Jobu 31

31 ¹“Mo bá ojú mi dá májẹ̀mú; báwo wá ni mo ṣe lè tẹjúmọ́ wúńdíá wò? ²Nítorí ìpín wo ni èmi yóò ní láti ọ̀dọ̀ Ọlọ́run òkè, ogún wo láti ọ̀dọ̀ Olódùmarè tí ó ń bẹ lókè ọ̀run? ³Kì í ha ṣe ìparun fún aláìṣòdodo, àti ìjàǹbá fún àwọn tí ń ṣe ibi? ⁴Kò ha rí ọ̀nà mi, tí kò sì ka gbogbo ìṣísẹ̀ mi?

⁵“Bí mo bá ti fi èké gbé ayé, tí ẹsẹ̀ mi sì yára sí ẹ̀tàn, ⁶jẹ́ kí ó fi òsùwọ̀n òdodo wọ̀n mí, kí Ọlọ́run sì mọ ìwà ìdúró ṣinṣin mi, ⁷bí ìṣísẹ̀ mi bá ti yà kúrò ní ọ̀nà, tí ọkàn mi sì tẹ̀lé ojú mi, tí àbàwọ́n kankan bá sì lẹ̀ mọ́ ọwọ́ mi, ⁸nígbà náà jẹ́ kí n gbìn kí ẹlòmíràn sì jẹ ẹ́, kí a sì fa ohun tí ó hù jáde fún mi tu.

⁹“Bí obìnrin bá ti tan ọkàn mi, tí mo sì ba lẹ́nu ọ̀nà aládùúgbò mi, ¹⁰nígbà náà jẹ́ kí aya mi máa sìn ọkùnrin mìíràn, kí àwọn ẹlòmíràn sì bá a sùn. ¹¹Nítorí ìyẹn ìbá jẹ́ ìwà ìbàjẹ́ ìtìjú, ẹ̀ṣẹ̀ tí ó tọ́ sí ìdájọ́; ¹²nítorí iná ni tí ń jó dé ibi Ìparun, tí yóò sì jó gbogbo ìkórè mi run.

¹³“Bí mo bá ti sẹ́ ẹ̀tọ́ fún ọmọ ọ̀dọ̀ mi ọkùnrin tàbí obìnrin nígbà tí wọ́n mú ẹ̀dùn ọkàn wọn wá sọ́dọ̀ mi, ¹⁴kí ni èmi yóò wá ṣe nígbà tí Ọlọ́run bá dìde? Nígbà tí ó bá béèrè ìṣírò lọ́wọ́ mi, kí ni èmi yóò dá a lóhùn? ¹⁵Ẹni tí ó dá mi nínú ìyá, kì í ha ṣe òun náà ló dá ọmọ ọ̀dọ̀ mi pẹ̀lú? Kì í ha ṣe ẹni kan náà ló mọ àwa méjèèjì nínú ìyá?

¹⁶“Bí mo bá ti dá tálákà lẹ́kun ohun tí wọ́n nílò, tàbí tí mo jẹ́ kí ojú opó rẹ̀wẹ̀sì, ¹⁷tàbí tí mo jẹ oúnjẹ mi nìkan nígbà tí aláìníbaba kò rí jẹ, ¹⁸bí ó tilẹ̀ jẹ́ pé láti ìgbà èwe mi, mo tọ́ ọ bí baba ti ń ṣe, àti pé láti inú ìyá mi, mo ṣe amọ̀nà fún opó, ¹⁹bí mo bá ti rí ẹnì kan tí ó ń ṣègbé nítorí àìní aṣọ, tàbí aláìní tí kò ní ìbora, ²⁰bí gbogbo ara rẹ̀ kò bá súre fún mi nítorí mo fi irun àgùntàn mi mú un gbóná, ²¹bí mo bá ti gbé ọwọ́ mi sókè lòdì sí aláìníbaba nítorí mo rí àtìlẹ́yìn mi ní ẹnu ibodè, ²²nígbà náà jẹ́ kí èjìká mi bọ́ kúrò ní ihò rẹ̀, kí apá mi sì ṣẹ́ ní oríkè rẹ̀. ²³Nítorí ìparun láti ọ̀dọ̀ Ọlọ́run jẹ́ ẹ̀rù fún mi, àti pé níwájú ọláńlá rẹ̀ èmi kò lè ṣe ohunkóhun.

