Jobwui Ngasotnaobing Kasaikha Pamhaowa
Ngasotnao kathumna ngahānkā ngasāmhaowa, kala shāchinglak khalei Elihu kaji yaronnao akhana malungvāthaowa: Jobna akhalattawui mashun sāwui vang ali malungvāta, kala ngasotnaobingna ngahānkā maleila ali yonkhuiwui vang athumlila malungvāta. Thangkhamei chi Sāshap-pangshapawui khaksui eina rai, kasarnaomang eina maningmana, da ana hānga.
32 1Chiwui vang eina mipā kathum china Jobli ngahānkā thāhaowa, kaja ana akhalatta mikli khamashunga da phaninga. 2Chieina Ram shimkhurwui Buz Barachelwui nao Elihuwui malungkhavāt tāshunghaowa. Awui malungkhavāt Jobwuitungli leihaowa, kaja ana Vare maningla akhalattali mashung ngasaka. 3Awui malungkhavāt Jobwui ngasotnao kathumbingwuitunglila leihaowa, kaja athumna ngahānkā masamphangmada chithālala Jobli yonngasaka. 4Ara Elihuna Jobli hāngkhavai ngaraipama, kaja khangateibing china a thāda kharara. 5Kha Elihuna mipā kathum china hāngkhavai maleimana chi theida, awui malungkhavāt tāshunghaowa. 6Chiwui vang eina Buz Barachelwui nao Elihuna hānga: "Ina zingkum eina nganuikhameina, kala nathum kasarnaona; chiwui vang eina nathumli iwui theida khalei chi hāngkida ngacheeda ina thāhaira. 7Ina phaninga, 'Kasarnaobingla hāngranu, kala zingkum kachungkhana thangkhamei tamchitheiranu.' 8Kha mili khalei manglā chi Sāshap-pangshapawui khaksuina, kala china theishingkakhui ngarumsanga. 9Rarnaobing chi thangkhamana maningmana, kala khamashung khangarong theishingkakhui chila kasarnaobing maningmana. 10Chiwui vang eina ina hāngga, ili nganālu; inala iwui theida khalei chi hāngga. 11Yanglu, ina nathumwui tuili ngaraipama; nathumna khi hāngkhavaikhala da phaishilakha, nathumwui khangayāt ina nganākhui. 12Ina nathumli ningkachang eina nganātitkhui; kha nathum akhanala Jobli mamashungla da mahāngrarmana, lah awui tuingaphun mangahānkāmana. 13Chiwui vang eina mahānglu, 'Ithumna thangkhamei ngasāhaira; mikumo maningla Varena ali khayon chitheiranu.' 14Jobna awui tui iwui aworli mamarsemana, kala ina nathumwui tuingaphun eina ali mangahānkāmara. 15Athum malung ringhaira lāngda mahangluimara; tuina athumli nothāhaira. 16Athum kasaikha pamhaida, mangahānkāla apam chili nganingda leiwui vang, ina ngarai pamphalungrala? 17Inala iwui tui hāngga; inala iwui theida khalei chi hāngga. 18Kaja iva tuina pemtinghai; iwuili khalei manglāna ili kuinammi. 19Iningli, iva kāshunglak malewui drakhāra̱ thai, ngawokkhaisangki jihaira sāhuikhao kadhar thai. 20Ina hāngda vikasang samphangphalungra; imorchai makāda ngahānkāphalungra. 21Ina khipālikha mijang masāmara, kala khipākhala masotmasaomara; 22kaja kathāda sotmasaorakhala da ina matheimana; chi saakha, iwui Kasaana ili thākta khuithuihaora."
