Hiak swak thang rwe
Chongdip

Katha Kakhaanu

Rikrwang khou ri takka kabiaga, Job na koi ding pa-aambo diga ngaiye. Ating ding sen kanu tui danga pi lwang swakluga sa khaang bina pi dam thangnu Bakut gana, atunba takhu danga maan ding kai thou dam nge. Zingnu khatle kathi taram la se mak basaan, titcha kaan lang maan toza hoi thang ngo diga maanna ngaiye.

Bung 10.

“Ei aom ringnu ding balaaye. Aom kakounu chong ga chat makka rinlune; akatha kakhaanu bina ei rin swaklune. Rikrwang khou ei rinlune, Ating pi koi mako; nangna ei le pa-aam lang kae ongnubo diga ating pi thei thangro. Mi ding gotnu khatle nakut om chwan ding balaanu nang pi pemnu gabo? Atiga sa maknu mi nun om rang thangnu chung bi nang banuinu gabo? Nang ding sa om mik ambo? Thi zanu misa na munu danga nang mubo? Naom khwa bing ga thi zanu misa om khwa bing danga ambo, mak tabe nakum bing ga misa om kum bing danga ambo, atiga nangna ating koi ding zong swakluga aom noh ding zong koi ongnu lang ambo, Ei koi make diga nangna theinu thou, khatle nakut bina ating kan thang ngamnu pakhatchale maake.

“Nakut na ating cha thangluga dam thang rwe, apum om naat bingza, atiyeda atunba nang kaneiluga ating braan thanglune. Nangna ating talei danga bacha thang rwe diga ning thouro. Atunba ating kaphut bi pi swanlanrubo? Nangna ating sen kanu tui danga pi lwang swak thang makpo, khatle sen tui tat danga ating pi tat thang rwe, Ating pum tamun le zanti na pon thangluga, ru le sa khaang bina ating pi dam thang rwe. Nangna ating ringnu khatle chonghen kathan kriangnu pi lang za thang rwe, khatle naom banang thangnuna akatha ding phaang ong rwe.

“Atiyeda heiba nang sung bi nang inkam thang rwe, khatle heiya naom baning gaye diga ei theiye: Ei noh to rwe dabe, nangna ating phaang ongluga akoi ding pi kok thanglaye. Ei koi amme dabe, ating riangre amlune! Khatle ei koi make dabe le, alu ding ei kai basaang ka ngam make; ei kazaknu bina sip tam ongluga ariangre kanangnu bina pi hwam lem ong rwe. Ei alu kai basaang ka rwe dabe, nangna takhu krwang danga ating zong koi ongme khatle ating rou langna badannu chwan bing latlan tonuwe. Nangna ating rou langna sake kathan rwan pi hung tang nge khatle ating chung bi naom balung pwannu inkuga bunta nge; riangre om tuikoi bing khat nung khatna ating chung bi hung zwang nge.

“Atiga nangna pa-aam lang ating bon sung bina pi swak thangnubo? Mik khatchanale ating mu mak balei ei thi ngaak rwe dabe ei pem dingnuwe. Ei am mak ngaaknu danga ong ngaak lune, bon sung bina chuk chuk ka kathi ram bi ating pi phun thou thang rwe. Aom khwa bing ga titcha make gabo? Ating khouna kanei thouro, ei khatcha ting pi ta thangro, atiga ei chwandon titcha ding ka lousu lang nge, Han hung lat maknu riak bi, kazingnu khatle thinu lim katopnu talei ram bi ei se mak balei, katopnu zingnu danga lim thinu, thinu lim khatle kahung kaba thei maknu talei ram bi, habei ga baan le kazingnu danga ong rwe.”