Wungva̱-Wungvā 16

16 ¹Samsonna Gazali vai, kala chili khayorva̱ akha theilaga ali ngasopihaowa. ²Gazawui mibingna, "Samson hili rāhaira" da shā tharan, athumna apam chi kuinamlaga, keinungwui ngaveili ngayā katonga ali ngaraisai. Athumna ngayā katonga hupta leilaga, "Zimik phokta ithumna ali shaothatra" da hānga. ³Samsonna ngayā sailung eina tangda chili pisai. Ngayā sailungphup atamli ana ngakarthuida, keinungwui ngaveiwui khāmong kala khāmongphei khani chi yonkhuilaga, phākashut eina tangda katingshokhaida, awui yartuili khāngkākhuilaga, Hebronli yangkhangasung kaphungtonli khuikāhaowa.

⁴Hiwui thili ana Sorek tampākli khalei sha̱nao akhali leishilāka, awui ming Delilah hoi. ⁵Philistinewui khamungabingna awuili rāhaida hānga, "Ali suilu, kala awui yāng juimei chi kali leikhala, kala ithumna kathāda ali yuida khalapta munghaokhala, chi tamkhuilu. Ithum kachikathāna nali lupāsā thingkha shākha mira."

⁶Delilahna Samsonli hānga, "Nawui yāng juimei chi kali leikhala, kala kathāda nali khalapta munghaokhala, ili hānglu."

⁷Samsonna awuili hānga, "Kalikhada athumna ili mathengrang kahai malā khara̱ kadhar shini eina khalaphaiakha, ina nganukhaira mi khangatei thāda ngasāra."

⁸Chieina Philistinewui khamungabingna awuili mathengrang kahai malā khara̱ kadhar shini khuirāmi, kala ana chi eina ali khalaphaowa. ⁹Chitharan zangngathum thanghonli mibing rimpamsai. Ana ali hānga, "Samson, Philistinenaobingna nali rāhaira!" Kha tāwon akung akha meili sākaza̱ tharan sātekmi thāda ana malā khara̱ chi sātekmihaowa. Chieina awui yāngwui ngathum chi maphāshokmana.

¹⁰Delilahna Samsonli hānga, "Nana ili mana̱shida, kakapik tui hāngmi. Ara kathāda nali khalaphaokhala, ili hānglu."

¹¹Ana awuili hānga, "Kalikhada athumna ili otli masing kahai khara̱ kadhar eina mantida khalaphaiakha, ina nganukhaira mi khangatei thāda ngasāra."

¹²Delilahna khara̱ kadhar khuilaga chi eina ali khalaphaida, "Samson, Philistinenaobingna nali rāhaira!" da hānga. Zangngathum thanghonli mibing rimpamsai. Kha ana awui pāngwui eina khara̱ chi kazaira̱ thāda sātekmihaowa.

¹³Delilahna Samsonli hānga, "Nana atam katonga ili mana̱shida, kakapik tui hāngmi. Kathāda nali khalaphaokhala, ili hānglu." Ana awuili hānga, "Iwui kui sam khara̱ shini chi loomwui chon eina rakthumlaga, pin eina mantida shipshānlu, ina mi khangatei thāda nganukhaora."

¹⁴Ana pin eina shipshānlaga awuili hānga, "Samson, Philistinenaobingna nali rāhaira!" Kha ana awui pikakhui eina thuimathukta, pin, loom, kala chon chi katingshokhaowa.

¹⁵Ana hānga, "Nawui malung ili maleiakha, kathāda nana 'Ina nali leishi' da hāngshapkhala? Thangkha kathum nana ili mana̱shida, nawui yāng juimei chi kali leikhala ili mahāngmimana."

