Job melü kedi keta sü kepole

Jobe amhü züde kepo thi die khüle thisü, pü kerhü mha püngu mha püngu phrühsü: kümüthu kemo, mezi kemo, choyimi mejo kedi phra kemo, po bamo nu kemuholü ba lize pü püthotho mhati kemo, suna lü mülü kemo. Pü süo u be thosü de mhapuh pata la jü thopü menyüta. Süsa pü jüko mütü die kemota.

Kezhü 31.

I amhü züde kepo thisü; süla dipübi I reliphosüpü ce küveo yi veta? Kekrelamori tüyo küba Jihova celü I dipü hu ngoyi to, kekro küba keku metü kedi celü dipü ngokemetsü ngoyi to? Jütho kemoko la mhathikümüsü bamo me, mu mha kümopü thiko la mhakemeka bamo me? Pü achoko ngomo me, mu a cho metü phrüyi mo me?

I matho mezi lü hüta lize, mu a phi matho khravü rushühta lize, Pü ajütho meshilü a lüsü süte, mu Jihovae a kedi keta süo seyite, a cho choko celü phrüketa lize, mu a melü amhü sa müdzita lize, mu a belü thece kedi püri thethi lize, süla I lüsüte mu kekremi tiyite, mu ala kerüh süko pava zoyite.

a melü thenopü züde mekre lize, mu I a kemo cekhalü lüta lize, süla acemi kekre mipü züde choyi thiyite, mu kekremiko pü züde ditoyite. Kekrelamori süo kürhoda keta mhatho kesü zo, sheco ngoyi keva kephoma zo; Kekrelamori süo mhakemeka tü tice ketipü me zo, mu a yi metü süo melü thü vato.

athekümi mori atheküpü ukoe azü mejo khipü keta ce, I uko jütho süpümo lize, süla Jihova tasü ce I dipü thi to? Pü aju acelü haphrü süce, I pü ce dipü khü to? Azu nobulü athi küsüoe a thekümi sheri thisü mo me? Samepü nobulü ha botho thisü mo me?

I küdimi uko therho mhathoko celü khasü thi lize, mori theno kesazü mhü nyü süte lize, mori I a mha atho keti tita die, pozu kesipü nu la mha ngoyi mote lize, Vele a natsilüno I pü potsa sübi rekrüsü, mu azu nobulü I theno kesazü ketho vosü, I khümüne kesipü die kütako thüma küngo lize, mori mha khaküsü the whü kedi küngo lize, pü melü süo azü zapozale püsümo lize, a püma pitha khi I pü me megusü ce, pozu kesipü nu yo I a be thaka thisü lize, kekrelamori sheco kebalü a kekhrühi süo I ngo la, süla a cükro süo pü phreko celü phrüyi süte, mu a pübo süo nphelü thakayi süte. Kekrelamori Jihova celü mhathikümüsü süo azü nethipü zo, mu pü ketekhri mhüjülü I nothi thi yi vamo.

I sona süo a kemelü thisü lize, mori sona kerü ce, “No a kerede zo,” sita lize, a mhakeve kekro bata die I thükhodale thisü lize, a be mha kekro ngoyita die, nace süo vekrü ce I petü lize, mori khre süo zapozale khi cho ce petü lize, side a melü süo sezo khravü mekre, mu tüthi kesülü a be uko ce mütsüyi süsü, hio sheri sheco ngoyi keva kephoma zoto, kekrelamori I tüyo küba Jihova ce matho mezi thisüta zo.

athi kümopü mipü mhakemeka lü I rükeyita lize, mori pü mha thizü ngode I rükeyi thisü lize. I a pepü süo pü kehü yo reshu po khi kephoma thiyi süpü mozole, a ki kedamiko, “Sopü pü mha celü khü zümo?” zi mhapü po mozo lize, rüsomi mhapü shoprolü tüzü lavo kemo, kekrelamori I lammi ce a cekha khri sü. I kekremi sübi a kephomako whü va die, a kejo a melü su lize, kekrelamori I thümako mprü keta, mu shuyeko ntha ayo nethipü keta, side I sileo ba die tavo vamo lize —

Aho, sopü de afü reni sü na! Hihe, a zasi lesida—Keku Kedemi akhü süte! A ngomumi pü mejo liko kiri süte! Zhopo, I süo a thoprolü khosü phrüto, I süo mükhu sübi alü khava phrüto. I pü ce a cho metü ju keha phrü süto; kezhoo mipü sübi I pü ce ngo vo süto.

A cejü ayo semeto, mu pü ketiko metü khra lize, I pü she presa kemo ti sü, mori pü niepoko uthi süva lize, size atalha belü hushi hü süte, mu chü belü reshuhu hü süte. Job jüko meta.