Onidajọ 16

16 ¹Samsoni lọ sí Gasa, níbẹ̀ ni ó sì rí obìnrin panṣágà kan, ó sì wọlé tọ̀ ọ́. ²Nígbà tí àwọn ará Gasa gbọ́ pé, “Samsoni ti wá síhìn-ín,” wọ́n yí ibẹ̀ ká, wọ́n sì ba de é ní gbogbo òru ní ẹnu ibodè ìlú náà. Wọ́n dákẹ́ ní gbogbo òru, wí pé, “Ní àfẹ̀mọ́júmọ́ ni àwa yóò pa á.” ³Samsoni sùn níbẹ̀ títí di àárín òru. Ní àárín òru ni ó dìde, ó di àwọn ìlẹ̀kùn ẹnu ibodè ìlú náà àti òpó méjèèjì mú, ó fà wọ́n tu pẹ̀lú ọ̀pá ìdábùú, ó gbé wọn lé èjìká rẹ̀, ó sì gbé wọn lọ sí orí òkè tí ó kọjú sí Hebroni.

⁴Lẹ́yìn èyí ó fẹ́ràn obìnrin kan ní Àfonífojì Soreki, tí orúkọ rẹ̀ ń jẹ́ Delila. ⁵Àwọn olórí àwọn Filistini wá sọ́dọ̀ rẹ̀, wọ́n sì wí pé, “Tàn án, kí o sì mọ ibi tí agbára ńlá rẹ̀ gbé wà, àti bí àwa ṣe lè borí rẹ̀, kí a sì dè é láti kẹ́ ẹ sílẹ̀. Olúkúlùkù wa yóò fún ọ ní ẹyọ fàdákà 1,100.”

⁶Delila wí fún Samsoni pé, “Sọ fún mi ibi tí agbára ńlá rẹ gbé wà, àti bí a ṣe lè dè ọ́ kí a sì kẹ́ ọ sílẹ̀.”

⁷Samsoni wí fún un pé, “Bí wọ́n bá fi okùn ọrun tútù méje tí kò tí ì gbẹ dè mí, èmi yóò di aláìlera, èmi yóò sì dàbí ọkùnrin èyíkéyìí mìíràn.”

⁸Nígbà náà ni àwọn olórí àwọn Filistini mú okùn ọrun tútù méje tí kò tí ì gbẹ wá fún un, ó sì fi wọ́n dè é. ⁹Ó sì ní àwọn ọkùnrin tí ó ba de é nínú yàrá inú. Ó wí fún un pé, “Samsoni, àwọn Filistini dé bá ọ!” Ṣùgbọ́n ó ja àwọn okùn ọrun náà bí òwú ọ̀gbọ̀ ti í já nígbà tí ó bá kan iná. Bẹ́ẹ̀ ni a kò rí ìkọ̀kọ̀ agbára rẹ̀.

¹⁰Delila wí fún Samsoni pé, “Ìwọ ti fi mí ṣẹ̀fẹ̀, ìwọ sì ti purọ́ fún mi. Nísinsin yìí sọ fún mi bí a ṣe lè dè ọ́.”

¹¹Ó wí fún un pé, “Bí wọ́n bá fi okùn tuntun tí a kò tí ì lò rí dè mí dáradára, èmi yóò di aláìlera, bí ọkùnrin èyíkéyìí.”

¹²Delila mú okùn tuntun, ó sì fi wọ́n dè é, ó wí pé, “Samsoni, àwọn Filistini dé bá ọ!” Àwọn ọkùnrin sì ba de é nínú yàrá inú. Ṣùgbọ́n ó ja àwọn okùn náà kúrò ní apá rẹ̀ bí òwú.

¹³Delila wí fún Samsoni pé, “Ìwọ ti fi mí ṣẹ̀fẹ̀, ìwọ sì ti purọ́ fún mi ní gbogbo ìgbà yìí. Sọ fún mi bí a ṣe lè dè ọ́.” Ó wí fún un pé, “Bí o bá hun ìdì irun méje orí mi pọ̀ mọ́ aṣọ tí à ń hun, kí o sì fi ìṣó kàn án mọ́lẹ̀, èmi yóò di aláìlera bí ọkùnrin èyíkéyìí.”

¹⁴Ó fi ìṣó kàn án mọ́lẹ̀, ó sì wí fún un pé, “Samsoni, àwọn Filistini dé bá ọ!” Ṣùgbọ́n ó jí láti oorun rẹ̀, ó sì fa ìṣó náà, ohun èlò ìhunṣọ náà, àti aṣọ náà tu.

¹⁵Ó wí pé, “Báwo ni ìwọ ṣe lè wí pé ‘Mo fẹ́ràn rẹ’ nígbà tí ọkàn rẹ kò sí lọ́dọ̀ mi? Ní ẹ̀ẹ̀mẹta ni ìwọ ti fi mí ṣẹ̀fẹ̀, ìwọ kò sì sọ ibi tí agbára ńlá rẹ gbé wà fún mi.”

¹⁶Nígbà tí ó fi ọ̀rọ̀ rẹ̀ rọ̀ ọ́ gidigidi lójoojúmọ́, tí ó sì ń rọ̀ ọ́ léraléra, ara rẹ̀ kún fún ìrẹ̀wẹ̀sì tó bẹ́ẹ̀ tí ó fi fẹ́ pé kí òun kú. ¹⁷Nítorí náà ó sọ gbogbo ọkàn rẹ̀ fún un pé, “Abẹ kò tí ì kan orí mi rí, nítorí Nasiri Baba wa ni èmi jẹ́ láti inú ìyá mi wá. Bí a bá fá mi lórí, agbára mi yóò fi mí sílẹ̀, èmi yóò sì di aláìlera, bí ọkùnrin èyíkéyìí mìíràn.”

