Ayubu 31 FHB Father's Heart Bible™

31 ¹“Nĩndagĩire kĩrĩĩkanĩro na maitho makwa; nĩ ũndũ ũcio ingĩcũthĩrĩria mũirĩĩtu gathirange atĩa? ²Amu nĩ rwĩga rũrĩkũ ingĩgĩa naruo kuuma kũrĩ Ngai ũrĩa ũrĩ igũrũ, na igai rĩrĩkũ kuuma kũrĩ Mwene-Hinya ũrĩa ũrĩ igũrũ mũno? ³Githĩ ti mwanangĩko wa arĩa matarĩ athingu, na mũtino wa arĩa mekaga ũũru? ⁴Githĩ ndonaga njĩra ciakwa, na agĩtara ikinya rĩakwa o rĩothe?

⁵“Angĩkorwo nĩndatũũrĩte na maheeni, na kũgũrũ gwakwa gũkĩhiũhĩra ũheenania, ⁶nĩaanthime na ratiri cia ma, nĩgeetha Ngai amenye ũrũngĩrĩru wakwa, ⁷angĩkorwo makinya makwa nĩmagarũrũkĩte makoima njĩrainĩ, nayo ngoro yakwa ĩkarũmĩrĩra maitho makwa, na giko o gĩothe gĩkĩĩnyiitĩrĩra mookoinĩ makwa, ⁸hĩndĩ ĩyo nĩndahaande na mũndũ ũngĩ arĩe, na kĩrĩa kĩngĩmera gĩakwa kĩmunywo.

⁹“Angĩkorwo ngoro yakwa nĩyaheenererio nĩ mũndũ-wa-nja, na ngĩĩhitha mũrangoinĩ wa mũndũ wa itũũra rĩakwa, ¹⁰hĩndĩ ĩyo mũtumia wakwa nĩatungatĩre mũndũ ũngĩ, na andũ angĩ makome nake. ¹¹Amu ũndũ ũcio ũngĩkorwo ũrĩ ngero ya thoni, wĩhia ũngĩagĩrĩirwo nĩ gũtuĩrwo ciira; ¹²amu nĩ mwaki ũrĩa ũcinanaga ũgakinya o kwa Mwanangĩko, naguo ũngĩcina magetha makwa mothe.

¹³“Angĩkorwo nĩndaagĩte gũtuĩra ndungata yakwa ya mũndũrũme kana ya mũndũ-wa-nja ciira na kĩhooto rĩrĩa maandeeheire thitango, ¹⁴nĩ atĩa ingĩĩka rĩrĩa Ngai angĩũkĩra? Rĩrĩa angĩĩnjũũria ũhoro, ingĩmũcookeria atĩa? ¹⁵Githĩ ũrĩa wanyũũmbire ndainĩ tiwe woombire ndungata yakwa o nayo? Githĩ ti we ũmwe watũũmbire ithuĩ eerĩ tũrĩ ndainĩ?

¹⁶“Angĩkorwo nĩndagirĩrĩirie athĩĩni kũgĩa na kĩrĩa meendaga, kana ngareka maitho ma ndigwa manoge, ¹⁷kana ngarĩa irio ciakwa ndĩ o nyiki, nake mwana wa ngoriai ndarĩ kĩndũ gĩa kũrĩa, ¹⁸o na gũtuĩka kuuma wĩthĩinĩ wakwa nĩndamũreraga ta ithe, na kuuma ndainĩ ya maitũ nĩndatongoragia ndigwa, ¹⁹angĩkorwo nĩndoonire mũndũ agĩkua nĩ kwaga nguo, kana mũthĩĩni ũtarĩ kĩndũ gĩa kwĩhumbĩra, ²⁰angĩkorwo mwĩrĩ wake wothe ndwaandaathimire nĩ ũndũ wa kũmũhiũhia na guoya wa ng'ondu ciakwa, ²¹angĩkorwo nĩndaambararirie guoko gwakwa njũkĩrĩre mwana wa ngoriai, nĩ ũndũ nĩndonaga ndĩ na ũteithio kĩgomanoinĩ, ²²hĩndĩ ĩyo kĩande gĩakwa nĩgĩtunwo kuuma handũ hakĩo, naguo guoko gwakwa gũunĩke kuuma ngĩngoinĩ. ²³Amu mwanangĩko ũrĩa uumaga kũrĩ Ngai warĩ wa kũndetia guoya, na mbere ya riiri wake ndingĩahotire gwĩka ũndũ o na ũmwe.

