Ndị Ikpe 16 FHB Father's Heart Bible™

16 ¹Samsin gara Gaza, hụ otu nwanyị akwụna nʼebe ahụ, ya na ya dinakwaa. ²Mgbe ndị Gaza nụrụ na, “Samsin abịawo nʼebe a,” ha gbara ebe ahụ gburugburu, chere ya ogologo abalị ahụ niile nʼọnụ ụzọ ama obodo ahụ. Ha gbara nkịtị ogologo abalị ahụ niile, na-asị, “Nʼụtụtụ ka anyị ga-egbu ya.” ³Samsin dinara nʼebe ahụ ruo nʼetiti abalị. Nʼetiti abalị, o biliri, jide ibo ọnụ ụzọ ama obodo ahụ na ogidi abụọ ahụ, mịpụta ha na mkpọrọ ha, bokwasị ha nʼubu ya, buru ha gaa nʼelu ugwu ahụ nke chere Hebrọn ihu.

⁴Mgbe nke a gasịrị, ọ hụrụ otu nwanyị nʼanya na Ndagwurugwu Sorek, onye aha ya bụ Delaịla. ⁵Ndị eze Filistia bịakwutere ya sị, “Rafuo ya ka ị mara ebe ike ya dị ukwuu si dị, na otú anyị ga-esi merie ya kee ya agbụ iji mee ka ọ daa mba. Onye ọbụla nʼime anyị ga-enye gị iberibe ọlaọcha dị otu puku na otu narị.”

⁶Delaịla gwara Samsin sị, “Gwa m ebe ike gị dị ukwuu si dị, na otú e nwere ike isi kee gị agbụ mewe ka ị daa mba.”

⁷Samsin gwara ya sị, “Ọ bụrụ na e jiri ụdọ ụta asaa dị ọhụrụ, nke na-akpọnwụbeghị akpọnwụ, kee m agbụ, ike ga-agwụ m, a ga m adịkwa ka mmadụ ọbụla ọzọ.”

⁸Mgbe ahụ, ndị eze Filistia wetaara ya ụdọ ụta asaa dị ọhụrụ, nke na-akpọnwụbeghị akpọnwụ, o jiri ha kee ya agbụ. ⁹Ugbu a, o nwere ndị ikom zoro ezo nʼime ụlọ ime ahụ. Ọ sịrị ya, “Ndị Filistia abịakwasịla gị, Samsin!” Ma ọ dọbiri ụdọ ụta ahụ dịka owu si adọbi mgbe ọ metụrụ ọkụ aka. Ya mere, achọpụtaghị ihe nzuzo nke ike ya.

¹⁰Delaịla gwara Samsin sị, “I ji m eme ihe ọchị, gwakwa m okwu ụgha. Ugbu a, gwa m otú e nwere ike isi kee gị agbụ.”

¹¹Ọ gwara ya sị, “Ọ bụrụ na e jiri ụdọ ọhụrụ nke e ji arụbeghị ọrụ kee m agbụ nke ọma, ike ga-agwụ m, a ga m adị ka mmadụ ọbụla.”

¹²Delaịla weere ụdọ ọhụrụ jiri ha kee ya agbụ, na-asị, “Samsin, ndị Filistia abịakwasịla gị!” Ndị ikom zoro ezo nʼime ụlọ ime ahụ. Ma ọ dọwara ụdọ ahụ nʼaka ya abụọ dịka eri.

¹³Delaịla gwara Samsin sị, “I ji m eme ihe ọchị, gwakwa m okwu ụgha oge a niile. Gwa m otú e nwere ike isi kee gị agbụ.” Ọ sịrị ya, “Kpanye akụkụ ntutu isi m asaa nʼime ákwà nke a na-akpa nʼígwé akwa, were ntu kpọgide ya nke ọma, ike ga-agwụ m ka mmadụ ọbụla.”

¹⁴O ji ntu ahụ kpọgide ya, gwa ya sị, “Samsin, ndị Filistia abịakwasịla gị!” Ma o si nʼụra ya teta, mịpụta ntu ahụ, na ígwé akwa ahụ, na ákwà ahụ.

¹⁵Ọ sịrị, “Olee otú ị ga-esi sị, ‘Ahụrụ m gị nʼanya,’ ma obi gị anọghị nʼebe m nọ? Ugboro atọ ka i ji m mere ihe ọchị, i gwaghịkwa m ebe ike gị dị ukwuu si dị.”

