ಯೋಬನ ಗ್ರಂಥ 31 FHB Father's Heart Bible™

31 ¹“ನಾನು ನನ್ನ ಕಣ್ಣುಗಳೊಂದಿಗೆ ಒಡಂಬಡಿಕೆಯನ್ನು ಮಾಡಿಕೊಂಡೆನು; ಹಾಗಿರಲು ಕನ್ಯೆಯನ್ನು ನಾನು ಹೇಗೆ ದಿಟ್ಟಿಸಬಲ್ಲೆನು? ²ಮೇಲಿರುವ ದೇವರಿಂದ ನನಗೆ ಯಾವ ಪಾಲು ದೊರೆದೀತು, ಉನ್ನತದಲ್ಲಿರುವ ಸರ್ವಶಕ್ತನಿಂದ ಯಾವ ಬಾಧ್ಯತೆ ದೊರೆದೀತು? ³ಅನ್ಯಾಯಗಾರರಿಗೆ ವಿಪತ್ತೂ ಕೆಟ್ಟದ್ದನ್ನು ಮಾಡುವವರಿಗೆ ವಿನಾಶವೂ ಬರುವುದಿಲ್ಲವೇ? ⁴ಅವರು ನನ್ನ ಮಾರ್ಗಗಳನ್ನು ನೋಡುವುದಿಲ್ಲವೇ, ನನ್ನ ಪ್ರತಿ ಹೆಜ್ಜೆಯನ್ನೂ ಲೆಕ್ಕಿಸುವುದಿಲ್ಲವೇ?

⁵“ನಾನು ಸುಳ್ಳಿನಿಂದ ಜೀವಿಸಿದ್ದರೆ, ನನ್ನ ಪಾದವು ವಂಚನೆಯೆಡೆಗೆ ಧಾವಿಸಿದ್ದರೆ, ⁶ಅವರು ನ್ಯಾಯವಾದ ತಕ್ಕಡಿಯಲ್ಲಿ ನನ್ನನ್ನು ತೂಗಲಿ, ದೇವರು ನನ್ನ ಯಥಾರ್ಥತೆಯನ್ನು ತಿಳಿದುಕೊಳ್ಳಲಿ, ⁷ನನ್ನ ಹೆಜ್ಜೆಗಳು ಮಾರ್ಗದಿಂದ ತಪ್ಪಿಹೋಗಿದ್ದರೆ, ನನ್ನ ಹೃದಯವು ನನ್ನ ಕಣ್ಣುಗಳನ್ನು ಹಿಂಬಾಲಿಸಿದ್ದರೆ, ಯಾವುದೇ ಕಲೆ ನನ್ನ ಕೈಗಳಿಗೆ ಅಂಟಿಕೊಂಡಿದ್ದರೆ, ⁸ಆಗ ನಾನು ಬಿತ್ತಲಿ, ಬೇರೊಬ್ಬನು ತಿನ್ನಲಿ; ನನಗಾಗಿ ಮೊಳೆತದ್ದು ಬೇರುಸಹಿತ ಕಿತ್ತುಹಾಕಲ್ಪಡಲಿ.

⁹“ನನ್ನ ಹೃದಯವು ಒಬ್ಬ ಸ್ತ್ರೀಯಿಂದ ಮರುಳುಗೊಂಡಿದ್ದರೆ, ನನ್ನ ನೆರೆಯವನ ಬಾಗಿಲಲ್ಲಿ ನಾನು ಹೊಂಚುಹಾಕಿ ಕಾದಿದ್ದರೆ, ¹⁰ಆಗ ನನ್ನ ಹೆಂಡತಿ ಬೇರೊಬ್ಬ ಪುರುಷನಿಗೆ ದುಡಿಯಲಿ, ಇತರರು ಅವಳೊಂದಿಗೆ ಮಲಗಲಿ. ¹¹ಅದು ನಾಚಿಕೆಗೇಡಿನ ದುಷ್ಕೃತ್ಯ, ನ್ಯಾಯತೀರ್ಪಿಗೆ ಅರ್ಹವಾದ ಪಾಪ; ¹²ಅದು ವಿನಾಶಲೋಕದ ವರೆಗೂ ದಹಿಸುವ ಬೆಂಕಿಯಾಗಿದೆ, ನನ್ನ ಬೆಳೆಯನ್ನೆಲ್ಲಾ ಸುಟ್ಟುಬಿಡುತ್ತಿತ್ತು.