²⁴“Angĩkorwo nĩndatuire thahabu nĩyo mwĩhoko wakwa, kana ngĩĩra thahabu ĩrĩa njega atĩrĩ, ‘Wee nĩwe ũgitĩri wakwa,’ ²⁵angĩkorwo nĩndetĩĩire atĩ ũtonga wakwa warĩ mũnene, na atĩ guoko gwakwa nĩkwĩgĩĩrĩire indo nyingĩ mũno, ²⁶angĩkorwo nĩndarorire riũa rĩkĩara, kana mweri ũgĩthiĩ na riiri, ²⁷nayo ngoro yakwa ĩkĩheenererio na hitho, naguo guoko gwakwa gũgĩcimumunyĩra ngĩcihooya, ²⁸o naguo ũndũ ũyũ ũngĩkorwo ũrĩ wĩhia ũngĩagĩrĩirwo nĩ gũtuĩrwo ciira, amu ingĩkorwo nĩndakaanire Ngai ũrĩa ũrĩ igũrũ.

²⁹“Angĩkorwo nĩndakenire nĩ mwanangĩko wa ũrĩa waathũũrire, kana ngĩiyũrwo nĩ gĩkeno rĩrĩa thĩĩna wamũkorire. ³⁰ndirĩ ndareka kanua gakwa keehie na kũhooya kĩrumi gĩũke igũrũ rĩa muoyo wake, ³¹angĩkorwo andũ a nyũmba yakwa matirĩ moiga atĩrĩ, ‘Nũũ ũtahũũnĩtio nĩ metha yake?’, ³²gũtirĩ mũgeni warĩĩkarĩte ũtukũ njĩrainĩ, amu nĩndahingũragĩra mũgendi mĩrango yakwa. ³³Angĩkorwo nĩndahumbĩrire mehia makwa ta ũrĩa andũ angĩ mekaga, ngĩhitha mahĩtia makwa thĩinĩ wa ngoro yakwa, ³⁴nĩ ũndũ nĩndetigagĩra kĩrĩndĩ mũno, naguo ũnyarari wa mĩhĩrĩga ũkanguoyohia, o nginya ngĩkira ki, ngĩaga kuuma nja.

³⁵“Naarĩ korwo nĩ kũrĩ mũndũ ũngĩnjigua! Rĩu nĩ rũũri rwakwa— Mwene-Hinya nĩanjookerie ũhoro! Naake ũrĩa ũũthitangaga nĩandĩke thitango yake! ³⁶Ti-itherũ ingĩmĩkuua kĩandeinĩ gĩakwa, ngĩmĩoha igũrũ rĩakwa ta thũmbĩ ya ũnene. ³⁷Ingĩmũhe ũhoro wa ikinya rĩakwa o rĩothe; ta mũthamaki ingĩmũkuhĩrĩria.

³⁸“Angĩkorwo mũgũnda wakwa nĩwarĩrĩire ũkĩnjũkĩrĩra, nayo mĩtaro yaguo ĩkarĩra hamwe, ³⁹angĩkorwo nĩndarĩire maciaro maguo itekũrĩha, kana ngĩniina muoyo wa eene-guo, ⁴⁰hĩndĩ ĩyo nĩkũmere mĩigua handũ ha ngano, na riya rĩnungĩte handũ ha cairi.” Ciugo cia Ayubu nĩcithirĩte.