Atiirĩrĩri Bũrũri 16 FHB Father's Heart Bible™

16 ¹Samsoni agĩthiĩ Gaza, na kũu akĩona mũmaraya, agĩkoma nake. ²Rĩrĩa andũ a Gaza maaiguire atĩrĩ, “Samsoni nĩ ookĩte gũkũ,” magĩthiũrũrũkĩria handũ hau, makĩmweterera ũtukũ wothe kĩhingoinĩ gĩa itũũra. Magĩkira ki ũtukũ wothe, makiuga atĩrĩ, “Rũũciinĩ nĩtũkũmũũraga.” ³Samsoni agĩkoma hau nginya ũtukũ gatagatĩ. Ũtukũ gatagatĩ agĩũkĩra, akĩnyiita mĩrango ya kĩhingo gĩa itũũra na itugĩ cieerĩ, akĩmĩkũũra hamwe na mũgĩĩko, akĩmĩigĩrĩra ciande, akĩmĩkuua nginya igũrũ rĩa karĩma karĩa kangʼetheire Heburoni.

⁴Thuutha wa ũguo akĩenda mũtumia ũmwe wa Gĩtuamba kĩa Soreku, ũrĩa rĩĩtwa rĩake rĩarĩ Delila. ⁵Anene a Afilisti magĩũka kũrĩ we, makĩmwĩra atĩrĩ, “Mũheenererie ũmenye kũrĩa hinya wake mũnene ũrĩ, na ũrĩa tũngĩmũtooria tũmuohe nĩguo tũmũneneherie. Na o ũmwe witũ nĩegũkũhe icunjĩ 1,100 cia betha.”

⁶Delila akĩĩra Samsoni atĩrĩ, “Njĩĩra kũrĩa hinya waku mũnene ũrĩ, na ũrĩa ũngĩohwo na ũtooreio.”

⁷Samsoni akĩmwĩra atĩrĩ, “Mangĩndooha na mĩkwa mũgwanja mĩĩthe ya ũta, ĩtarĩ nyũmũ, nĩngwaga hinya nduĩke ta mũndũ ũngĩ o wothe.”

⁸Nao anene a Afilisti makĩmũrehere mĩkwa mũgwanja mĩĩthe ya ũta, ĩtarĩ nyũmũ, nake akĩmuoha nayo. ⁹Na rĩĩrĩ, aarĩ na andũ meehithĩte nyũmba thĩinĩ. Akĩmwĩra atĩrĩ, “Samsoni, Afilisti nĩmaagũkora!” No agĩtua mĩkwa ĩyo ta ũrĩa rũrigĩ rwa ũgũũ rũtuĩkaga rwahutia mwaki. Nĩ ũndũ ũcio hitho ya hinya wake ndĩamenyekire.

¹⁰Delila akĩĩra Samsoni atĩrĩ, “Nĩũũnyararĩte na ũkanjĩĩra maheeni. Rĩu njĩĩra ũrĩa ũngĩohwo.”

¹¹Akĩmwĩra atĩrĩ, “Mangĩndooha wega na mĩhĩndo mĩerũ ĩtarĩ yaarĩĩtwo wĩra, nĩngwaga hinya nduĩke ta mũndũ o wothe.”

¹²Delila akĩoya mĩhĩndo mĩerũ akĩmuoha nayo, akiuga atĩrĩ, “Samsoni, Afilisti nĩmaagũkora!” Nao andũ maarĩ meehithĩte nyũmba thĩinĩ. No agĩtuanga mĩhĩndo ĩyo mookoinĩ make ta rũrigĩ.

¹³Delila akĩĩra Samsoni atĩrĩ, “Nĩũũnyararĩte na ũkaanjĩĩra maheeni ihinda rĩĩrĩ rĩothe. Njĩĩra ũrĩa ũngĩohwo.” Akĩmwĩra atĩrĩ, “Ũngĩtuma mĩcoora mũgwanja ya mũtwe wakwa thĩinĩ wa gĩtambaya kĩa mũtambĩĩro ũkĩoherere na higĩ, nĩngwaga hinya nduĩke ta mũndũ o wothe.”

¹⁴Akĩmĩrũmia na higĩ, akĩmwĩra atĩrĩ, “Samsoni, Afilisti nĩmaagũkora!” No akĩarahũka toroinĩ wake, agĩkũũra higĩ na mũtambĩĩro na gĩtambaya.

¹⁵Akiuga atĩrĩ, “Ũngĩhota atĩa kuuga, ‘Nĩngwendete,’ ngoro yaku ĩtarĩ hamwe na niĩ? Maita maatatũ nĩũũnyararĩte na ũkaaga kũnjĩĩra kũrĩa hinya waku mũnene ũrĩ.”

