Garayata Ta Koma Makoki

Yanzu 'ya'yan mutanen da ba zai amince musu da karnukan garkensa ba suna mai da shi waƙarsu, suna tofa masa yau a fuska. Ƙasusuwansa suna ƙuna da dare. Ya ce Ubanmu ya jefa shi cikin laka, yana amsa kukansa da kallo kawai.

Babi na 30.

“Amma yanzu waɗanda suka fi ni ƙuruciya suna yi mini dariya—mutane waɗanda da ban yarda in sa ubanninsu tare da karnukan garkena ba. Wane amfani ƙarfin hannuwansu zai yi mini? Ƙarfinsu ya ƙare. Sun rame saboda talauci da yunwa, suna cizon busasshiyar ƙasa cikin duhun kufai da kango. Suna tsintar ganyen gishiri a cikin daji, saiwoyin itacen ratam kuwa su ne abincinsu. ^a An kore su daga cikin mutane; mutane suna ihu a bayansu kamar a bayan ɓarawo. Dole su zauna a cikin raƙuman busassun koguna, a cikin ramuka na ƙasa da na duwatsu. A cikin daji suna kuka; a ƙarƙashin ƙaya suna taruwa wuri ɗaya. Zuriya marasa hankali, marasa suna, an kore su daga ƙasar.

“Yanzu kuwa na zama waƙar ba'arsu; na zama abin dariya a gare su. Suna ƙyamata suna nisance ni; ba sa ƙin tofa mini miyau a fuska. Domin Allah ya kunce igiyar bakana ya ƙasƙantar da ni, sun yar da dukan ladabi a gabana. A hannun damana taron banza suna tashi; suna turmusa ƙafafuna a gefe suna kuma gina tudun kewaye na hallaka a kaina. Suna ɓata hanyata; suna cin gajiyar masifata, kuma babu mai hana su. Suna matsowa kamar ta wata faɗaɗɗiyar kafa; cikin rurin rushewa suna ruga ciki. An saki razana a kaina; an kori darajata kamar da iska, wadatata kuwa ta shuɗe kamar girgije.

“Yanzu kuwa raina yana zubewa a cikina; kwanakin wahala sun kama ni. Da dare ana huda ƙasusuwana, ciwon da yake cizona kuwa ba ya hutawa. Da iko mai girma ana murɗa tufafina; yana ɗaure ni ƙam kamar wuyan rigata. Ubanmu ya jefa ni cikin caɓi, na kuma zama kamar ƙura da toka.

“Ina kuka gare ka don neman taimako, amma ba ka amsa mini ba; na tashi tsaye, sai dai kana kallona kawai. Ka zama mai zalunci a gare ni; da ƙarfin hannunka kana kai mini hari. Ka ɗaga ni sama cikin iska ka sa ni hawa; kana yafa ni nan da can cikin rurin hadari. Gama na sani za ka saukar da ni zuwa mutuwa, zuwa gidan da aka keɓe wa dukan masu rai.

“Duk da haka, ashe babu wanda yake miƙa hannu daga cikin kufai, ko yă yi kuka don neman taimako cikin masifarsa? Ban yi kuka saboda wanda ranarsa take da wuya ba? Raina bai yi baƙin ciki saboda matalauci ba? Amma sa'ad da nake sa rai ga alheri, sai mugunta ta zo; sa'ad da nake jiran haske, sai duhu ya sauko. Cikina yana tuntuɓewa, ba ya natsuwa; kwanakin wahala suna fuskantata. Ina zagawa baƙaƙe, amma ba ta wurin rana ba; na tashi tsaye a cikin taro ina kuka don neman taimako. Na zama ɗan'uwa ga diloli na kuma zama abokin jiminai. Fatata ta yi baƙi tana ɓaɓɓarewa daga jikina, ƙasusuwana kuma suna ƙuna da zazzaɓi. Garayata ta koma makoki, sarewata kuma ta koma muryar kuka.”