யாத்திராகமம் 5

5 ¹பின்பு மோசேயும் ஆரோனும் பார்வோனிடத்தில் போய், “இஸ்ரவேலின் எங்கள் பிதா சொல்லுகிறது என்னவென்றால்: வனாந்தரத்தில் எனக்குப் பண்டிகை கொண்டாடும்படி என் ஜனத்தைப் போகவிடு” என்றார்கள்.

²அதற்குப் பார்வோன், “நான் அவருடைய சத்தத்திற்குக் கீழ்ப்படிந்து இஸ்ரவேலைப் போகவிடும்படிக்கு தேவன் யார்? நான் தேவனை அறியேன், இஸ்ரவேலை நான் போகவிடமாட்டேன்” என்றான்.

³அதற்கு அவர்கள், “எங்கள் பிதா எங்களைச் சந்தித்தார். நாங்கள் வனாந்தரத்தில் மூன்று நாள் பயணம்போய் எங்கள் பிதாவுக்குப் பலியிடும்படி விடும்; இல்லாவிட்டால் அவர் கொள்ளைநோயினாலோ பட்டயத்தினாலோ எங்களை வாதிப்பார்” என்றார்கள்.

⁴எகிப்தின் ராஜாவோ அவர்களை நோக்கி, “மோசே, ஆரோன், நீங்கள் ஜனங்களை அவர்கள் வேலையைவிட்டு ஏன் விலக்குகிறீர்கள்? உங்கள் வேலைகளுக்குப் போங்கள்” என்றான். ⁵பின்னும் பார்வோன், “இதோ, தேசத்தின் ஜனங்கள் இப்பொழுது அநேகராயிருக்கிறார்கள்; நீங்களோ அவர்களை வேலையை நிறுத்தச் செய்கிறீர்கள்” என்றான்.

⁶அன்றையதினமே பார்வோன் ஜனங்களை ஆளும் ஆளோட்டிகளுக்கும் அவர்கள்மேலுள்ள தலைவர்களுக்கும் கட்டளையிட்டதாவது: ⁷“செங்கல் அறுக்கும்படி ஜனங்களுக்கு முன்போல வைக்கோலைக் கொடாதேயுங்கள்; அவர்கள்தானே போய்த் தங்களுக்கு வைக்கோல் சேர்த்துக்கொள்ளட்டும்.

⁸ஆனாலும் முன்பு அவர்கள் செய்துவந்த செங்கலின் அளவையே அவர்களிடத்தில் கேளுங்கள்; அதில் ஒன்றும் குறைக்கவேண்டாம். அவர்கள் சோம்பேறிகள்; ஆகையால்தான், ‘நாங்கள் போய் எங்கள் தேவனுக்குப் பலியிடுவோம்’ என்று கூக்குரலிடுகிறார்கள். ⁹அந்த மனிதர்மேல் வேலையைப் பாரமாக்குங்கள்; அப்பொழுது அவர்கள் அதிலே முயற்சிசெய்து, பொய்வார்த்தைகளுக்குச் செவிகொடாதிருப்பார்கள்” என்றான்.

¹⁰அப்பொழுது ஜனங்களை ஆளும் ஆளோட்டிகளும் தலைவர்களும் புறப்பட்டுப்போய் ஜனங்களை நோக்கி, “பார்வோன் சொல்லுகிறதாவது: ‘நான் உங்களுக்கு வைக்கோல் கொடேன்.’ ¹¹நீங்கள் போய், உங்களுக்கு வைக்கோல் எங்கே கிடைக்கிறதோ அங்கே தேடி எடுத்துக்கொள்ளுங்கள்; ஆனாலும் உங்கள் வேலையில் ஒன்றும் குறைக்கப்படுவதில்லை’” என்று சொன்னார்கள். ¹²அப்படியே ஜனங்கள் வைக்கோலுக்குப் பதிலாகத் தாளடியைச் சேர்க்கும்படி எகிப்து தேசமெங்கும் சிதறிப்போனார்கள். ¹³ஆளோட்டிகள் அவர்களை நோக்கி, “வைக்கோல் இருந்தபோது செய்ததுபோல, அன்றன்றைக்குரிய உங்கள் வேலையை முடியுங்கள்” என்று அவர்களை நெருக்கினார்கள். ¹⁴பார்வோனுடைய ஆளோட்டிகள் இஸ்ரவேல் புத்திரர்மேல் வைத்திருந்த தலைவர்கள் அடிக்கப்பட்டு, “நேற்றும் இன்றும் நீங்கள் முன்போல உங்கள் செங்கல் அளவை ஏன் முடிக்கவில்லை?” என்று கேட்கப்பட்டார்கள்.

¹⁵அப்பொழுது இஸ்ரவேல் புத்திரரின் தலைவர்கள் பார்வோனிடத்தில் வந்து, “உமது அடியாருக்கு ஏன் இப்படிச் செய்கிறீர்? ¹⁶உமது அடியாருக்கு வைக்கோல் கொடுக்கப்படவில்லை; ஆனாலும் ‘செங்கல் செய்யுங்கள்’ என்று எங்களுக்குச் சொல்லுகிறார்கள்; இதோ, உமது அடியார் அடிக்கப்படுகிறோம், குற்றமோ உம்முடைய சொந்த ஜனங்களிடத்தில் இருக்கிறது” என்றார்கள்.

¹⁷அதற்கு அவன், “சோம்பேறிகள்! நீங்கள் சோம்பேறிகள்! ஆகையால்தான், ‘நாங்கள் போய்த் தேவனுக்குப் பலியிடுவோம்’ என்று சொல்லுகிறீர்கள். ¹⁸இப்பொழுது போய் வேலைசெய்யுங்கள்; வைக்கோல் உங்களுக்குக் கொடுக்கப்படுவதில்லை, ஆனாலும் நீங்கள் செங்கலின் முழு அளவையும் ஒப்புவிக்கவேண்டும்” என்றான்.

¹⁹“அன்றன்றைக்குரிய உங்கள் செங்கல் அளவில் ஒன்றும் குறைக்கவேண்டாம்” என்று சொல்லப்பட்டபோது, இஸ்ரவேல் புத்திரரின் தலைவர்கள் தாங்கள் தொல்லையில் அகப்பட்டதைக் கண்டார்கள். ²⁰அவர்கள் பார்வோனிடத்திலிருந்து புறப்படுகையில், தங்களைச் சந்திக்கக் காத்திருந்த மோசேயையும் ஆரோனையும் கண்டு, ²¹அவர்களை நோக்கி, “எங்கள் பிதா உங்களைப் பார்த்து நியாயந்தீர்ப்பாராக; ஏனெனில் எங்களைக் கொல்லும்படி அவர்கள் கையில் பட்டயத்தைக் கொடுத்து, பார்வோனுக்கும் அவன் அதிகாரிகளுக்கும் முன்பாக எங்களை அருவருப்பாக்கினீர்கள்” என்றார்கள்.

²²அப்பொழுது மோசே எங்கள் பிதாவினிடத்தில் திரும்பிப்போய், “என் ஆண்டவராகிய பிதாவே, இந்த ஜனங்கள்மேல் ஏன் தீங்கு வரப்பண்ணினீர்? நீர் என்னை ஏன் அனுப்பினீர்?

²³நான் உம்முடைய நாமத்தில் பேசும்படி பார்வோனிடத்தில் போனதுமுதல், அவன் இந்த ஜனங்களுக்குத் தீங்குசெய்தான்; நீரோ உம்முடைய ஜனங்களை எவ்விதத்திலும் விடுவிக்கவில்லை” என்றான்.