ዘፀአት 5

5 ¹ከዚያም በኋላ ሙሴና አሮን ወደ ፈርዖን ሄደው፣ “የእስራኤል አባታችን እንዲህ ይላል፤ ሕዝቤ በምድረ በዳ በዓል ያከብሩልኝ ዘንድ ልቀቃቸው” አሉት።

²ፈርዖንም፣ “ድምፁን ሰምቼ እስራኤልን እንድለቅ እግዚአብሔር ማን ነው? እግዚአብሔርን አላውቀውም፤ እስራኤልንም አልለቅም” አለ።

³እነርሱም፣ “የዕብራውያን አባታችን ተገናኝቶናል፤ ለአባታችን መሥዋዕት እናቀርብ ዘንድ የሦስት ቀን መንገድ ወደ ምድረ በዳ እንሂድ፤ አለዚያ በመቅሠፍት ወይም በሰይፍ ይመታናል” አሉ።

⁴የግብፅ ንጉሥ ግን፣ “ሙሴና አሮን፣ ሕዝቡን ከሥራቸው ለምን ትጐትታላችሁ? ወደ ሥራችሁ ተመለሱ!” አላቸው። ⁵ፈርዖንም፣ “እነሆ፣ የምድሪቱ ሕዝብ አሁን በዝተዋል፤ እናንተም ከሥራ ልታሳርፏቸው ትፈልጋላችሁ!” አለ።

⁶ፈርዖንም በዚያኑ ዕለት የባሪያ ሹማምቱንና በሕዝቡ ላይ የተሾሙትን አለቆች እንዲህ ሲል አዘዘ፤ ⁷“እንደ ቀድሞው ሕዝቡ ለጡብ ገለባ አትስጧቸው፤ ሄደው ራሳቸው ገለባ ይሰብስቡ።

⁸እንደ ቀድሞው ያንኑ የጡብ ልክ ጣሉባቸው፤ አታሳንሱትም። ሰነፎች ናቸው፤ ስለዚህ ነው፣ ‘ሄደን ለአምላካችን መሥዋዕት እናቅርብ’ ብለው የሚጮኹት። ⁹በሰዎቹ ላይ ሥራውን አክብዱባቸው፤ እንዲሠሩበትና ለውሸት ቃል ትኵረት እንዳይሰጡ።”

¹⁰የባሪያ ሹማምቱና አለቆቹም ወጥተው ሕዝቡን፣ “ፈርዖን እንዲህ ይላል፤ ‘ከእንግዲህ ገለባ አልሰጣችሁም። ¹¹ሄዳችሁ ባገኛችሁበት ስፍራ ሁሉ ለራሳችሁ ገለባ ፈልጉ፤ ሆኖም ሥራችሁ ከቶ አይቀነስም’” አሏቸው። ¹²ስለዚህ ሕዝቡ ለገለባ ፍሳሽ ለመሰብሰብ በግብፅ ምድር ሁሉ ተበተኑ። ¹³የባሪያ ሹማምቱም፣ “ገለባ በነበራችሁ ጊዜ እንዳደረጋችሁት፣ የየዕለቱን ልካችሁን ጨርሱ” እያሉ ይወተውቷቸው ነበር። ¹⁴የፈርዖን የባሪያ ሹማምት የሾሙአቸው የእስራኤል አለቆችም ተደበደቡ፤ “ለምን እንደ ቀድሞው ትናንትም ሆነ ዛሬ የጡብ ልካችሁን አልጨረሳችሁም?” ተባሉ።

¹⁵ከዚያም የእስራኤል አለቆች መጥተው ወደ ፈርዖን እንዲህ ሲሉ ጮኹ፤ “አገልጋዮችህን ለምን እንዲህ ታደርጋለህ? ¹⁶ለአገልጋዮችህ ገለባ አይሰጥም፤ ይሁን እንጂ፣ ‘ጡብ ሥሩ!’ ይሉናል። እነሆ፣ አገልጋዮችህ ይደበደባሉ፤ በደሉ ግን የገዛ ሕዝብህ ነው” አሉ።

¹⁷ፈርዖንም፣ “ሰነፎች! ሰነፎች ናችሁ! ስለዚህ ነው፣ ‘ሄደን ለእግዚአብሔር መሥዋዕት እናቅርብ’ የምትሉት። ¹⁸አሁን ሂዱ፣ ሥሩ። ገለባ አይሰጣችሁም፤ ይሁን እንጂ ሙሉ የጡብ ልካችሁን ማስረከብ አለባችሁ” አለ።

¹⁹የእስራኤል አለቆችም፣ “የየዕለቱን የጡብ ልካችሁን አታሳንሱ” በተባሉ ጊዜ፣ በመከራ ውስጥ መሆናቸውን ተገነዘቡ። ²⁰ከፈርዖን ዘንድ በወጡ ጊዜ፣ ሊገናኟቸው ሲጠብቁ የነበሩትን ሙሴንና አሮንን አገኟቸው፤ ²¹እንዲህም አሏቸው፤ “እኛን ሊገድሉን ሰይፍ በእጃቸው በማስያዝ፣ በፈርዖንና በሹማምቱ ፊት የተጠላን እንድንሆን አድርጋችሁናልና አባታችን ይመልከታችሁ፤ ይፍረድባችሁም።”

²²ከዚያም ሙሴ ወደ አባታችን ተመልሶ እንዲህ አለ፤ “ጌታዬ አባት ሆይ፣ በዚህ ሕዝብ ላይ ለምን መከራ አመጣህ? እኔንስ ለምን ላክኸኝ?

²³በስምህ እናገር ዘንድ ወደ ፈርዖን ከሄድሁ ጀምሮ፣ በዚህ ሕዝብ ላይ ክፉ አድርጓል፤ አንተም ሕዝብህን ከቶ አላዳንህም።”