị kpụrụ m ma mee m, akụkụ ọ bụla nke m, ma ugbu a ị tụgharịala bibie m. ⁹Cheta na i ji ụrọ kpụọ m. Ị ga-eme ka m laghachi nʼaja ugbu a? ¹⁰Ọ bụ na i wụpụghị m dịka mmiri ara ehi, mee ka m kwakọọ dịka chiiz, ¹¹i jiri akpụkpọ ahụ na anụ ahụ yikwasị m uwe, jirikwa ọkpụkpụ na akwara dụkọọ m ọnụ? ¹²I nyere m ndụ na ịhụnanya ọgbụgba ndụ, nlekọta gị echekwaalakwa mmụọ m.

¹³“Ma i zoro nke a nʼobi gị, amaarakwa m na nke a bụ nzube gị: ¹⁴ọ bụrụ na m mehie, ị ga na-ele m anya, ị gaghịkwa agbaghara m ikpe ọmụma m. ¹⁵Ọ bụrụ na ikpe maara m, ahụhụ dịịrị m! Ọ bụladị ma ọ bụrụ na aka m dị ọcha, enweghị m ike iwelite isi m—ihere jupụtara m, nsogbu m na-emikpu m. ¹⁶Ọ bụrụ na m welite isi m elu, ị na-achụ m dịka ọdụm, na-emekwa ọrụ ebube megide m ọzọ. ¹⁷Ị na-eweta ndị akaebe ọhụrụ megide m, na-awụsakwa m iwe gị karịa; ebili mmiri nsogbu na-esochi ibe ya na-adakwasị m.

¹⁸“Gịnị mere i ji mepụta m site nʼakpanwa? Ọ gaara akara m mma ma a sị na m nwụrụ tupu anya ọ bụla ahụ m. ¹⁹Agaara m adị ka a ga-asị na adịtụbeghị m, e si nʼakpanwa buru m ọtọ gaa nʼili. ²⁰Ọ bụ na ụbọchị m adịghị ole na ole? Wepụ onwe gị nʼebe m nọ, hapụ m naanị m, ka m nwee obere oge nkasiobi, ²¹tupu m gaa nʼebe a na-adịghị esi alọta, nʼala ọchịchịrị na oke onyinyo, ²²nʼala ọchịchịrị dị ka oke abalị, ala oke onyinyo na ọgbaghara, ebe ọ bụladị ìhè dị ka ọchịchịrị.”