Exodus 5 FHB Father's Heart Bible™

5 ¹Etu pichete Moses aru Aaron Pharaoh laga usorte jaise aru koise, “Israel laga amar Pitri pora eneka koi ase: Moi laga manuh khan ke jabole dibi, titia taikhan jongol te Moi nimite ekta bhoj koribo.”

²Pharaoh pora koise, “Isor kun ase, ki karone Moi tar awaj mani kene Israel ke jabole dibo? Moi Isor ke najane, aru Moi Israel ke jabole nadibo.”

³Taikhan koise, “Amar Pitri amikhan logot lok paise. Amikhan ke tin din laga rasta jongol te jabole dibi, amar Pitri ke bolidan dibole, nahole Tar pora amikhan ke mohamari nahole talwar pora maribo pare.”

⁴Kintu Egypt laga raja pora taikhan ke koise, “Moses aru Aaron, kele tumikhan manuh khan ke taikhan laga kaam pora tani ase? Tumikhan laga kaam te wapas jabi!” ⁵Pharaoh pora koise, “Sabi, desh laga manuh khan etiya bisi hoi jaise, aru tumikhan taikhan ke kaam pora rukhai dibole bisari ase!”

⁶Thik etu dinte Pharaoh pora kaam-cholawa khan aru manuh khan uporte thaka mukhiya khan ke hukum di koise: ⁷“Age nisina it bonabole manuh khan ke kher aru nadibi. Taikhan nijor pora jai kene kher joma koribo lage.

⁸Age te bonai thaka nisina etu he ginti it taikhan ke bonabole koribi; kom nakoribi. Taikhan alsi ase; etu karone taikhan kandi kene koi ase, ‘Amikhan ke jai kene amar Isor ke bolidan dibole dibi.’ ⁹Manuh khan nimite kaam aru bhari kori dibi, titia taikhan etu te he lagi thakibo aru misa kotha khan ke dhyan nadibo.”

¹⁰Kaam-cholawa khan aru mukhiya khan bahar te ulai kene manuh khan ke koise, “Pharaoh pora koi ase: ‘Moi tumikhan ke aru kher nadibo.’ ¹¹‘Juntu jagate tumikhan pabo, ta te jai kene nijor laga kher lobi—kintu tumikhan laga kaam eku kom nakoribo.’” ¹²Titia manuh khan kher nimite nara joma koribole Egypt desh laga sob jagate charikhan hoi jaise. ¹³Kaam-cholawa khan taikhan ke joborjosti koi thakise: “Kher thaka homoi nisina, prti-din laga tumikhan laga kaam pura koribi.” ¹⁴Pharaoh laga kaam-cholawa khan pora taikhan uporte rakha Israel laga mukhiya khan ke marise, aru hudise, “Kele tumikhan kali aru aji, age nisina, tumikhan laga it laga ginti pura kora nai?”

¹⁵Titia Israel laga mukhiya khan ahhi kene Pharaoh logot kandi kene koise, “Kele apuni apuni laga noukar khan ke eneka kori ase? ¹⁶Apuni laga noukar khan ke kher dia nai, hoile bhi taikhan amikhan ke koi ase, ‘It bonabi!’ Sabi, apuni laga noukar khan ke mari ase, kintu golti to apuni nijor laga manuh khan laga ase.”

¹⁷Pharaoh pora koise, “Alsi! Tumikhan alsi ase! Etu karone tumikhan koi ase, ‘Amikhan ke jai kene Isor ke bolidan dibole dibi.’ ¹⁸Etiya jabi, kaam koribi. Tumikhan ke kher nadibo, hoile bhi tumikhan laga pura it laga ginti di dibo lage.”

¹⁹Jitia taikhan ke koise, “Tumikhan laga prti-din laga it laga ginti kom nakoribi,” titia Israel laga mukhiya khan taikhan dukh te girise koi kene janise. ²⁰Jitia taikhan Pharaoh logot pora ulai jaise, taikhan ke lok koribole rukhi thaka Moses aru Aaron ke taikhan lok paise, ²¹aru taikhan ke koise, “Amar Pitri pora tumikhan ke sabi aru bisar koribi, kilemane tumikhan pora amikhan ke morai dibole taikhan laga hath te talwar di kene, amikhan ke Pharaoh aru tar adhikari khan usorte ekta biya gundh bonai dise.”

²²Titia Moses amar Pitri logot wapas jaise aru koise, “Moi laga Malik Pitri, kele Apuni etu manuh khan uporte dukh anise? Kele Apuni moike pathaise?

²³Kilemane Moi Apuni laga nam te kotha kobole Pharaoh logot jaise, tetiya pora tai etu manuh khan ke dukh dise, aru Apuni Apuni laga manuh khan ke eku bachai diya nai.”