ኢዮብ 31

31 ¹“ከዐይኖቼ ጋራ ኪዳን አደረግሁ፤ ታዲያ እንዴት ድንግልን በፍትወት እመለከታለሁ? ²ከላይ ካለው ከእግዚአብሔር ዘንድ ምን ዕድል ፈንታ ይኖረኛል? ከከፍታ ካለው ሁሉን ቻይ ዘንድስ ምን ርስት? ³ለዐመፀኞች መዓት፣ ክፉ ለሚያደርጉም ጥፋት አይደለምን? ⁴መንገዶቼን አያይምን? ርምጃዬንም ሁሉ አይቈጥርምን?

⁵“በሐሰት ኖሬ እንደ ሆነ፣ እግሬም ወደ ተንኰል ፈጥኖ እንደ ሄደ፣ ⁶በትክክለኛ ሚዛን ይመዝነኝ፤ እግዚአብሔርም ንጽሕናዬን ይወቅ፤ ⁷ርምጃዬ ከመንገድ ፈቅቆ እንደ ሆነ፣ ልቤም ዐይኖቼን ተከትሎ እንደ ሆነ፣ እድፍም በእጆቼ ተጣብቆ እንደ ሆነ፣ ⁸እኔ ልዝራ ሌላውም ይብላ፤ የበቀለልኝም ተነቅሎ ይጣል።

⁹“ልቤ በሴት ተታሎ እንደ ሆነ፣ በባልንጀራዬም ደጃፍ አድፍጬ እንደ ሆነ፣ ¹⁰ሚስቴ ለሌላ ሰው ትገዛ፤ ሌሎችም ከእርሷ ጋራ ይተኙ። ¹¹ይህ የሚያሳፍር ወንጀል ነውና፤ ፍርድም የሚገባው ኀጢአት ነው፤ ¹²እስከ ጥፋት ድረስ የሚበላ እሳት ነውና፤ መከሬንም ሁሉ ያቃጥል ነበር።

¹³“ወንድ ወይም ሴት አገልጋዬ በእኔ ላይ ክስ ባቀረቡ ጊዜ ፍትሕ ነፍጌአቸው እንደ ሆነ፣ ¹⁴ታዲያ እግዚአብሔር በተነሣ ጊዜ ምን አደርጋለሁ? በሚመረምረኝም ጊዜ ምን እመልስለታለሁ? ¹⁵በማኅፀን ውስጥ የሠራኝ፣ አገልጋዬንም አልሠራውምን? በማኅፀንም ውስጥ ሁለታችንን የቀረጸ ያው አንዱ አይደለምን?

¹⁶“ድኾችን ከሚፈልጉት ነገር ከለከልኋቸው እንደ ሆነ፣ ወይም የመበለቲቱን ዐይኖች አደከምሁ እንደ ሆነ፣ ¹⁷እንጀራዬንም ብቻዬን በልቼ እንደ ሆነ፣ ድኻ ዐደግም ሳይበላ ቀርቶ እንደ ሆነ፣ ¹⁸ከሕፃንነቴ ጀምሮ እንደ አባት አሳድጌዋለሁና፣ ከእናቴም ማኅፀን ጀምሮ መበለቲቱን መርቻለሁ፤ ¹⁹ልብስ በማጣት የሚጠፋን ሰው አይቼ እንደ ሆነ፣ ወይም የሚከናነበው የሌለውን ችግረኛ አይቼ እንደ ሆነ፣ ²⁰በበጎቼ ጸጉር ስላሟሟቅሁት ሰውነቱ ሁሉ ካልባረከኝ፣ ²¹በፍርድ ቤት ረዳት እንዳለኝ ዐይቼ፣ ድኻ ዐደግ ላይ እጄን አንሥቼ እንደ ሆነ፣ ²²ትከሻዬ ከመሰኪያው ይውለቅ፤ ክንዴም ከመገጣጠሚያው ይሰበር። ²³ከእግዚአብሔር የሚመጣ መዓት ያስፈራኝ ነበርና፤ በግርማውም ፊት ምንም ማድረግ አልችልም ነበር።

²⁴“ወርቅን ተማምኜ እንደ ሆነ፣ ወይም ጥሩ ወርቅን፣ ‘አንተ ዋስትናዬ ነህ’ ብዬ እንደ ሆነ፣ ²⁵ሀብቴ ብዙ ስለ ሆነ፣ እጄም እጅግ ስላተረፈች ተመክቼ እንደ ሆነ፣ ²⁶ፀሓይን ስታበራ አይቼ እንደ ሆነ፣ ወይም ጨረቃን በክብር ስትንቀሳቀስ አይቼ እንደ ሆነ፣ ²⁷ልቤም በስውር ተታልሎ እንደ ሆነ፣ እጄም እነርሱን ለማምለክ ከአፌ መሳም ልካ እንደ ሆነ፣ ²⁸ይህም ፍርድ የሚገባው ኀጢአት ነው፤ ከላይ ያለውን እግዚአብሔርን ክጄ ነበርና።

²⁹“በጠላኝ ሰው ጥፋት ደስ ተሰኝቼ እንደ ሆነ፣ ወይም ክፉ በደረሰበት ጊዜ ሐሤት አድርጌ እንደ ሆነ። ³⁰በነፍሱ ላይ እርግማንን በመጥራት አፌ ኀጢአትን እንዲሠራ ፈጽሞ አልፈቀድሁም፤ ³¹የቤቴ ሰዎች፣ ‘ከማዕዱ ያልጠገበ ማን ነው?’ ብለው አያውቁም እንደ ሆነ፣ ³²እንግዳ በጎዳና ላይ አላደረም፤ በሬን ለመንገደኛ ከፍቼ ነበርና። ³³እንደ ሰዎች ሁሉ ኀጢአቴን ሸፍኜ እንደ ሆነ፣ በደሌንም በልቤ ውስጥ ሰውሬ እንደ ሆነ፣ ³⁴ብዙኃኑን እጅግ ፈርቼ ነበርና፣ የጐሠኞችም ንቀት አስደነገጠኝ፤ ስለዚህ ዝም አልሁ፤ ወደ ውጭም አልወጣሁም።

³⁵“ምነው የሚሰማኝ በነበረ! እነሆ፣ ፊርማዬ ይህ ነው፤ ሁሉን ቻዩ ይመልስልኝ! ከሳሼም ክሱን ጽፎ ያቅርብ! ³⁶በትከሻዬ ላይ በእርግጥ እሸከመው ነበር፤ እንደ ዘውድም አድርጌ በራሴ ላይ ባሰርሁት ነበር። ³⁷ርምጃዬን ሁሉ በተራ በነገርሁት ነበር፤ እንደ መስፍንም ሆኜ ወደ እርሱ በቀረብሁ ነበር።

³⁸“መሬቴ በእኔ ላይ ጮኻ እንደ ሆነ፣ ትልሞችዋም በአንድነት አልቅሰው እንደ ሆነ፣ ³⁹ፍሬዋን ያለ ዋጋ በልቼ እንደ ሆነ፣ ወይም የባለቤቶችዋን ነፍስ አጥፍቼ እንደ ሆነ፣ ⁴⁰በስንዴ ፈንታ እሾህ፣ በገብስም ፈንታ አረም ይብቀል።” የኢዮብ ቃል ተፈጸመ።