Mi eng' bukuit
Bukuit

Kagilet Ketubennyu Agobo Riiryet

Nguno ko aegu songolyet eng' lagogap piik che ma ki achame kondo kobooto sesenigap tuuganyi, ak koloisyei kosing'ilji togeennyi. Belbeltos koiyekyik eng' kemeut. Kole kagotyach Kwandanyo eng' mireiywot ak kowolji riirennyi eng' siseet kityo.

Sura 30.

“Ago nguno ko kororisyei anee pichu che mengech kosiiro — murenik che kwanisyekwak ma ki amach akonde kobooto sesenigap tuuganyu. Tos igoochi nee anee kimnateetap eunekwak? Kagogees kimnateennywa. Sogityotiin eng' rerunet ak rubeet, koamei ng'wony ne yametaat eng' imenindo ne po karaatya ak kuberot. Kochobei soborik eng' sondisyek, ak ki ek rootwetap keetiigap junipa amitwogikwak. a a v4 Soborik ak keetiigap junipa ko sogoyoik che mengech che mi surkwen — amitwogik che nyoorunee kityo pichu che bananotiin miising'. Ki kimut icheek kobun kwenutap piik; ak kiboldoschi piik kosubi icheek ko uu ye isubi choorindet. Kanyool komeny eng' keriingonigap oinoosyek che yametaat, eng' keriingonigap ng'wony ak rwandosyek. Kowaach eng' sondisyek; kaiyumgei ng'wony eng' sosiisyek. Lagogap piik che abusotiin, che ma kiname, ki kimut icheek kobun emet.

“Ago nguno ko kaegu songolyennywa ne po taunet; aegu kiy ne kororisyei icheek. Kowechei anee ak koloisyei kobun anee; ma kweei kosing'ilji togeennyu. Amu kagotyach Kamuktaindet rogooyetap kwong'uutinnyu ak koming'inwo, kagoisto icheek kaingetwek tugul eng' tainnyu. Eng' eunnyu ne po tai kong'etune piik; kopuoch keelyekyuk kuwe oldo, ak koteech oldoisyekap lugeet che ibu ng'emisyet kong'eetwo. Kotyetei ooreennyu; konyoorunee eng' nyalildanyu, ago ma mi chii ne kweei icheek. Konyonei icheek ko uu ye chutei oldo ne oo; kobolotei kobwonei eng' kwenutap tuleet ne oo. Ki kiyae kamuisosyek kong'eetwo; kaimut toroornatennyu ko uu ye imut usoonet, ak kagobata perurtanyu ko uu pooldet.

“Ago nguno ko kagopiitak saboondanyu eng' kwenunnyu; ki kanama peetuusyegap nyalilda. Eng' kemout ko kitoor keelyekyuk kosoorugei; ak ma muuny ng'wanisyek che amwo. Eng' kimnateet ne oo ko ki kiwirir ngoroonyu; korate anee komyee ko uu kaatitap tuninnyu. Kagowiirwo Kwandanyo eng' mireiywot, ak kaegu ko uu temburyek ak oreek.

“Akuretin si itorechwo, ago ma iwolwoo; atonone, ago igeerwo kityo. Kiweekyi iegu ne koroom eng' anee; ipirwo eng' kimnateetap eung'ung'. Inaitwo parak kuwe usoonet ak igoochi alaany; iwirwirwo eng' tuleetap usoonet ne oo. Amu angen ile iibwo ng'wony kuwe meet, kuwe koot ne ki king'at agobo tugul che sobeen.

“Ago tos ma mi chii ne chuul eunnyi kobun karaatya, anan ne kuurei toreteet eng' nyalildanyi? Tos ma ki ariiree agobo chiito ne ki tinyei peetuut ne ng'wan? Tos ma ki aragen muguleldanyu agobo kibananook? Ago ye ki amang'u mieet, konyo ne ya; ye ki ariibe lapkeiyet, konyo imenindo. Churook agutanikyuk ak ma siisyo; kabwonji anee peetuusyegap nyalilda. Awendoti atuuit, ago ma ki ituu asiista; atonone eng' tuiyet ak akuret toreteet. Kaegu tupchetap kimagetiik, ak chorweetap wuutik. Kotuuit wagiitennyu ak kopeelei kong'etune, ak lalei keelyekyuk eng' maat ne mi poorto. Kaegu ketubennyu ne po arageneet, ak ndurerunnyu ne po tuleetap riirek.”