¹³“ನನ್ನ ದಾಸನಾಗಲಿ ದಾಸಿಯಾಗಲಿ ನನ್ನ ವಿರುದ್ಧ ದೂರನ್ನು ತಂದಾಗ ಅವರಿಗೆ ನಾನು ನ್ಯಾಯವನ್ನು ನಿರಾಕರಿಸಿದ್ದರೆ, ¹⁴ದೇವರು ಎದ್ದಾಗ ನಾನೇನು ಮಾಡಲಿ? ಅವರು ನನ್ನನ್ನು ವಿಚಾರಣೆಗೆ ಕರೆದಾಗ ನಾನು ಅವರಿಗೆ ಏನು ಉತ್ತರಕೊಡಲಿ? ¹⁵ಗರ್ಭದಲ್ಲಿ ನನ್ನನ್ನು ನಿರ್ಮಿಸಿದವರೇ ನನ್ನ ದಾಸನನ್ನೂ ನಿರ್ಮಿಸಲಿಲ್ಲವೇ? ಗರ್ಭದಲ್ಲಿ ನಮ್ಮಿಬ್ಬರನ್ನೂ ಆ ಒಬ್ಬರೇ ರೂಪಿಸಲಿಲ್ಲವೇ?

¹⁶“ಬಡವರಿಗೆ ಅವಶ್ಯವಾದದ್ದನ್ನು ನಾನು ತಡೆಹಿಡಿದಿದ್ದರೆ, ವಿಧವೆಯ ಕಣ್ಣುಗಳನ್ನು ಬಳಲುವಂತೆ ಮಾಡಿದ್ದರೆ, ¹⁷ಅನಾಥನು ಏನೂ ಇಲ್ಲದೆ ಇರುವಾಗ ನನ್ನ ಆಹಾರವನ್ನು ನಾನೊಬ್ಬನೇ ತಿಂದಿದ್ದರೆ, ¹⁸ನನ್ನ ಯೌವನದಿಂದಲೇ ತಂದೆಯಂತೆ ನಾನು ಅವನನ್ನು ಸಾಕಿದ್ದೇನೆ, ನನ್ನ ತಾಯಿಯ ಗರ್ಭದಿಂದಲೇ ವಿಧವೆಯನ್ನು ನಡೆಸಿದ್ದೇನೆ, ¹⁹ಬಟ್ಟೆಯಿಲ್ಲದೆ ನಾಶವಾಗುತ್ತಿರುವ ಯಾರನ್ನಾದರೂ, ಹೊದಿಕೆಯಿಲ್ಲದ ಕೊರತೆಯುಳ್ಳವನನ್ನು ನಾನು ಕಂಡಿದ್ದರೆ, ²⁰ನನ್ನ ಕುರಿಗಳ ಉಣ್ಣೆಯಿಂದ ಅವನನ್ನು ಬೆಚ್ಚಗೆ ಮಾಡಿದ್ದಕ್ಕಾಗಿ ಅವನ ಅಂತರಾತ್ಮವೇ ನನ್ನನ್ನು ಆಶೀರ್ವದಿಸದಿದ್ದರೆ, ²¹ನ್ಯಾಯಸ್ಥಾನದಲ್ಲಿ ನನಗೆ ಬೆಂಬಲವಿದೆಯೆಂದು ಕಂಡು ಅನಾಥನ ವಿರುದ್ಧ ನನ್ನ ಕೈಯೆತ್ತಿದ್ದರೆ, ²²ಆಗ ನನ್ನ ಹೆಗಲು ಅದರ ಹೆಗಲೆಲುಬಿನಿಂದ ಕಿತ್ತುಹೋಗಲಿ, ನನ್ನ ತೋಳು ಕೀಲಿನಲ್ಲಿ ಮುರಿದುಹೋಗಲಿ. ²³ದೇವರಿಂದ ಬರುವ ವಿಪತ್ತು ನನಗೆ ಭಯಂಕರವಾಗಿತ್ತು, ಅವರ ಮಹಿಮೆಯ ಮುಂದೆ ನಾನು ಏನೂ ಮಾಡಲಾರದವನಾಗಿದ್ದೆನು.