¹⁶Ana thangkachida awui tui eina ali pangmeida, ali rāmahunglaga, Samsonna khananglāk mathotkahaida, thihaokhavai da machuka. ¹⁷Chieina ana awui malung katonga awuili hāngchitheihaira, "Iwui kuitungli kuisighai maparlakmana, kaja ishāva̱wui naopamwui eina thuida ina ithumwui Avāwui Nazirite akhana. Kalikhada iwui kui sihaiakha, iwui yāngna ili thuihaida, ina nganukhaira, mi khangatei thāda ngasāra."

¹⁸Delilahna ana awui ning katonga ali hāngkahai chi theilaga, Philistinewui khamungabingli kashirāta hānga, "Latluida kālu, kaja ana awui ning katonga ili hāngkahaina." Chieina athumna lupāsā chi apāngli khuiphungda awuili kāhaowa. ¹⁹Ana ali awui khukli pingasakta, mi akha kohaida awui kuisam shini chi simiser ngasaka. Chieina ana ali hamsang ngasak phokhaoda, awui yāngna ali thuihaowa. ²⁰Ana hānga, "Samson, Philistinenaobingna nali rāhaira!" Ana awui pikakhui eina thuimathukta hānga, "Khare thāda ina shokrāda ikhalatta shaksāda ningkhān sāra." Kha ithumwui Avāna ali thuiserhaira kaji ana matheimana.

²¹Philistinenaobingna ali tukkhuilaga awui mik latshokmihaowa, kala Gazali khuivāhaowa. Athumna ali pithraiwui zurthing eina khalaphaida, ana phātopli mā rungpama. ²²Kha awui kuihā chi shavākahaiwui thili latluida shokphokhaowa.

Avāna Samsonli Latluida Pangngasakmi

²³Philistinewui khamungabingna athumwui vare Dagonli pha̱kaphayā kahaka chigat khavai kala ringphārum khavai kazipkhuida hānga, "Ithumwui varena ithumwui yangkashe Samsonli ithumwui pāngli mikakāhaira." ²⁴Mibingna ali theilaga, athumwui vareli sochikatta hānga, "Ithumwui ngalei kazamserhai kala ithumli shaokathat mataisang ngasak kahai ithumwui yangkashe chili ithumwui varena ithumwui pāngli mikakāhaira."

²⁵Athumwui ning mahaiusor eina leilakha, athumna hānga, "Ithumli ringphā ngasak khavai Samsonli kolu." Chieina athumna Samsonli phātopwui eina khuivāhaowa, kala ana athumwui mangāli mathāphā sai. Athumna ali pākra̱bingwui ngachaili nganing ngasaka. ²⁶Samsonna awui pāng singkhame nao chili hānga, "Shim hi ngasokhame pākra̱bing chi ili singmi ngasaklu, chithākha ina chibingli katom sāshapra." ²⁷Shim chi mi kala sha̱nao eina pemtinghai; Philistinewui khamungabing katonga chili leisai, kala shimtungli mi kala sha̱nao thing kathum sha̱khana Samsonna mathāphā sāda leikahai chi yangpama. ²⁸Chieina Samsonna ithumwui Avāli ngakaoda hānga, "O Proho Avā, ili phaningunglu, kapona. Imik khaniwui vang kashao akha eina Philistinenaobingtungli ina athut khui khavai, hile akhathang ili pangngasakmilu." ²⁹Samsonna shim ngasokhame ngachai pākra̱ khani chi yonkhui, kala chibingli katom sāda, awui yāpang chi akhali, awui pāng khangatei chi khangatei akhali singhaowa. ³⁰Samsonna hānga, "Ina Philistinenaobingli ngasoda thira." Ana awui yāng katonga eina rāsha̱haowa, kala shim chi khamungabing kala chiwui alungli khalei mi katonga tungli pitāhaowa. Chithāda ana ringlakhawui eina thikahai tharan shaokathat mataisang ngasaka.

³¹Awui achinā ngarā kala avā shimkhur katonga katāva, ali khuida khuikāhaowa, kala Zorah eina Eshta-ol ngachaili avā Manoahwui chikhurli ali chifahaowa. Ana Israelli zingkum maga munga.