¹⁶Mgbe o ji okwu ya na-akpagbu ya ike ụbọchị niile, na-akpaligharịkwa ya, ike gwụrụ ya nke ukwuu nke na ọ chọrọ ịnwụ anwụ. ¹⁷Ya mere, ọ gwara ya ihe niile dị ya nʼobi sị, “Agụba ọ bụla emetụbeghị m nʼisi aka, nʼihi na abụ m onye Naziraịt nke Nna anyị site nʼafọ nne m. Ọ bụrụ na akpụchaa m isi, ike m ga-ahapụ m, a ga m adị ike ọgwụgwụ, dịka mmadụ ọbụla ọzọ.”

¹⁸Mgbe Delaịla hụrụ na ọ gwala ya ihe niile dị ya nʼobi, o ziga ozi kpọọ ndị eze Filistia, “Bịakwutenụ m ọzọ, nʼihi na ọ gwala m ihe niile dị ya nʼobi.” Ya mere, ha bịakwutere ya, jide ọlaọcha ahụ nʼaka ha. ¹⁹O mere ka ọ rahụ ụra nʼelu ikpere ya, kpọọ otu nwoke, mee ka ọ kpụchaa akụkụ ntutu isi ya asaa. Ọ malitere ime ka ọ daa mba, ike ya hapụkwara ya. ²⁰Ọ sịrị, “Ndị Filistia abịakwasịla gị, Samsin!” O si nʼụra ya teta chee nʼobi ya, “Aga m apụ dịka na mbụ maa onwe m jijiji ka m nwere onwe m.” Ma ọ maghị na Nna anyị ahapụla ya.

²¹Ndị Filistia jidere ya, ghupụ anya ya abụọ, kpọrọ ya gaa Gaza. Ha ji mkpọrọ ígwé bronz kee ya agbụ, ọ na-akwọkwa ọka nʼime ụlọ mkpọrọ. ²²Ma ntutu isi ya malitere ito ọzọ mgbe akpụchachara ya.

Nna anyị Nye Samsin Ike Ọzọ

²³Ndị eze Filistia zukọrọ ịchụrụ Dagọn chi ha aja dị ukwuu na iṅụrị ọṅụ, na-asị, “Chi anyị enyefeela anyị Samsin onye iro anyị nʼaka.” ²⁴Mgbe ndị mmadụ hụrụ ya, ha toro chi ha, na-asị, “Chi anyị enyefeela onye iro anyị nʼaka, onye bibiri ala anyị ma mee ka ndị e gburu egbu nʼetiti anyị baa ụba.”

²⁵Mgbe obi ha jupụtara nʼaṅụrị, ha sịrị, “Kpọọnụ Samsin ka ọ na-eme anyị ihe nkiri.” Ya mere, ha kpọpụtara Samsin site nʼụlọ mkpọrọ, ọ meere ha ihe nkiri. Ha mere ka o guzoro nʼetiti ogidi ndị ahụ. ²⁶Samsin gwara nwata nwoke ahụ jidere ya aka sị, “Kwere ka m metụ ogidi ndị ahụ ụlọ a dabeere nʼelu ha aka, ka m nwee ike idabere na ha.” ²⁷Ụlọ ahụ jupụtara nʼụmụ nwoke na ụmụ nwanyị; ndị eze Filistia niile nọ nʼebe ahụ, nʼelu ụlọ ahụ, ihe dị ka puku mmadụ atọ, ụmụ nwoke na ụmụ nwanyị, na-ele Samsin ka ọ na-eme ihe nkiri. ²⁸Mgbe ahụ, Samsin kpọkuru Nna anyị sị, “O! Nna, Onye na-achị achị, biko cheta m. Nye m ike naanị ugboro a, ka m jiri otu mkpọda bọọ ndị Filistia ọbọ nʼihi anya m abụọ.” ²⁹Samsin jidere ogidi abụọ ahụ dị nʼetiti bụ ndị na-akwado ụlọ ahụ, dabere na ha, aka nri ya nʼotu, aka ekpe ya nʼnke ọzọ. ³⁰Samsin sịrị, “Ka mụ na ndị Filistia nwụkọọ ọnụ.” O ji ike ya niile kwaghachaa ha, ụlọ ahụ dakwasịkwara ndị eze ahụ na ndị niile nọ nʼime ya. Ya mere, ndị o gburu nʼọnwụ ya karịrị ndị o gburu nʼoge ndụ ya.

³¹Ụmụnne ya na ndị niile nọ nʼezinụlọ nna ya rịdatara, buru ya, bulie ya, lie ya nʼagbata Zora na Eshtaọl, nʼili Manoa nna ya. Ọ nọ na-ekpe Izrel ikpe afọ iri abụọ.