²⁴“ನಾನು ಚಿನ್ನವನ್ನು ನನ್ನ ಭರವಸೆಯಾಗಿ ಮಾಡಿಕೊಂಡಿದ್ದರೆ, ಅಪರಂಜಿಗೆ ‘ನೀನೇ ನನ್ನ ಆಧಾರ’ ಎಂದು ಹೇಳಿದ್ದರೆ, ²⁵ನನ್ನ ಸಂಪತ್ತು ದೊಡ್ಡದಾಗಿದೆಯೆಂದು, ನನ್ನ ಕೈ ಇಷ್ಟೊಂದು ಸಂಪಾದಿಸಿದೆಯೆಂದು ನಾನು ಹಿಗ್ಗಿದ್ದರೆ, ²⁶ಸೂರ್ಯನು ಪ್ರಕಾಶಿಸುತ್ತಿದ್ದಾಗ ಅದನ್ನು, ಅಥವಾ ವೈಭವದಿಂದ ಚಲಿಸುವ ಚಂದ್ರನನ್ನು ನಾನು ನೋಡಿದ್ದರೆ, ²⁷ಇದರಿಂದ ನನ್ನ ಹೃದಯವು ರಹಸ್ಯವಾಗಿ ಮರುಳುಗೊಂಡು, ಆರಾಧನೆಯಲ್ಲಿ ನನ್ನ ಕೈ ಅವುಗಳಿಗೆ ಮುತ್ತನ್ನು ಕಳುಹಿಸಿದ್ದರೆ, ²⁸ಇದೂ ಸಹ ನ್ಯಾಯತೀರ್ಪಿಗೆ ಅರ್ಹವಾದ ಪಾಪ, ಏಕೆಂದರೆ ಮೇಲಿರುವ ದೇವರಿಗೆ ನಾನು ಅಪನಂಬಿಗೆಯವನಾಗಿರುತ್ತಿದ್ದೆನು.

