Hiob 11 FHB Father's Heart Bible™

11 ¹Afei Naamatni Sofar buae se: ²“Ɛsɛ sɛ nsɛm bebree a ɛte sɛ nsuyiri yi kɔ a obiara mmua? Ɛsɛ sɛ wobu onipa a ɔkasa dodo saa bem? ³Ɛsɛ sɛ wo nsɛm hunu no ma afoforo yɛ dinn? Wobɛdi fɛw a obiara remma wʼani nwu? ⁴Efisɛ woka se, ‘Me nkyerɛkyerɛ yɛ kronn, na me ho tew wʼanim.’ ⁵Nanso ao, anka mepɛ sɛ Onyankopɔn bɛkasa na wabue nʼano atia wo, ⁶na wada nyansa ahintasɛm adi akyerɛ wo— efisɛ nyansa ankasa wɔ afa abien. Enti hu sɛ Onyankopɔn abu wo fɔ a ɛsua sen sɛnea wo bɔne fata. ⁷Wobɛtumi ahu Onyankopɔn nsɛm a emu dɔ no ase? Wobɛtumi ahu Otumfoɔ no ano? ⁸Ɛkorɔn sen ɔsoro— dɛn na wobɛtumi ayɛ? Emu dɔ sen damoa—dɛn na wobɛtumi ahu? ⁹Ne susuw ware sen asase, na ɛtrɛ sen po. ¹⁰Sɛ ɔfa hɔ na ɔde obi to afiase na ɔfrɛ no ba atemmu mu a, hena na obetumi asiw no kwan? ¹¹Efisɛ onim nnipa hunu; sɛ ohu bɔne a, ɔrenhyɛ no nsow anaa? ¹²Nanso onipa a ne tirim hunu no bɛyɛ onyansafo bere a wɔbɛwo wuram afurum ba sɛ onipa no. ¹³Sɛ wosiesie wo koma na wotrɛw wo nsa kyerɛ no, ¹⁴sɛ bɔne wɔ wo nsa mu a, yi fi hɔ, na mma ntɛnkyea ntena wo ntamadan mu, ¹⁵ɛno de, ampa ara wobɛma wʼanim so a wʼani nwu; wobɛgyina pintinn, na worensuro. ¹⁶Wo werɛ befi wo amanehunu, na wobɛkae no sɛ nsu a asen akɔ. ¹⁷Wo nkwa ani bɛtew sen owigyinae; ne sum bɛyɛ sɛ anɔpa. ¹⁸Wo ho bɛtɔ wo, efisɛ anidaso wɔ hɔ; wobɛhwɛ wo ho hyia, na woada a wo ho dwo wo. ¹⁹Wobɛda a obiara remma wo nsuro, na nnipa bebree bɛpɛ wʼanim dom. ²⁰Nanso amumɔyɛfo aniwa bɛyɛ kusuu; wɔrennya guankɔbea biara, na wɔn anidaso koro pɛ ne sɛ wɔn home bɛtwa.”