Eksodho 5 FHB Father's Heart Bible™

5 ¹Pakumala penepi, Mose na Aroni aenda kuna Farau mbalonga kuti: “Baba wathu wa Izarayeli asalonga tenepa: Lekani mbumba yanga iende toera kundicitira phwando n'thando.”

²Farau alonga kuti: “Mbani Mulungu, toera ine ndibvere fala yace mbandileka Izarayeli aende? Ine nkhabe kudziwa Mulungu, pontho nkhabe kuleka Izarayeli aende.”

³Iwo alonga kuti: “Baba wathu agumana na ife. Tilekeni tiende ulendo wa ntsiku zitatu n'thando toera kupereka ntsembe kuna Baba wathu, thangwi panango iye anatimenya na mliri peno na supada.”

⁴Mbwenye mambo wa Edjitu aatawira kuti: “Mose na Aroni, thangwi yanji musacosa mbumba pa basa yawo? Bwererani ku basa yanu!” ⁵Farau alonga kuti: “Onani, mbumba ya dziko iyi cincino ndi yizinji, mbwenye imwe musafuna kuti aleke kuphata basa!”

⁶Pa ntsiku ineyi ene, Farau apanga anyakutonga basa na akulu akuonera mbumba, mbaalonga kuti: ⁷“Lekani kupasa anthu uswa toera kucita njereza ninga pakutoma. Iwo ene asafunika kuenda kagumanya uswa.

⁸Perekani njereza zizinji ninga pakutoma; lekani kuzicepesa. Iwo ndi anyaulesi; ndi thangwi yace asakhuwa: ‘Tilekeni tiende kapereka ntsembe kuna Mulungu wathu.’ ⁹Nemesani basa kuna amuna, toera apitirize kuicita mbakhonda kutetekera mafala authambi.”

¹⁰Anyakutonga basa na akulu akuonera abuluka mbapanga anthu kuti: “Farau asalonga tenepa: ‘Nkhabe kudzakupasani pontho uswa. ¹¹Ndokoni mukagumane uswa wanu konsene kunaugumana imwe — mbwenye basa yanu nkhabe kudzacepeswa ata pang'ono.’” ¹²Na tenepo, anthu abalalika n'dziko yonsene ya Edjitu toera kugumanya mphuka m'mbuto mwa uswa. ¹³Anyakutonga basa akhapitiriza kuakakamiza, mbalonga: “Malisani basa yanu ya ntsiku na ntsiku, ninga mukhakhala na uswa.” ¹⁴Akulu akuonera a Aizarayeli, adaikhwa na anyakutonga basa a Farau toera kuaonera, amenywa mbabvundzwa kuti: “Thangwi yanji nee mwamalisa njereza zanu dzulo na lero, ninga pakutoma?”

¹⁵Penepo, akulu akuonera a Aizarayeli abwera mbakhuwira Farau kuti: “Thangwi yanji musacitira atumiki anu tenepa? ¹⁶Atumiki anu nkhabe kupaswa uswa, mbwenye asatipanga kuti: ‘Citani njereza!’ Onani, atumiki anu asamenywa, mbwenye mulando uli kuna anthu anu ene.”

¹⁷Farau alonga kuti: “Anyaulesi! Imwe ndimwe anyaulesi! Ndi thangwi yace musalonga kuti: ‘Tilekeni tiende kapereka ntsembe kuna Mulungu.’ ¹⁸Cincino ndokoni, phatani basa. Nkhabe kudzakupaswani uswa, mbwenye musafunika kupereka njereza zanu zonsene zakukwana.”

¹⁹Akulu akuonera a Aizarayeli aona kuti ali mu nyatwa pidapangwa iwo kuti: “Lekani kucepesa njereza zanu za ntsiku na ntsiku.” ²⁰Pidabuluka iwo kuna Farau, agumana Mose na Aroni akhadikhira toera kuagumana, ²¹mbaapanga kuti: “Baba wathu akuonani imwe, mbakutongani, thangwi imwe mwaticitisa kuti tinunkhe pamaso pa Farau na akulu ace, mukaikha supada m'manja mwawo toera kutipha.”

²²Penepo, Mose abwerera kuna Baba wathu mbalonga kuti: “Baba wanga Wankulu, thangwi yanji mwabweresa nyatwa kuna mbumba iyi? Thangwi yanji mwandituma?

²³Kubva pidaenda ine kuna Farau toera kulonga m'dzina yanu, iye acitira mbumba iyi pyakuipa, mbwenye imwe nee mwapulumusa mbumba yanu ata pang'ono.”