²⁹“ನನ್ನನ್ನು ದ್ವೇಷಿಸಿದವನ ನಾಶದಲ್ಲಿ ನಾನು ಸಂತೋಷಿಸಿದ್ದರೆ, ಅಥವಾ ಅವನಿಗೆ ಕೇಡು ಸಂಭವಿಸಿದಾಗ ಹಿಗ್ಗಿದ್ದರೆ, ³⁰ಅವನ ಪ್ರಾಣದ ಮೇಲೆ ಶಾಪವನ್ನು ಬೇಡಿ ನನ್ನ ಬಾಯಿ ಪಾಪಮಾಡುವಂತೆ ನಾನೆಂದೂ ಬಿಡಲಿಲ್ಲ, ³¹‘ಅವನ ಪಂಕ್ತಿಯಿಂದ ಹೊಟ್ಟೆತುಂಬಿಸಿಕೊಳ್ಳದವರು ಯಾರು?’ ಎಂದು ನನ್ನ ಮನೆಯವರು ಎಂದಿಗೂ ಹೇಳದಿದ್ದರೆ, ³²ಯಾವ ಪರದೇಶಿಯೂ ಬೀದಿಯಲ್ಲಿ ರಾತ್ರಿ ಕಳೆಯಲಿಲ್ಲ, ಏಕೆಂದರೆ ಪ್ರಯಾಣಿಕನಿಗೆ ನಾನು ನನ್ನ ಬಾಗಿಲುಗಳನ್ನು ತೆರೆದಿದ್ದೆನು. ³³ಇತರರಂತೆ ನನ್ನ ಪಾಪಗಳನ್ನು ಮುಚ್ಚಿಕೊಂಡು, ನನ್ನ ಅಪರಾಧವನ್ನು ನನ್ನ ಹೃದಯದೊಳಗೆ ಅಡಗಿಸಿಕೊಂಡಿದ್ದರೆ, ³⁴ಗುಂಪಿಗೆ ನಾನು ಅಷ್ಟೊಂದು ಭಯಪಟ್ಟು, ಕುಲಗಳ ತಿರಸ್ಕಾರವು ನನ್ನನ್ನು ಹೆದರಿಸಿದ್ದರಿಂದ, ನಾನು ಮೌನವಾಗಿದ್ದು ಹೊರಗೆ ಹೋಗದಿದ್ದರೆ.

³⁵“ಆಹಾ, ಯಾರಾದರೂ ನನ್ನ ಮಾತನ್ನು ಕೇಳಿದರೆ ಎಷ್ಟೋ ಒಳ್ಳೆಯದು! ಇಗೋ ನನ್ನ ಸಹಿ— ಸರ್ವಶಕ್ತನು ನನಗೆ ಉತ್ತರಕೊಡಲಿ! ನನ್ನ ಮೇಲೆ ದೂರಿಡುವವನು ತನ್ನ ದೋಷಾರೋಪಣೆಯನ್ನು ಬರೆದುಕೊಡಲಿ! ³⁶ನಿಶ್ಚಯವಾಗಿ ನಾನು ಅದನ್ನು ನನ್ನ ಹೆಗಲ ಮೇಲೆ ಹೊತ್ತುಕೊಳ್ಳುತ್ತಿದ್ದೆನು, ಕಿರೀಟದಂತೆ ಅದನ್ನು ನನ್ನ ಮೇಲೆ ಕಟ್ಟಿಕೊಳ್ಳುತ್ತಿದ್ದೆನು. ³⁷ನನ್ನ ಪ್ರತಿ ಹೆಜ್ಜೆಯ ಲೆಕ್ಕವನ್ನು ನಾನು ಅವರಿಗೆ ಕೊಡುತ್ತಿದ್ದೆನು; ರಾಜಕುಮಾರನಂತೆ ನಾನು ಅವರ ಬಳಿಗೆ ಬರುತ್ತಿದ್ದೆನು.

³⁸“ನನ್ನ ಭೂಮಿ ನನ್ನ ವಿರುದ್ಧ ಕೂಗಿದ್ದರೆ, ಅದರ ಸಾಲುಗಳು ಒಟ್ಟಾಗಿ ಅತ್ತಿದ್ದರೆ, ³⁹ನಾನು ಹಣಕೊಡದೆ ಅದರ ಫಲವನ್ನು ತಿಂದಿದ್ದರೆ, ಅಥವಾ ಅದರ ಯಜಮಾನರ ಪ್ರಾಣವನ್ನು ಹಿಂಡಿಹಾಕಿದ್ದರೆ, ⁴⁰ಆಗ ಗೋಧಿಗೆ ಬದಲಾಗಿ ಮುಳ್ಳುಗಿಡಗಳು ಬೆಳೆಯಲಿ, ಜವೆಗೋಧಿಗೆ ಬದಲಾಗಿ ದುರ್ಗಂಧದ ಕಳೆ ಬೆಳೆಯಲಿ.” ಯೋಬನ ಮಾತುಗಳು ಮುಗಿದವು.