Job 31

31 ¹"Ina imikli tuingashit sai; chithākha kathada ina kachingva̱ ngalānao akhali yangpaira̱khala? ²Kaja atungshong khalei Varewui eina ina khi yar samphangpaira̱khala, kajuipamli khalei Sāshap-pangshapawui eina khi shimlui samphangpaira̱khala? ³Shitkasang makhaleibingli unshimui maningmala, kala makaphā kasābingli kalākashi maningmala? ⁴Ana iwui apong matheimala, kala iwui pheikār saikora mashānkhuila?

⁵"Kalikhada ina kakapik tui eina ringakha, kala iphei mikhanamli ngasamzangakha, ⁶ana khamashung khān eina ili tamyangranu, kala Varena iwui ningsākhangazip theiranu, ⁷Kalikhada iwui pheikār apongwui eina ngareithuiakha, kala iningna imik shurakha, kala ipāngli chukhara̱ khipānakha katimakha, ⁸chithakha ina athā yaolaga khangateina shairanu, kala iwui vang kharkhangasak kahai chi phurshokhaoranu.

⁹"Kalikhada iningna sha̱nao akhali ningchāngakha, kala iwui khongnaiwui khāmongli ngathumda nganingakha, ¹⁰chithakha iwui preiva̱na mayarnao khangatei akhali otram ngatha̱ranu, kala kateibingna ali ngasoranu. ¹¹Kaja chi kakhayak khalāng akhana, bicharkhangayi morei akhana; ¹²kaja chi sāshimān pam vāpeida kachuia meina, kala iwui māhā saikora chuitāra.

¹³"Kalikhada iwui rao mayarnao lah rao sha̱naona iwuitungli maringkaphā khuirā tharan, ina athumwui mashun khayeithuiakha, ¹⁴chithakha Varena ngakarthui tharan ina khi sārakhala? Ana ili ngahānkup tharan, ina ali khi ngahānkārakhala? ¹⁵Ili naopamli sākahai china iwui raoli chila masāmala? Naopamli ithum khani chi akhamāngna sākahai maningmala?

¹⁶"Kalikhada ina kachāmabingwui kapopo chi haiakha, lah ra̱meiva̱wui mik ngachāng chatngasakakha, ¹⁷lah avāva̱ makhalei naona mashaila leilakha, iwui kashakazā amāngna shaiakha, ¹⁸kaja I nganuilakhawui eina thuida ali avā thāda homa, kala ishava̱wui naopamwui eina thuida ra̱meinaoli ngakuizata, ¹⁹kashankachon mavāt eina shimānhaokida khipākha ina theiakha, lah faror makhalei khavāta akha theiakha, ²⁰iwui yaowui yaohah eina ali kuimarei ngasakwui vang, awui phasā katongana ili masomiakha, ²¹kārotli iwui ngachon theilaga marānaoli ipāng singakha, ²²chithākha iwui yartui ara̱kui eina shimenshoka ngasakranu, kala iwui pāngthei ashaksha̱li chakshokhaoranu. ²³Kaja Varewui eina unshimui ili khangachee ngasakta, kala awui khangamkharei mangāli ina khiotkha masārarmana.

²⁴"Sināli iwui ning horkasang sāakha, lah sinā kahaili, 'Na iwui chihān khavaina,' da hāngakha, ²⁵iwui lan hak da, kala ipāngna kachungkha samkaphangwui vang lāngsoakha, ²⁶zimik ahor tharan chili yangakha, lah kachāng khayākakā eina kazat chili yangakha, ²⁷chieina ining ngathumda thānngui kahaida, kala ipāngna athumli khorum sāda khamaya̱ chihoakha, ²⁸hinala bichar sāngai morei ngasāra, kaja ina atungshong khalei Vareli mikhanam sākahaina.

²⁹"Ili ningkachai a chiwui kashimānli ina ringphaakha, lah awuitungli harmon kharā tharan malungmalaokaiakha. ³⁰awui manglāli khonshi pomida ina ikhamorli morei sākhavai masāthulakranga, ³¹iwui shimkhurwui mibingna, 'Awui table eina khipākha kashak mapemsikhala?' da mahānglakmana, ³²kha̱mi akhala shongfali ngayā masāmkhuilakranga, kaja ina ramkazatali iwui khāmong shomkahaina. ³³Mi kateibing thāda iwui khayonkhamāng iwuklungli thummida, iwui morei thumhaiakha, ³⁴kaja ina yaruili tarākha ngacheenāhaida, kala shimkhurbingwui khamashātna ili ngachee ngasakta, chieina I kasaikha pamda, ayarli mashoklakranga.

³⁵Ā, kachikathāna ili nganāranu! Yanglu, hi iwui shālam mili china— Sashap-pangshapana ili ngahānkāranu! Ili kaphena eina awui khayon lairik chi kapisang ngasāranu! ³⁶Mha, ina chi iwui yartuili phungkhuida, kuihon kathā ina chi iwuitungli khalapkhuira. ³⁷Iwui pheikār kachiva̱wui hishap ina ali chitheira; wungnao kathā ina awui ngalemli khuirāra.

³⁸Kalikha iwui ngaleina ili makhamayā ngakaoakha, kala awui tinkhurbing chi rumda chapngachaiakha, ³⁹kalikha awui khamathei chi pheisā mashānla ina shaiakha, lah awui akhavābingwui manglā khuithuiakha, ⁴⁰chithāda mā mahutli ka̱shāt kharranu, kala nāpai mahutli khawomāng kharranu." Jobwui tui kuphaira.