Yobe 31 FHB Father's Heart Bible™

31 ¹“Ine ndacita cibverano na maso anga; tenepo ndakwanisa tani kunyang'ana ntsikana? ²Thangwi mgawo wanji ukhadadikhala na ine wakubuluka kuna Mulungu wa kudzulu, unthaka wanji wakubuluka kuna Wamphambvu Zonsene ali kudzulu? ³Kodi nkhabe kuti ndi nyatwa kwa anyakusowa ulungami, na katsukwalo kwa ale anacita pyakuipa? ⁴Kodi Iye nkhabe kuona njira zanga, mbawerenga ngasi zanga zonsene?

⁵“Ndingakhala ndakhala mu uthambi, na mwendo wanga wathamanga mu cinyengo, ⁶mbandipime pa sikelo yakulungama, na Mulungu adziwe ulungami wanga, ⁷ngasi zanga zingakhala zacoka mu njira, na ntima wanga watowezera maso anga, na cakupswipa consene cakhomerera m'manja mwanga, ⁸penepo mbandibzwale, mbadya unango, na pinamera kuna ine pizuzwe.

⁹“Ntima wanga ungakhala wanyengezwa na nkazi, na ndabisala pa nsuwo wa ndzanga, ¹⁰penepo nkazi wanga mbatumikire mamuna unango, na anango agone na iye. ¹¹Thangwi penepi mbipidakhala pyakudawa pyakupasa manyadzo, madawo akuthema kutongwa; ¹²thangwi ndi moto unadya mpaka ku Cifudzo, mbupisa pyakubvuna pyanga pyonsene.

¹³“Ndingakhala ndakhondesa ulungami kuna ntumiki wanga wamamuna peno wankazi mu ndzidzi udabweresa iwo madandawulo kuna ine, ¹⁴penepo ndinacitanji Mulungu angalamuka? Angandibvundza, ndinamtawira tani? ¹⁵Kodi ule adandicita m'mimba nkhabe kucitambo ntumiki wanga? Kodi si m'bodzi ene adatiumba tonsene awiri m'mimba tayu?

¹⁶“Ndingakhala ndakhondesa anyakusauka pinafuna iwo, peno ndasiya maso a nkazi wamasiye kuneta, ¹⁷peno ndadya cakudya canga ndekhene mu ndzidzi ukhasowa nciriwa, ¹⁸ngakhale kubulukira m'uphale wanga ndankuza ninga baba mbadacita, na kubulukira m'mimba mwa mai wanga ndatsogolera nkazi wamasiye, ¹⁹ndingakhala ndaona munthu anafa thangwi yakusowa nguwo, peno nyakusauka wakusowa cakubvinkha, ²⁰untheme wace onsene ungakhala nkhabe kundipasa nkhombo thangwi yakuntentesa na ubvolo wa mabira anga, ²¹ndingakhala ndalamusa nkono wanga kumenya nciriwa thangwi ndaona ciphedzo canga pa bwalo ra kutongwa, ²²penepo pewa yanga mbigomolwe pa phango yace, na nkono wanga mbugwandike pa cigongono cace. ²³Thangwi nyatwa yakubuluka kuna Mulungu ikhandigopesa, na pamaso pa mbiri yace nkhabe kucita cinthu.

²⁴“Ndingakhala ndacita ouru kukhala cinyindiro canga, peno ndapanga ouru wadidi: ‘Iwe ndiwe citsidzikizo canga,’ ²⁵ndingakhala ndadzikuza thangwi mpfuma yanga ikhali ikulu, thangwi nkono wanga wagumana pizinji kakamwe, ²⁶ndingakhala ndanyang'ana dzuwa mu ndzidzi ukhayetima, peno mwezi mbukuyenda mwaumambo, ²⁷mwakuti ntima wanga wanyengezwa mwakubisika, na nkono wanga wapswompswona mwakulambira iwo, ²⁸penepi pontho mbipidakhala madawo akuthema kutongwa, thangwi mbandikhala ndankhonda kukhulupirika kuna Mulungu wa kudzulu.

²⁹“Ndingakhala ndakomerwa na kugwa kwa ule adandiida, peno ndatsandzaya pidamgwera iye pyakuipa. ³⁰nee ndatawirisa mulomo wanga kudawa mukuphemba citembo pa umaso wace, ³¹amuna a panyumba panga nee alonga tayu: ‘Mbani adakhonda kukhuta na cakudya ca pa meza yace?’, ³²nkhabe mlendo adagona panja mu nseu, thangwi ndafungulira misuwo yanga kuna anyakuyenda ulendo. ³³Ndingakhala ndabisa madawo anga ninga munacitira anango, mbandibisa mulando wanga n'kati mwa ntima wanga, ³⁴thangwi ndagopa kakamwe mwinji wa anthu, na kunyozwa kwa madzinza kukhandigopesa, mwakuti ndakhala dzii mbandikhonda kubuluka panja.

³⁵“Mbwenye, mbapadakhala munthu mbadandibvera! Ndisasiya cidzindikiro canga—mbatawire Wamphambvu Zonsene! Nyakundipambizira mbalembe citsutso cace! ³⁶Mwandimomwene mbandikwate pa pewa yanga, mbandimanga kuna ine ninga korowa. ³⁷Mbandimpereka cifokotozo ca ngasi zanga zonsene; ninga mwana wa mambo mbandinsendezera.

³⁸“Munda wanga ungakhala walira kutsutsana na ine, na migero yace yalira pabodzi, ³⁹ndingakhala ndadya pyakubvuna pyace mwakukhonda kulipa, peno ndapfudza umaso wa anyeniwo, ⁴⁰penepo mbimere minga m'mbuto mwa tirigu, na tsanga yakununkha m'mbuto mwa sevadha.” Mafala a Djobi amala.