約伯記 31

31 ¹「我同自己對眼立咗約; 咁我點會凝望處女呢? ²咁樣,我可以由天上嘅神得到咩份呢? 由高天嘅全能者得到咩產業呢? ³災難唔係臨到唔義嘅人身上咩? 禍患唔係臨到作惡嘅人身上咩? ⁴神唔係睇住我行嘅路咩? 唔係數住我行嘅每一步咩?

⁵「如果我曾經活喺虛謊入面, 雙腳趕住去行詭詐, ⁶就等神用公平嘅天秤稱吓我, 等神知道我係正直嘅, ⁷如果我行嘅步離開咗正道,我個心跟隨咗雙眼, 雙手黐咗任何污點, ⁸咁就等我播種俾第個食,等我園裏面所長出嚟嘅連根拔起。

⁹「如果我個心俾一個女人引誘,我曾經喺鄰舍嘅門口埋伏, ¹⁰咁就等我老婆去服侍第個 男人,等其他人同佢同床。 ¹¹因為咁樣係可恥嘅罪行, 係應該受審判嘅罪; ¹²因為呢種火會焚燒到滅亡之地,燒盡我所有嘅收成。

¹³「如果我嘅男僕或者女僕同我爭訟嘅時候,我曾經唔俾佢哋得到公正, ¹⁴咁神起嚟嘅時候,我可以點呢?佢追究我嘅時候, 我點樣答佢呢? ¹⁵喺母腹裏面造我嘅,唔係都造咗我個僕人咩?喺母腹裏面塑造我哋兩個嘅,唔係同一位咩?

¹⁶「如果我曾經唔俾窮人 得到佢哋所需要嘅,或者令寡婦嘅眼變得疲乏, ¹⁷或者自己一個食飯, 唔俾孤兒有份, ¹⁸其實由我後生嗰陣開始,我好似父親咁 養大佢,由我出母腹起,我就引領寡婦, ¹⁹如果我見過有人因為冇衫著而快將死去, 或者見過窮乏人冇嘢遮身, ²⁰如果佢冇因為我 用羊毛俾佢暖身而全心全意咁祝福我, ²¹如果我因為喺城門口見到有人撐我,就舉手攻擊孤兒, ²²咁就等我膊頭 由肩胛甩出嚟,等我手臂由關節斷開。 ²³因為由神而嚟嘅災難令我驚,喺佢嘅威嚴面前,我乜都做唔到。

²⁴「如果我曾經將黃金 當作我嘅倚靠,或者對精金講:『你係我嘅保障,』 ²⁵如果我因為財富 豐厚而沾沾自喜,因為自己親手賺咗咁多而自誇, ²⁶如果我望住發光嘅太陽, 或者望住輝煌行走嘅月亮, ²⁷以致我個心暗中受咗引誘, 用手向佢哋飛吻去敬拜, ²⁸咁樣都係應該受審判嘅罪,因為我咁樣就係背棄咗天上嘅神。

²⁹「如果我曾經因為恨我嘅人衰亡而歡喜, 或者因為災禍臨到佢而興奮, ³⁰我從來冇容許自己個口犯罪, 去咒詛佢嘅性命, ³¹如果我家裏面嘅人從來冇講過: 『邊個未曾食飽過佢桌上嘅嘢呀?』 ³²從來冇陌生人喺街上過夜, 因為我向旅客打開咗我嘅門。 ³³如果我好似其他人咁遮掩自己嘅罪,將我嘅罪疚藏喺心裏面, ³⁴因為我咁驚群眾,又俾宗族嘅藐視 嚇到,以致我靜咗聲, 唔敢出門口,

³⁵「唉,但願有人肯聽 我!呢度係我嘅簽名——等 全能者答 我啦!等控告我嘅人寫出佢嘅狀詞啦! ³⁶我一定會將佢擔喺膊頭上, 好似戴冠冕咁綁喺身上。 ³⁷我會向佢交代我行嘅每一步;好似王子咁走近佢。

³⁸「如果我塊地曾經呼喊控告 我,佢嘅犁溝一齊哭泣, ³⁹如果我冇俾錢就食咗佢嘅出產, 或者搾乾咗佃戶嘅性命, ⁴⁰咁就等蒺藜代替小麥生出嚟, 等臭草代替大麥生出嚟。」約伯嘅話講完喇。