Kagilet Ketubennyu Agobo Riiryet
Nguno ko aegu songolyet eng' lagogap piik che ma ki achame kondo kobooto sesenigap tuuganyi, ak koloisyei kosing'ilji togeennyi. Belbeltos koiyekyik eng' kemeut. Kole kagotyach Kwandanyo eng' mireiywot ak kowolji riirennyi eng' siseet kityo.
30 1“Ago nguno ko kororisyei anee pichu che mengech kosiiro — murenik che kwanisyekwak ma ki amach akonde kobooto sesenigap tuuganyu. 2Tos igoochi nee anee kimnateetap eunekwak? Kagogees kimnateennywa. 3Sogityotiin eng' rerunet ak rubeet, koamei ng'wony ne yametaat eng' imenindo ne po karaatya ak kuberot. 4Kochobei soborik eng' sondisyek, ak ki ek rootwetap keetiigap junipa amitwogikwak. a a v4 Soborik ak keetiigap junipa ko sogoyoik che mengech che mi surkwen — amitwogik che nyoorunee kityo pichu che bananotiin miising'. 5Ki kimut icheek kobun kwenutap piik; ak kiboldoschi piik kosubi icheek ko uu ye isubi choorindet. 6Kanyool komeny eng' keriingonigap oinoosyek che yametaat, eng' keriingonigap ng'wony ak rwandosyek. 7Kowaach eng' sondisyek; kaiyumgei ng'wony eng' sosiisyek. 8Lagogap piik che abusotiin, che ma kiname, ki kimut icheek kobun emet.
9“Ago nguno ko kaegu songolyennywa ne po taunet; aegu kiy ne kororisyei icheek. 10Kowechei anee ak koloisyei kobun anee; ma kweei kosing'ilji togeennyu. 11Amu kagotyach Kamuktaindet rogooyetap kwong'uutinnyu ak koming'inwo, kagoisto icheek kaingetwek tugul eng' tainnyu. 12Eng' eunnyu ne po tai kong'etune piik; kopuoch keelyekyuk kuwe oldo, ak koteech oldoisyekap lugeet che ibu ng'emisyet kong'eetwo. 13Kotyetei ooreennyu; konyoorunee eng' nyalildanyu, ago ma mi chii ne kweei icheek. 14Konyonei icheek ko uu ye chutei oldo ne oo; kobolotei kobwonei eng' kwenutap tuleet ne oo. 15Ki kiyae kamuisosyek kong'eetwo; kaimut toroornatennyu ko uu ye imut usoonet, ak kagobata perurtanyu ko uu pooldet.
16“Ago nguno ko kagopiitak saboondanyu eng' kwenunnyu; ki kanama peetuusyegap nyalilda. 17Eng' kemout ko kitoor keelyekyuk kosoorugei; ak ma muuny ng'wanisyek che amwo. 18Eng' kimnateet ne oo ko ki kiwirir ngoroonyu; korate anee komyee ko uu kaatitap tuninnyu. 19Kagowiirwo Kwandanyo eng' mireiywot, ak kaegu ko uu temburyek ak oreek.
20“Akuretin si itorechwo, ago ma iwolwoo; atonone, ago igeerwo kityo. 21Kiweekyi iegu ne koroom eng' anee; ipirwo eng' kimnateetap eung'ung'. 22Inaitwo parak kuwe usoonet ak igoochi alaany; iwirwirwo eng' tuleetap usoonet ne oo. 23Amu angen ile iibwo ng'wony kuwe meet, kuwe koot ne ki king'at agobo tugul che sobeen.
24“Ago tos ma mi chii ne chuul eunnyi kobun karaatya, anan ne kuurei toreteet eng' nyalildanyi? 25Tos ma ki ariiree agobo chiito ne ki tinyei peetuut ne ng'wan? Tos ma ki aragen muguleldanyu agobo kibananook? 26Ago ye ki amang'u mieet, konyo ne ya; ye ki ariibe lapkeiyet, konyo imenindo. 27Churook agutanikyuk ak ma siisyo; kabwonji anee peetuusyegap nyalilda. 28Awendoti atuuit, ago ma ki ituu asiista; atonone eng' tuiyet ak akuret toreteet. 29Kaegu tupchetap kimagetiik, ak chorweetap wuutik. 30Kotuuit wagiitennyu ak kopeelei kong'etune, ak lalei keelyekyuk eng' maat ne mi poorto. 31Kaegu ketubennyu ne po arageneet, ak ndurerunnyu ne po tuleetap riirek.”