Jobu 32

32 ¹Nítorí náà, àwọn ọkùnrin mẹ́ta wọ̀nyí dẹ́kun dídáhùn fún Jobu, nítorí ó jẹ́ olódodo lójú ara rẹ̀. ²Nígbà náà ni ìbínú Elihu ọmọ Barakeli ará Busi, láti ìdílé Ramu, ru gbóná janjan. Ìbínú rẹ̀ ru sí Jobu nítorí ó dá ara rẹ̀ láre dípò Ọlọ́run. ³Ìbínú rẹ̀ sì ru sí àwọn ọ̀rẹ́ Jobu mẹ́tẹ̀ẹ̀ta pẹ̀lú, nítorí wọn kò rí ìdáhùn kankan, síbẹ̀ wọ́n ti dá Jobu lẹ́bi. ⁴Elihu sì ti dúró láti bá Jobu sọ̀rọ̀ nítorí àwọn yòókù dàgbà ju òun lọ. ⁵Ṣùgbọ́n nígbà tí Elihu rí i pé àwọn ọkùnrin mẹ́ta wọ̀nyí kò ní ohun kankan láti sọ, ìbínú rẹ̀ ru. ⁶Nítorí náà, Elihu ọmọ Barakeli ará Busi sọ̀rọ̀ pé: “Èmi wà ní èwe ní ọjọ́ orí, ẹ̀yin sì dàgbà; ìdí nìyí tí mo fi fà sẹ́yìn, tí ẹ̀rù ń bà mí láti sọ ohun tí mo mọ̀ fún yín. ⁷Mo rò pé, ‘Jẹ́ kí ọjọ́ orí sọ̀rọ̀, kí ọdún púpọ̀ sì kọ́ni ní ọgbọ́n.’ ⁸Ṣùgbọ́n ẹ̀mí tí ń bẹ nínú ènìyàn, èémí Olódùmarè, ni ó ń fún ni ní òye. ⁹Kì í ṣe àwọn àgbà ni ó gbọ́n, bẹ́ẹ̀ ni kì í ṣe àwọn arúgbó tí ó ní òye ohun tí ó tọ́. ¹⁰Nítorí náà mo wí pé, ẹ fi etí sí mi; èmi náà yóò sọ ohun tí mo mọ̀. ¹¹Ẹ wò ó, mo dúró de ọ̀rọ̀ yín; mo fetí sí ìjìròrò yín nígbà tí ẹ ń wá ohun tí ẹ ó sọ. ¹²Mo fiyè sí yín ní kíkún; ṣùgbọ́n kò sí ẹnìkankan nínú yín tí ó fi hàn pé Jobu ṣìnà tàbí tí ó dáhùn àwọn àríyànjiyàn rẹ̀. ¹³Nítorí náà, ẹ má sọ pé, ‘Àwa ti rí ọgbọ́n; jẹ́ kí Ọlọ́run tako rẹ̀, kì í ṣe ènìyàn.’ ¹⁴Jobu kò to ọ̀rọ̀ rẹ̀ jọ sí mi lẹ́nu, èmi kì yóò sì fi àwọn àríyànjiyàn yín dá a lóhùn. ¹⁵Ara wọn ti dàrú, wọn kò sì ní ohun mìíràn láti sọ; ọ̀rọ̀ ti kùnà fún wọn. ¹⁶Ṣé kí n dúró, nísinsìnyí tí wọ́n ti dákẹ́, nísinsìnyí tí wọ́n dúró síbẹ̀ láìní ìdáhùn? ¹⁷Èmi náà yóò sọ tèmi; èmi náà yóò sọ ohun tí mo mọ̀. ¹⁸Nítorí ọ̀rọ̀ kún inú mi; ẹ̀mí tí ń bẹ nínú mi ń rọ̀ mí. ¹⁹Nínú mi, mo dàbí wáìnì tí kò ní ojú afẹ́fẹ́, bí ìgò awọ wáìnì tuntun tí ó fẹ́rẹ̀ bẹ́. ²⁰Mo gbọ́dọ̀ sọ̀rọ̀ kí n lè ní ìtura; mo gbọ́dọ̀ ya ètè mi kí n sì dáhùn. ²¹Èmi kì yóò ṣe ojúsàájú sí ẹnikẹ́ni, èmi kì yóò sì fi ọ̀rọ̀ dídùn tan ẹnikẹ́ni; ²²nítorí èmi kò mọ bí a ṣe ń fi ọ̀rọ̀ dídùn tan ni—bí mo bá ṣe bẹ́ẹ̀, Ẹlẹ́dàá mi yóò tètè gbé mi lọ.”