Onidajọ 17

17 ¹Ọkùnrin kan wà ní agbègbè olókè Efraimu, tí orúkọ rẹ̀ ń jẹ́ Mika. ²Ó sọ fún ìyá rẹ̀ pé, “Owó fàdákà ẹgbẹ̀rún kan ó lé ọgọ́rùn-ún tí a ti mú kúrò lọ́wọ́ yín, tí ẹ sì ṣẹ́ èpè lé e lórí—mo gbọ́ tí ẹ ń sọ ọ́—wò ó, owó fàdákà náà wà lọ́wọ́ mi; èmi ni ó mú un.” Ìyá rẹ̀ sì wí pé, “Kí Baba wa bùkún ọmọ mi.”

³Nítorí náà ó dá owó fàdákà ẹgbẹ̀rún kan ó lé ọgọ́rùn-ún náà padà fún ìyá rẹ̀, ìyá rẹ̀ sì wí pé, “Mo fi ọwọ́ ara mi ya owó fàdákà yìí sí mímọ́ fún Baba wa pátápátá, nítorí ọmọ mi, láti fi ṣe ère gbígbẹ́ àti ère dídà. Ní báyìí mo dá a padà fún ọ.”

⁴Ó dá owó fàdákà náà padà fún ìyá rẹ̀; ìyá rẹ̀ sì mú igba (200) nínú rẹ̀, ó sì fi fún alágbẹ̀dẹ fàdákà kan, ẹni tí ó fi ṣe ère gbígbẹ́ àti ère dídà; ó sì dúró nínú ilé Mika.

⁵Ọkùnrin yìí, Mika, ní ojúbọ kan, ó sì ṣe efodu àti àwọn òrìṣà ìdílé, ó sì yan ọ̀kan nínú àwọn ọmọ rẹ̀ gẹ́gẹ́ bí àlùfáà rẹ̀. ⁶Ní àwọn ọjọ́ wọ̀nyẹn, Israẹli kò ní ọba; olúkúlùkù ń ṣe ohun tí ó tọ́ lójú ara rẹ̀. ⁷Ọ̀dọ́mọkùnrin kan láti Betilehemu ní ilẹ̀ Juda, ti ìdílé Juda, jẹ́ ọmọ Lefi, ó sì ń gbé ibẹ̀. ⁸Ọkùnrin yìí kúrò ní Betilehemu ní ilẹ̀ Juda láti wá ibòmíràn láti gbé, bí ó sì ti ń rìn lọ, ó dé agbègbè olókè Efraimu, sí ilé Mika. ⁹Mika béèrè pé, “Níbo ni ìwọ ti wá?” Ó sì dáhùn pé, “Ọmọ Lefi láti Betilehemu ní ilẹ̀ Juda ni mí; mo ń wá ibì kan láti gbé.”

¹⁰Mika wí pé, “Dúró pẹ̀lú mi; kí o sì jẹ́ baba àti àlùfáà fún mi, èmi yóò sì fún ọ ní owó fàdákà mẹ́wàá lọ́dọọdún, aṣọ kan, àti oúnjẹ rẹ.” Nítorí náà ọmọ Lefi náà wọlé. ¹¹Ọmọ Lefi náà sì gbà láti dúró pẹ̀lú ọkùnrin náà, ọ̀dọ́mọkùnrin náà sì dàbí ọ̀kan nínú àwọn ọmọ rẹ̀ fún un. ¹²Mika sì yan ọmọ Lefi náà sípò, ọ̀dọ́mọkùnrin náà sì di àlùfáà rẹ̀, ó sì ń gbé nínú ilé Mika. ¹³Mika wí pé, “Ní báyìí mo mọ̀ pé Baba wa yóò ṣoore fún mi, nítorí mo ní ọmọ Lefi gẹ́gẹ́ bí àlùfáà mi.” ^a a v13 Mika ní ìdánilójú pé Baba wa yóò bùkún òun nítorí ó ti gba ọmọ Lefi kan ṣiṣẹ́ láti máa tọ́jú àwọn òrìṣà rẹ̀—àjálù ni láti fi orúkọ Baba pe ìsìn tí àwa fúnra wa dá sílẹ̀.