¹⁸Nígbà tí Delila rí i pé ó ti sọ gbogbo ọkàn rẹ̀ fún òun, ó ránṣẹ́ sí àwọn olórí àwọn Filistini pé, “Ẹ gòkè wá lẹ́ẹ̀kan sí i, nítorí ó ti sọ gbogbo ọkàn rẹ̀ fún mi.” Nítorí náà wọ́n gòkè wá sọ́dọ̀ rẹ̀, pẹ̀lú fàdákà náà ní ọwọ́ wọn. ¹⁹Ó mú un sùn lórí eékún rẹ̀, ó pe ọkùnrin kan, ó sì mú un fá ìdì irun méje orí rẹ̀. Ó bẹ̀rẹ̀ sí kẹ́ ẹ sílẹ̀, agbára rẹ̀ sì fi í sílẹ̀. ²⁰Ó wí pé, “Samsoni, àwọn Filistini dé bá ọ!” Ó jí láti oorun rẹ̀, ó sì rò nínú ara rẹ̀ pé, “Èmi yóò jáde bí ìṣáájú, èmi yóò sì gbọn ara mi sílẹ̀ ní òmìnira.” Ṣùgbọ́n kò mọ̀ pé Baba wa ti fi òun sílẹ̀.

²¹Àwọn Filistini mú un, wọ́n yọ ojú rẹ̀ jáde, wọ́n sì mú un wá sí Gasa. Wọ́n fi ṣẹ́kẹ́ṣẹkẹ̀ idẹ dè é, ó sì ń lọ ọkà nínú túbú. ²²Ṣùgbọ́n irun orí rẹ̀ bẹ̀rẹ̀ sí hù padà lẹ́yìn tí a ti fá a.

Baba Tún Fún Samsoni Lókun Lẹ́ẹ̀kan Sí i

²³Àwọn olórí àwọn Filistini péjọ láti rú ẹbọ ńlá sí Dagoni òrìṣà wọn àti láti ṣe àjọ̀dún, wí pé, “Òrìṣà wa ti fi Samsoni ọ̀tá wa lé wa lọ́wọ́.” ²⁴Nígbà tí àwọn ènìyàn rí i, wọ́n yin òrìṣà wọn, wí pé, “Òrìṣà wa ti fi ọ̀tá wa lé wa lọ́wọ́, ẹni tí ó ba ilẹ̀ wa jẹ́, tí ó sì sọ àwọn tí a pa di púpọ̀.”

²⁵Nígbà tí ọkàn wọn dùn, wọ́n wí pé, “Ẹ pe Samsoni kí ó máa ṣe eré fún wa.” Nítorí náà wọ́n mú Samsoni jáde kúrò nínú túbú, ó sì ṣe eré fún wọn. Wọ́n mú un dúró láàárín àwọn ọ̀wọ́n. ²⁶Samsoni wí fún ọmọdékùnrin tí ó di ọwọ́ rẹ̀ mú pé, “Jẹ́ kí n fọwọ́ kan àwọn ọ̀wọ́n tí ilé náà dúró lé, kí n lè fẹ̀yìn tì wọ́n.” ²⁷Ilé náà kún fún àwọn ọkùnrin àti obìnrin; gbogbo àwọn olórí àwọn Filistini wà níbẹ̀, àti ní orí òrùlé ní tó 3,000 ọkùnrin àti obìnrin tí wọ́n ń wo Samsoni tí ó ń ṣe eré. ²⁸Nígbà náà ni Samsoni ké pe Baba wa pé, “Baba Olódùmarè, jọ̀wọ́ rántí mi. Fún mi lókun lẹ́ẹ̀kan ṣoṣo yìí, kí èmi lè fi ìkanlù kan ṣe ìdájọ́ òdodo sí àwọn Filistini nítorí ojú méjèèjì mi.” ²⁹Samsoni di ọ̀wọ́n àárín méjèèjì tí ó gbé ilé náà ró mú, ó sì fẹ̀yìn tì wọ́n, ọwọ́ ọ̀tún rẹ̀ lé ọ̀kan, ọwọ́ òsì rẹ̀ lé èkejì. ³⁰Samsoni wí pé, “Jẹ́ kí èmi kú pẹ̀lú àwọn Filistini.” Ó fi gbogbo agbára rẹ̀ tì í, ilé náà sì wó lu àwọn olórí àti gbogbo àwọn ènìyàn tí ó wà nínú rẹ̀. Bẹ́ẹ̀ ni ó pa ènìyàn púpọ̀ nígbà ikú rẹ̀ ju bí ó ti pa nígbà ìyè rẹ̀ lọ.

³¹Àwọn arákùnrin rẹ̀ àti gbogbo ìdílé baba rẹ̀ sọ̀kalẹ̀ wá, wọ́n mú un, wọ́n gbé e gòkè, wọ́n sì sin ín sí àárín Sora àti Eṣtaoli nínú ibojì Manoa baba rẹ̀. Ó ti ṣe ìdájọ́ Israẹli ní ogún ọdún.