¹⁶Na rĩrĩa aamũhatĩrĩria mũno na ciugo ciake o mũthenya, akĩmũringĩrĩria, akĩnogio nĩ ũndũ ũcio o nginya akĩĩrirĩria gũkua. ¹⁷Nĩ ũndũ ũcio akĩmwĩra ngoro yake yothe, akĩmwĩra atĩrĩ, “Gũtirĩ rwenji rũrĩ rwahutia mũtwe wakwa, tondũ ndĩ Mũnaziri wa Ithe witũ kuuma nda ya maitũ. Ingĩenjwo, hinya wakwa nĩũkuuma harĩ niĩ, nduĩke mũndũ ũtarĩ hinya, ta mũndũ ũngĩ o wothe.”

¹⁸Rĩrĩa Delila oonire atĩ nĩamwĩrĩte ngoro yake yothe, agĩtũmanĩra anene a Afilisti, akĩmeera atĩrĩ, “Ambatai rĩngĩ o rĩmwe, tondũ nĩanjĩĩrĩte ngoro yake yothe.” Nao makĩambata kũrĩ we marĩ na betha mookoinĩ mao. ¹⁹Akĩmũkomia maruinĩ make, agĩĩta mũndũ, akĩmwenjithia mĩcoora mũgwanja ya mũtwe wake. Akĩambĩrĩria kũmũtooria, naguo hinya wake ũkĩmuuma. ²⁰Akiuga atĩrĩ, “Samsoni, Afilisti nĩmaagũkora!” Akĩarahũka toroinĩ wake, agĩĩciiria atĩrĩ, “Nĩnguuma nja ta mahinda marĩa mangĩ nyĩinaine ndĩĩohore.” No ndaamenyire atĩ Ithe witũ nĩamũtiganĩirie.

²¹Afilisti makĩmũnyiita, makĩmũkũũra maitho, makĩmũtwara Gaza. Makĩmuoha na bĩngũ cia gĩcango, nake agĩthiaga ngano njeerainĩ. ²²No njuĩrĩ ya mũtwe wake ĩkĩambĩrĩria gũkũra rĩngĩ thuutha wa kũenjwo.

Ithe Witũ Eekĩra Samsoni Hinya o Rĩngĩ

²³Anene a Afilisti magĩũngana nĩguo marutĩre Dagoni ngai yao igongona inene na makũngũĩre, makiuga atĩrĩ, “Ngai iitũ nĩĩtũneanĩte Samsoni thũ iitũ mookoinĩ maitũ.” ²⁴Rĩrĩa andũ maamuonire, magĩkumia ngai yao, makiuga atĩrĩ, “Ngai iitũ nĩĩneanĩte thũ iitũ, ĩrĩa yaanangire bũrũri witũ na ĩkĩingĩhia arĩa ĩciũragĩte.”

²⁵Rĩrĩa ngoro ciao ciakenete, makiuga atĩrĩ, “Ĩtai Samsoni atũkenie.” Nao makĩrehe Samsoni kuuma njeerainĩ, nake akĩmakenia. Makĩmũrũgamia gatagatĩ ka itugĩ. ²⁶Samsoni akĩĩra kaana karĩa kaamũnyiitĩte guoko atĩrĩ, “Reke hutie itugĩ iria nyũmba ĩngirĩire igũrũ rĩacio, nĩguo ndĩĩtiiranie nacio.” ²⁷Nyũmba ĩyo yaiyũrĩte arũme na atumia; anene othe a Afilisti maarĩ ho, na nyũmba igũrũ haarĩ na andũ ta 3,000 arũme na atumia meeroreire Samsoni agĩthaaka. ²⁸Nake Samsoni agĩkaĩra Ithe witũ, akiuga atĩrĩ, “Wee Mwathani Ithe witũ, ndagũthaitha ũndirikane. Heoha hinya o ihinda rĩĩrĩ rĩmwe, nĩguo na rũringo rũmwe ndĩĩrĩhĩrie harĩ Afilisti nĩ ũndũ wa maitho makwa meerĩ.” ²⁹Samsoni akĩnyiita itugĩ cieerĩ cia gatagatĩ iria ciatiirĩte nyũmba, agĩĩtiirania nacio, guoko gwake kwa ũrĩo kũrĩ harĩ kĩmwe, na kwa ũmotho kũrĩ harĩ kĩrĩa kĩngĩ. ³⁰Samsoni akiuga atĩrĩ, “Reke ngue hamwe na Afilisti.” Agĩthindĩka na hinya wake wothe, nayo nyũmba ĩkĩgũĩra anene na andũ othe arĩa maarĩ thĩinĩ wayo. Nĩ ũndũ ũcio arĩa ooragire agĩkua maarĩ aingĩ gũkĩra arĩa ooragĩte arĩ muoyo.

³¹Nao ariũ a ithe na nyũmba yothe ya ithe magĩikũrũka, makĩmuoya, makĩmwambatia, makĩmũthika gatagatĩ ka Zora na Eshitaoli thĩinĩ wa mbĩrĩra ya ithe Manoa. Nĩatuĩte ciira wa Isiraeli mĩaka mĩrongo ĩĩrĩ.