Mi eng' bukuit
Bukuit

Kayasyoetap Iyob agobo muguleldo ne tiliil

Igees Job eng' arorutyet, koyaat saboondanyi kiy age tugul kiit age tugul: ma po mageet ne ng'waan, ma po lembech, ma po maastetap kirwoogetap otwogindet, ma po amyet ineegei ye kang'et lakwa ne ma tinyei sigiik, ma po iyanetap thahabu. Isir ineendet niito ak kosoom ng'aleek che kiyachin. Yeityo kobeeti kityo ng'aleekyik.

Sura 31.

“Kaayai arorutyet ak koonyek; aimuuchi ano anyun ageere pergeiyandet? Amu nee kebeberta ne atinye eng' Kamuktaindet ne mi parak, ak nee poroteet eng' Ne Kimnateet ne mi parak? Tos ma nyalilda ne po che ma po imanda, ak ng'emisyet ne po che yaei tuguuk che yaach? Tos ma geere ineendet ortinwekyuk, ak kosore tyegutikyuk tugul?

“Ngot ko ki awendotee eng' lembech, ak ki kosiis keeldanyu kween keniisyet, ingeweigei anee eng' kebebaik che po iman, ak ingonai Kamuktaindet imandanyu, ngot ko ki kowal tyegutikyuk eng' ooreet, ak ki kosup muguleldanyu koonyek, ak ki komeitoochi euneguk kiy age tugul ne ng'waan, ingoagool anyun anee ak koam age, ak ingoitutu kiy che piitos anee.

“Ngot ko ki kiberber muguleldanyu eng' kwony, ak ki aung'egei eng' kurgeetap chiitap kokwennyu, ingoboisyechi kwondanyu murenet age, ak ingotuiyogei alak ak ineendet. Amu nooto ko lelutyet ne po teweernateet, tengek ne nyoljin kirwooget; amu ko maat ne peelei agoi ng'emisyet, ak kowong' amitwogikyuk tugul.

“Ngot ko ki amaas kirwoogetap otwogindennyu ne murenet anan ne chepyoso, ye ki konyo komwa ng'aleekwak agobo anee, nee anyun ne ayae ye ng'eetei Kamuktaindet? Ye kuurso anee si akonu ng'aleek, nee ne awolji ineendet? Tos ma ineendet ne ki toi anee eng' moet, ne ki toi otwogindennyu agine? Tos ma ineendet agenge ne ki yaech echeek aeng' tugul eng' moet?

“Ngot ko ki asisto poortanyi kiy ne king'at, anan ko ki ayai konyegap mosoget koleeluuny, anan ko ki aame amitwogikyuk akobatee anee, ko ma ame lakwa ne ma tinyei sigiik, nganda ko kong'eet murenanyu koasiikse ineendet ko uu kwanda ne yaei, ak kong'eet moetap kamennyu aindochi mosoget, ngot ko ki ageer chii age tugul kome amu kanyalil ngoroik, anan kibananiandet ne ma tinyei ne itugegei, ngot ko ma koberuura komugulyonyi, amu ki ayachi kolaaluny eng' koroorigap keechiirekyuk, ngot ko ki aboiis eunnyu kong'et lakwa ne ma tinyei sigiik, amu ki ageer piik che toreto eng' kirwooget, ingong'ulyel anyun loogotnyu eng' komostanyi, ak ingopal eunnyu eng' ole tuiyechin kawegap euut. Amu ki po arageneet anee nyalilda ne punu Kamuktaindet, ak eng' taitap telunatennyi ko mamuuch ayai kiy age tugul.

“Ngot ko ki ayai thahabu kamang'unennyu, anan ko ki aleenji thahabu ne karaaran, ‘Inyee ko kaarorunennyu,’ ngot ko ki abaibaitu amu mogornatennyu ki oo, amu ki asich che chaang' eng' eunnyu, ngot ko ki ageere asiista ye charu, anan arawet ye wendi eng' liilindanyi, si kiberber muguleldanyu eng' ng'aalseet, ak ki ang'utut eunnyu koek toroosennywa, nooto agine ko tengek ne nyoljin kirwooget, amu ki aeesyo Kamuktaindet ne mi parak.

“Ngot ko ki abaibaitu eng' ng'emisyet ne po chiito ne wecho, anan ko ki ang'etegei ye ki koboose yaityet, Ma ki agoochi kutinnyu kotengek, eng' kuuret chuuba eng' saboondanyi, Ngot ma koleenji murenigap koonnyu, ‘Ng'oo ne ma kibiyong'so eng' mesanyi?’, Koma kiru toondet age tugul eng' ooreet, amu kayaatyi kurgotikyuk kiprutoiyot. Ngot ki aung'en tengekyuk ko uu piik alak, aunye chalwoktonyu eng' muguleldanyu, amu ki aiywei miising' piik che chaang', ak ki koiywea anee sasisyet ne po pororyosyek, si asiis ak koma awo saang'.

“Oo, koek komi chii ne kas anee! Chu kaboorunennyu— ingobiit kowol Ne Kimnatitin anee! Ingosir punyondennyu ng'aleekyik! Iman ale, aip eng' loogotnyu, arat anee ko uu naaryeet. Amwachi ineendet ng'aleegap tyegutikyuk tugul; ko uu pounindet anyoone ineendet.

“Ngot ki koriir emennyu agobo anee, ak koriir ruratosyekyik togeet, ngot ki aam logoekyik ama kagoito melekto, anan ki ang'em saboondap piik che tinyei, ingorut katook koweek nganuuk, ak susweek che ng'waan koweek baale.” Kagogesta ng'aleegap Iyob.