Samson pote pòtay lavil Gaza ale

Samson pote pòtay Gaza yo ale, apre sa li renmen Dalila, yo peye pou l jwenn sekrè li. Apre twa manti, li di l tout sa ki nan kè l, li leve ak tèt li raze, epi li pa konnen Papa nou kite l. Yo kreve je l, li nan moulen an, cheve l repouse, epi li mande fòs ankò.

Chapit 16.

Samson ale lavil Gaza, epi la li wè yon jennès, li kouche avè l. Lè moun lavil Gaza yo tande: “Samson vini isit la,” yo sènen kote a, yo pase tout nwit lan ap tann li bò pòtay lavil la. Yo rete trankil tout nwit lan, yo t'ap di: “Lè bajou kase, n'a touye l.” Samson rete kouche la jouk nan mitan lannwit. Nan mitan lannwit lan li leve, li pran batan pòtay lavil la ak de montan yo, li rache yo ansanm ak ba a, li mete yo sou zepòl li, epi li pote yo sou tèt mòn ki anfas Ebwon an.

Apre sa, li renmen yon fanm nan Fon Sorèk la ki te rele Dalila. Chèf Filisten yo vin jwenn li, yo di l: “Flate l pou ou ka konnen ki kote gwo fòs li a soti, ak kijan nou ka metrize l pou nou mare l pou nou donte l. Chak nan nou va ba ou mil san (1.100) pyès ajan.”

Dalila di Samson: “Di m ki kote gwo fòs ou a soti, ak kijan yo ta ka mare ou pou yo donte ou.”

Samson di l: “Si yo mare m ak sèt kòd banza fre ki poko chèch, m'ap vin fèb, m'ap tankou nenpòt lòt moun.”

Lè sa a, chèf Filisten yo pote sèt kòd banza fre ki poko chèch ba li, epi li mare l avèk yo. Li te gen moun kache ap tann nan chanm anndan an. Li di l: “Filisten yo sou ou, Samson!” Men li kase kòd banza yo tankou yon bren fil lèn kase lè li manyen dife. Konsa yo pa t dekouvri sekrè fòs li a.

Dalila di Samson: “Ou pase m nan betiz, ou ban m manti. Koulye a di m kijan yo ka mare ou.”

Li di l: “Si yo mare m byen sere ak kòd nèf ki poko janm sèvi, m'ap vin fèb, m'ap tankou nenpòt moun.”

Dalila pran kòd nèf, li mare l avèk yo, li di: “Samson, Filisten yo sou ou!” Te gen moun kache ap tann nan chanm anndan an. Men li chire kòd yo sot nan bra l tankou si se te fil.

Dalila di Samson: “Depi tout tan sa a w'ap pase m nan betiz, w'ap ban m manti. Di m kijan yo ka mare ou.” Li di l: “Si ou trese sèt très cheve tèt mwen yo nan twal metye a epi ou tache l byen sere, m'ap vin fèb tankou nenpòt moun.”

Li tache l ak pikèt la, li di l: “Samson, Filisten yo sou ou!” Men li leve nan dòmi an, li rache pikèt la, metye a ak twal la.

Li di l: “Kijan ou ka di ‘Mwen renmen ou’ pandan kè ou pa avè m? Twa fwa ou pase m nan betiz, ou pa janm di m ki kote gwo fòs ou a soti.”

Lè li t'ap peze l byen rèd ak pawòl li jou apre jou, li t'ap kenbe l nan kou san rete, Samson vin sitèlman bouke jouk li te anvi mouri. Se konsa li louvri tout kè l ba li: “Razwa pa janm manyen tèt mwen, paske mwen se yon nazireyen Papa nou depi nan vant manman m. Si yo raze m, fòs mwen ap kite m, m'ap vin fèb tankou nenpòt lòt moun.”

Lè Dalila wè li te louvri tout kè l ba li, li voye chèche chèf Filisten yo: “Monte yon lòt fwa ankò, paske li di m tout sa ki nan kè l.” Se konsa yo monte vin jwenn li ak ajan an nan men yo. Li fè l dòmi sou jenou l, li rele yon nonm, li fè l raze sèt très cheve tèt Samson yo. Li kòmanse donte l, epi fòs li kite l. Li di: “Filisten yo sou ou, Samson!” Li leve nan dòmi an, li di nan kè l: “M'ap soti tankou anvan, m'ap souke kò m pou m lib.” Men li pa t konnen Papa nou te kite l.

Filisten yo kenbe l, yo rache de je l, yo mennen l lavil Gaza. Yo mare l ak chenn kwiv, epi li t'ap moulen grenn nan prizon an. Men cheve tèt li kòmanse pouse ankò apre yo te fin raze l.

Papa a bay Samson fòs ankò yon lòt fwa

Chèf Filisten yo reyini pou yo ofri yon gwo sakrifis bay Dagon, bondye yo a, pou yo fè fèt, yo t'ap di: “Bondye nou an lage Samson, lènmi nou an, nan men nou.” Lè pèp la wè l, yo fè lwanj bondye yo a, yo t'ap di: “Bondye nou an lage lènmi nou an nan men nou, moun ki te ravaje peyi nou an epi ki te touye anpil nan nou.”

Lè kè yo te kontan, yo di: “Rele Samson pou l amize nou.” Se konsa yo mennen Samson soti nan prizon an, epi li t'ap amize yo. Yo fè l kanpe nan mitan de poto yo. Samson di tigason ki t'ap kenbe men l lan: “Kite m manyen poto kay la kanpe sou yo, pou m ka apiye sou yo.” Kay la te plen gason ak fanm; tout chèf Filisten yo te la, epi sou do kay la te gen anviwon twa mil (3.000) gason ak fanm ki t'ap gade Samson ap fè espektak li. Lè sa a, Samson rele Papa nou: “O Papa, ou menm ki gen tout pouvwa, tanpri, chonje m. Ban m fòs jis yon sèl fwa sa a, pou avèk yon sèl kou m ka fè Filisten yo peye pou de je m yo.” Samson kenbe de gwo poto ki te nan mitan epi ki t'ap kenbe kay la, li apiye kont yo, men dwat li sou youn, men gòch li sou lòt la. Samson di: “Kite m mouri ansanm ak Filisten yo.” Li pouse ak tout fòs li, epi kay la tonbe sou chèf yo ak tout moun ki te ladan l. Se konsa li touye plis moun lè li mouri pase pandan li te vivan.

Frè l yo ak tout moun lakay papa l desann, yo pran l, yo pote l moute, epi yo antere l ant Zora ak Echtawòl nan kavo Manoak, papa l la. Li te gouvène pèp Izrayèl la pandan ventan.