²⁴“Bí mo bá ti fi wúrà ṣe ìgbẹ́kẹ̀lé mi, tàbí tí mo wí fún wúrà dáradára pé, ‘Ìwọ ni ààbò mi,’ ²⁵bí mo bá ti yọ̀ pé ọrọ̀ mi pọ̀, àti pé ọwọ́ mi ti rí ọ̀pọ̀lọpọ̀, ²⁶bí mo bá ti wo oòrùn nígbà tí ó ń ràn, tàbí òṣùpá tí ń rìn nínú ọlá, ²⁷tó bẹ́ẹ̀ tí a fi tan ọkàn mi ní ìkọ̀kọ̀, tí ọwọ́ mi sì fi ẹnu kò wọ́n ní ìjọsìn, ²⁸èyí náà ìbá jẹ́ ẹ̀ṣẹ̀ tí ó tọ́ sí ìdájọ́, nítorí èmi ìbá ti jẹ́ aláìṣòótọ́ sí Ọlọ́run òkè.

²⁹“Bí mo bá ti yọ̀ sí ìparun ẹni tí ó kórìíra mi, tàbí tí inú mi dùn nígbà tí ìyọnu bá a. ³⁰Èmi kò jẹ́ kí ẹnu mi ṣẹ̀ nípa pípe ègún sílẹ̀ lórí ẹ̀mí rẹ̀, ³¹bí àwọn ọkùnrin inú agboolé mi kò bá tí ì wí rí pé, ‘Ta ni kò yó láti orí tábìlì rẹ̀?’, ³²kò sí àlejò tí ó sùn ní òde ní alẹ́ rí, nítorí mo ṣí ìlẹ̀kùn mi sílẹ̀ fún arìnrìn àjò. ³³Bí mo bá ti bo ẹ̀ṣẹ̀ mi mọ́lẹ̀ bí àwọn ẹlòmíràn ti ń ṣe, tí mo sì fi ẹ̀bi mi pamọ́ sínú ọkàn mi, ³⁴nítorí mo bẹ̀rù ìjọ ènìyàn gidigidi, tí ẹ̀gàn àwọn ìdílé sì dẹ́rù ba mí, tó fi jẹ́ pé mo dákẹ́ jẹ́ẹ́ tí n kò sì jáde sóde.

³⁵“Háà, ìbá ṣe pé ẹnìkan yóò gbọ́ ti mi! Èyí ni àmì ọwọ́ mi—jẹ́ kí Olódùmarè dá mi lóhùn! Jẹ́ kí olùfisùn mi kọ ẹ̀sùn rẹ̀ sílẹ̀! ³⁶Dájúdájú èmi ìbá gbé e ka èjìká mi, èmi ìbá sì dì í mọ́ mi bí adé. ³⁷Èmi ìbá ṣírò gbogbo ìṣísẹ̀ mi fún un; bí ọmọ-ọba ni èmi ìbá fi súnmọ́ ọn.

³⁸“Bí ilẹ̀ mi bá ti ké pè lòdì sí mi, tí isà oko rẹ̀ sì sọkún papọ̀, ³⁹bí mo bá ti jẹ èso rẹ̀ láìsan owó, tàbí tí mo fún ẹ̀mí àwọn onílẹ̀ rẹ̀ pa, ⁴⁰nígbà náà jẹ́ kí ẹ̀gún hù dípò ọkà jéró, àti èpò búburú dípò ọkà bálì.” Ọ̀rọ̀ Jobu parí nìyí.