Job 30

30 ¹Kha ara ila nganui kajebingna ili mana̱shiya; athum chi, athumwui avā ngarāli iwui yao ashangva̱wui fabing eina ngasozat khavai ina mamayāmthumthu kajibingna. ²Athumwui pāngwui yāng chi ili khi kaphā leikhala? Athumwui pangshap vānhaira. ³Chām kala hungshina kaothek ngasaklaga, athumna ramcho kala lamhāng tangmangting alungli horkahai ngalei maziya. ⁴Thingphei ngachaili athumna machi ra̱hā ngatamda, thingpompa̱wui angayung athumwui kashakazā sāhaowa. ^a a v4 Machi ra̱hā kala thingpompa̱bing hi lamhāngli phorkahai thingnā ngachāsāna — kachāma reikhamateibingwui naomeikapta kashakazāna. ⁵Athumli miwui ngachaiwui eina kashamshokhaowa; mibingna khale mili vao thāda athumwui thili panglāk eina vaowa. ⁶Athumna thengkahai kongrā kathuthukli, ngaleikhur kala lunghārwui akhurli pam kajina. ⁷Thingphei ngachaili athumna ngavaowa; ka̱shāt azingli athum khokkha sāda rākazipa. ⁸Mangma̱, namei makhalei naongarābing, athumli ngalei chiwui eina kashamshokhaowa.

⁹Kala ara ina athumwui mana̱shi laa ngasāhaira; athumwui vang I chānsā khavai ngasāhaira. ¹⁰Athumna ili ningkachaida, katāda leira; imaili machora̱ shok khavai athumna khāng masāmana. ¹¹Varena iwui riwui khara̱ khalāmi kala ili teongasakhaiwui vang, athumna iwui mangāli khāngkhami saikora chihohaira. ¹²Iwui yāpang shong khamaripabing ngakarthuiya; athumna iphei heishokta, ili ngararda kashimānwui shairon ngarānphina. ¹³Athumna iwui shongfa sāshimānmi; iwui unshimuili athumna tongza khuiya, kala athumli khāng kasa khipākha maleimana. ¹⁴Kakai kajuiva̱ akhawui eina thāda athum tāngararra; khangashumkhon alungli athum malaokazamda rai. ¹⁵Khangachee khangachā ili vāshung ngasaka; iwui khayākakā masi thāda phanshokhaowa, kala iwui shāngshun muiyā thāda ngara̱thuihaowa.

¹⁶Kala ara iwui manglā iwuklungli heishokhaira; kachotkachāng zimikshobingna ili thankhuihaira. ¹⁷Ngayāshong iwui ara̱kui rungthata, kala ili kaji kachotkachāng chi mangasāmkhuimana. ¹⁸Panglāk eina iwui kachon hākakhuihaira; iwui kachonwui longkharor thāda ili mantithaira. ¹⁹Ithumwui Avāna ili rāhukli horsanghaira, kala ina chifa eina hotlā thāda ngasāhaira.

²⁰"Ina nali khangachon poi, kha nana ili mangahānkāmana; ina ngakarthui, kha nana ili yangmi, khikha masāmimana. ²¹Nana iwuitungli sakashe onhaira; napāngwui yāng eina nana ili ngasunga. ²²Nana ili masishong khāngmathotta, chitungli ili tongngasaka; sur ngaphaokhon lungli nana ili ngareishok ngareizang ngasakmi. ²³Kaja nana ili kathili, kharingabing saikorawui vang makānkhami shimli thuiyuimira da ina thei.

²⁴"Chithālala, ja̱tā kahailungli khipānakha pāng makhāngmara, lah awui kalākashi atamli khangachon makaomara? ²⁵Azimik kharā mi chiwui vang ina machapmala? Iwui manglāna khavātabingwui vang machotmala? ²⁶Kha ina khamathā chihānlala, makaphā rāhaowa; ina kahor ngarai tharan, tangkhamang tāhaowa. ²⁷Iwui akhari-akharā ngaphaoda, chingri mahairarmana; kachotkachāng zimikshobingna ili ngasunga. ²⁸Imai hunghaida ina zata, chi zimikwui vang maningmana; yarui kazipli ina ngakarthuida khangachon ngakao. ²⁹Ina ramfabingwui ichinā ngasāhaira, kala ostrichbingwui khavāknao ngasāhaira. ³⁰Iwui phasā hungda pa̱tāhaora, iwui eina raikhuihaira, kala iwui ara̱-arā kakharurna riktāhaora. ³¹Iwui tingteilā sikafa onhaira, kala iwui sipa̱ kachapkhon onhaira."